Kum 2022 BKHP Thuzir atan “Ruthi” thlan fel a ni.

Mizoram Baptist Kohhran Hmeichhe Pawl (MBKHP) Executive Committee chuan 2022 BKHP Thuzir atan “Ruthi” an thlang fel a, thuzir ziaktu atan Rev. Dr. RL. Hnuni an ruat bawk.  2020 Mirethei (Kuttualleichham) te tanpui na Bial 62 atangin mi 101 hnenah sem turin an ruahman bawk.

Pi F. Lalrochami, President, MBKHP  kaihruai, MBKHP Executive Committee Meeting hi November 20 khan Sap Upa leh Pu Baunga Hall, Serkawn-ah neih a ni a. Lalhmingmawii Chongthu,  Organiser-in report pe-in,  August 24, 2020 a IBWU Tawngtai Ni hman a nih thu leh November 2, 2020 a BWA Hmeichhe Tawngtai Ni hman a nih thu te. Kumin 2020 BKHP Thuzir, inkhawm theihloh avanga a huhova zir theih ni lo mahse thuzir exam erawh November ni 8 leh ni 15 inkara buatsaih a nih thu te leh November 30, 2020 a hman turin NEICCWA Tawngtai thupui Bial tinah thawnchhuah a nih tawh thu te a tarlang a,  BKHP Coordination Committee Aizawl-in MBKHP Organiser Office, BCM Hqrs a hman atan Godrej Filing Cabinet (pindan 4 awm) Rs. 21,500/- man an pek thu tarlan a ni bawk a ni.

Meeting thurel langsar zingah kum 2022 BKHP Thuzir atan “Ruthi” thlan fel a ni a, a ziaktu atan Rev. Dr. RL. Hnuni ruat a ni bawk. 2020 Mirethei (Kuttualleichham) te tanpui na semchhuah turah Bial tin atangin mi 2 tan dilsak theih a nih angin, dilna lo lut te ngaihtuah a ni a, Bial 62 atangin mi 101 hnenah Rs.3200/- theuhin pek ni se an ti a, MBKHP Executive committee member ten Chhawmdawlna In a Advance Christmas an hmanpui thin chu kumin atan chuan hrileng avangin neih loh mai ni se an ti  bawk.