Kum Kal Ta (2020_2021) Assembly Target Cheng nuai 179 chuangin khum a ni.

Tunkar Nilaini, Agust 18, 2021 khan Finance & Pension Committee Meeting Sap Upa leh Pu Buanga Hall, Serkawn-ah neih a ni a, Meeting hi President, Rev. Dr. V. Laldingliana’n a kaihruai a, General Secretary Rev. F. Ramdinmawia’n BCM sum dinhmun : pawisa lo luh dan leh pawisa hman dan report tlangpui a pe.

Finance report chuan, Financial Year liam ta – 2020-2021 chhunga Assembly Target chu Pathian malsawmna-in cheng nuai 179 chuang (RS. 1,79,89,927/-) in khum a nih thu tarlangin, kum kalta-a Kohhran thawhlawm atanga hmuh beisei zat (Target) chu cheng vaibelchhe 69, nuai 35 leh sing 7 (Rs. 69,35,70,000/-) niin, April 2020 – March 2021 chhunga Target atanga lut zawng zawng chu Rs. 71,15,59,927/- a nih thu a tarlang bawk.

Kumin, kum kal mek, 2021-2022 target 1st April – 31st July (thla 4) chhunga Target lut tura beisei chu 25,80,30,000/- a nih laiin, thla li chhunga lut zat chu Rs.20,73,83,375/- a ni a. Tun dinhmuna Target tlinlohna chu Rs. 5,06,46,625/- a nih thu te, Target pumpui atanga pek tawh zat chu za zela 26.70  a nih thu a tarlang bawk.

Meeting thurel zingah Christian Hospital, Lawngtlai tana sum mamawh dil belhna chu pek remtih a ni a, Christian Hospital, Serkawn tan khawl leh bungraw mammawh leina tur sum an dilna chu remtih a ni bawk. Covid-19 hrileng avanga Mission Field Accounts te audit theih loh a la awm mek chu, a hma thei ang bera audit theih dan kawng zawn ni se an ti a, 2022-2023 atan thawktute D.A 4% a tihpun remtih a ni bawk. Hetih lai hian Covid-19 hrileng-in ram pumah Kohhran leh chhungkaw tin te min nghawng avangin kum thar budget siam hun atan Kohhran in a thawh tur (Church Contribution) Budget chu tihpun loh ni se tih a ni.

Meeting hian Finance & Pension Sub-Committee siam in, member 9 a ruat a chung te chu – President, General Secretary, Associate General Secretary pahnih te, Director, Finance & Pension Dept. Senior Account Officer te bakah Upa Liankhama, Kikawn, Upa Lalrinliana Colbert, Chanmari leh Upa C. Laltlansanga, Ramzotlang te an ni. Finance & Pension Committee Meeting hi hrileng avang in koh zung zung a harsat thin avang in, an aiawha thu hmanhmawhthlak ngaihtuah tur in  Finance & Pension Sub-Committee hi siam a ni.