Leprosy Sunday – January 28

Tunkar Pathianni, January 28, 2018 hi Phar pual Pathianni (The Leprosy Sunday) a ni a. He Ni hi Mizoram Baptist Kohhran chuan urhsun taka hmangin Kohhran tinah Chawhma Inkhawmah hemi pual hian inkhawm Progamme siam a ni ang. Headquarters atanga thupui thlan sa ‘Phar te tithianghlim ula.’ (Matt. 10:8) hmangin Pathian thuchah ngihthlak a ni ang.

‘Phar pual Pathianni’ hi 2006 Assembly rel angin January Pathianni hnuhnung berah hman thin a ni a. Kum danga kan tih thin angin Inkhawm thawhlawm hi TLM pual a nih avangin Headquarters-ah thawn tur a ni e. (Read More article)

(Kumin Phar pual Pathianni thawhlawm chungchangah BCM General Secretary chuan hetiang hian thuchhuah a siam a. Hun a tepter tawh avangin Tualchhung Kohhran ten lehkha(Circular) hi kan hmu kim hman dawn lo va, a hnuaia tarlan hi hmanga tarlan hi thu tliangah ngaia hma lo la turin a ngen a ni. (Attachment Letter for all Local Churches, BCM)

………………………………..

TLM MIZORAM RAWNGBAWLNA

– Rev. Lalzarliana
Promotional Secretary

Thuhma:

The Leprosy Mission Mizoram hi phâr chanhai leh riangvaite puala Mizorama thawktu awmchhun niin Kohhran pâwl hrang hrang inzawmkhâwma din a ni a. Kum 32 zet phârte tâna sum leh pai khawn khâwmin, tawngtaisakin tanpui hna The Leprosy Mission Trust India (TLMTI) kaltlangin kan lo thawk tawh a. Kohhran hrang hrangte bâkah mi mal leh pâwlho thahnemngai tak tak te zârah kum tinin thilpêk engemaw zât kan dawng khâwm a, hma kan sâwn ve zêl a. Hetianga Lal Isua ngaihpawimawh rawngbâwlnaa tel ve theia kan awm hi kan lâwmin kan phûr tlâng êm êm a ni. Mizoram huapin chanchin ngaihnawm tak tak, thahnemngaihna thâwm, Unit ding thar, Chapter inkhâwmpui, Campaign fehchhuak rêng rêngin hun kan hmang reng a. Tûnah phei chuan TLM Chapter 25 lai nei tawhin, Unit thahnem tak leh Kohhrana Promoter ten thahnemngai takin Target an tuak a. Kohhran, Pâwl ho, mi mal, leh School ten thahnemngai takin phârte tân sum leh pai an thawh thîn a ni. Aw le, hetia phârte tân malsâwmna ropui tak thlentua kan inngaih laiin kan tum loh leh beisei hauh lo thilin TLM Mizorama mi thahnemngaite chu April 2017 khan min nuai ta tlat mai a, bangbo tak leh kal dân tûr hriatthiam har ti takin kan hawihai hman teuh hle a ni.

Harsatna kan tawh dân:

Sawrkâr laipuiin Digital India leh Cashless transaction a kal chhoh pui a, India ram sum leh pai che vêl a buai nuai nuai a, chumi changchawi chuan Foreign contribution zâra pâwl dingho te lakah Income Tax leh Charter Accountant te an hrâng chho ta zêl a. TLMTI pawh 80% deuh thaw Foregin Contribution-a innghat a nih avângin fimkhur ngai leh hlauhthâwnawm tak dinhmunah a lo awm ta a. Tichuan, TLM Mizoramin TLMTI-a sum a thehluh dân tûrah harsatna lian tak kan tâwk ta a. Tupawhin Leprosy Mission-a tanpuina an pe duh a nih chuan Pan Card a neih a ngai a, cheque/Bank transfer/Bank Draft emaw-in account detail târlangin pawisa thawh tûr tih a ni ta a. Keiniin chûng chu kan ram tân tih theih lovah kan ngai a. Donation pe lo mai rawh u tihna ang tluk a ni kan ti ve thung a. TLMTI chuan chutiang lo chuan Income Tax leh Charter Account-in rem an ti tawh lo a ni, an ti ta si a. Chutih mêk lai chuan keini chêng tlêm tê tê khawn khâwm a, phârte tanpui nâna sawhthing man, anhnah hralhna leh tuibûr man, instalment pawha pe ve hrâm hrâm te, Bank awmna mumal lova awm tam tak te tân Bank detail te, PAN Card number tih vêl te chu nei lo tûr chiangsa kan ni si a. Tichuan a awmzia chu, keiniin kum tina chêng nuai sawmhnih khat sawrkâr dân lo anga thawn ngai, Audit leh Income Tax Department-in a man chhuah vaih chuan Foreign atanga an sum hmuh Vaibelchhe tel hloh phahna ni thei tûr chu TLMTI chuan a ngai ngam lovin, ui chung chung leh pawi ti takin TLM Mizoram nên chuan inthathen rih phawt a lo ngai ta a ni.

Engtia kal zêl tûr nge ni ang:

TLM Mizoram hian India rama TLMTI hnuaia kan thawhpuite ang lo takin (Duh hun hunah an bân mai thîn) setup fel tak kan nei a, Mizoram sawrkâr hnuaiah Firm & Society-ah in Registered in, NEICC-ah pawh Associated member hial kan ni a. Office mumal tak leh Committee body fel tak dinin, Kohhran hrang hrang intelkhâwmin kum tam tak kan lo kal tawh a ni. Hetianga kan kal avâng hian nghet takin sum hnâr pawh kum tluana kang lovin kan awm thîn a. A nihna takah chuan TLMTI te hi phâr rawngbâwlna atâna sum leh pai khawn khâwma kan thawhpui mai an ni. Chuvâng chuan TLM Mizoram hi TLMTI nêna thawhhona a tâwp avânga tâwp ve mai thei a ni lo a ni. Amaherawh chu pâwl hrang hrang nên thawkho ni mah ila, BCM-ah a innghat lian êm êm a, chuvâng chuan BCM hotute pawh vawi tam tak dâwrin TLM Mizoram kal zêlna sawiho pui ngen thin a ni.

Makedonia ramah lo kai la min pui rawh:

Kum 2/1 lek liam taah khan Bethany Leprosy Colony, Bapatla-a mi ten Mizoram atangin phârte kan tanpui thîn a ni tih an hriat avângin min rawn dâwr a. Nimahsela TLMTI te hriatpui loh chuan a remchâng thei lova. Vânneihthlâk takin kan ngenna tihlawhtlingin BCM Shalom, Aizawl ten Rs 20,000/-a tanpuiin keiniin Rs 6,000/- vêl kan lo pe ve a, beidawng ang reng takin tawngtainain kan lo ngaichâng ang che u tiin an haw a. Hetianga TLMTI nêna kan inkâr a lo chah tâkah chuan kan rilru a zalên zâwka phârte tâna rawngbâwl ve kan châk thin, mahse kan zawmpuite duhdân ang a loh theih lohva kal ngai thîn chu rin loh lamah thliin min chhêm lêng ta dawrh mai a. Tûn hma kha chuan indirect-in phârte tân rawng kan bâwl thîn a, tûnah chuan direct-in phârte tâna rawngbâwlna Mizoram chhûnga mi leh India ram hmun hrang hranga mi te tân kawng a inhawng ta a ni. Tichuan Paula’n Makedonia ramah lo kai la min pui rawh tih aw a dawn ang khan mak ang reng tak maiin Bethany Leprosy Colony-a mite rilruah an lo lang nghâl vat a. Chawp leh chilhin May 2017 khân kum khat chhûng tawngtainain kan dîl tawh a, in mi tanpuina kan mamawh takzet a ni, tiin an rawn lang leh ta hlawl mai a. Tichuan, TLM Mizoram hruaitute mi 7 thlang chhuakin a hmunah July 2017 khan kan zu zir chiang a. TLM Mizoram chuan an dinhmun leh mamawhnate enin ngun taka ngaihtuahin hmalâkna tûr hmasaah a thlang fel ta a ni.

Bethany Leprosy Colony, Bapatla, Andra Pradesh:

Bapatla hi tuifinriat kama khaw awm Andra Paradesh State-a mi a ni a. He khaw hmâwrah hian Phâr chênkhâwmna, Bethany Leprosy Colony hi a awm a, kum 60 vêl liam taa din a ni. Tûn hma chuan enkawltu tha tak neiin Foreign atang te pawhin tanpuitu an hmu thîn a. TLMTI enkawl loh phâr awm khâwm an ni. Tûn hnuah hian sum leh paia an tlâk chhiat nasat êm avângin kawng hrang hrangin harsatna an tâwk a. He Colony-ah hian in (tê tak tê tê) 341 a awm a, mihring 1200 vêl an awm a, phâr enkawl lai 225 an awm a ni. An vain phâr an ni vek tawh bîk lova, a bîkin an tu leh fate hi phâr lo an ni a. Amaherawh chu upa lam erawh phâr hnuhma nei vek an ni a, ei tûr buatsaihsak ngai, kut bûl, ke bûl leh mitdel engemaw zât an awm a. An eizawnna tlângpui chu 70% kut dawh an ni a, a then chu an ei-in thawk chhuak tûrin inpte/bag lahmulin an tah thîn a, chûng chu hmun hrang hrangah an zuar thîn. An fate chu public School-ah te an admit duh loh avângin zirna te pawh an buatsaih ve bawk a ni.

Mizorama Phârte pawh kan buaipui thei ta:

Tûn hma kha chuan TLMTI project bâk kha khawi mah kan hawi thei lova. Mizorama phâr kan neih ngei ngei te pawh kan hma hlei thei lo. Tûnah erawh chuan, TLM Mizoram Committee thu ngeiin kan ngaihmawh phârte kan tanpuiin kan enkawl ve thei dâwn ta a. 2017 kum tîr khan TLM Choir te nên Campaign hruaitu engemaw zât nên kan feh chhuak a. Tlabunga Hospital-in Phâr ward an neih te tlawhin kan zaipâwlte pawh an hmaah mittui nên an zai a ni. Enkawl lai chu 3,4 vêl chauh an awm a, mut bu, Bible leh pawisa tlêm kan zu hlân ve a, a aia tam pe thei nih kan châk hle. Tûnah chuan khûng mite leh Mizorama phâr dangte tân rawngbâwlna leh tanpuina kawng a lo inhawng ta a ni.

Tlângkawmna:

Hêng bâkah hian phâr tanpui ngai ngawih ngawih hi India ramah hian an la tam êm êm mai a, Leprosy Colony ngawt pawh hi za dâwn lai a awm a ni. Kum tinin phâr vei thar nuaikhat leh sînghnih chuang an la awm ziah kan tih lai hian TLMTI enkawl ho hi sanghnih/thum bâk an ni lova, sawrkârin engemaw zât pawh enkawl se, chûngho thlen phâk loh engzât tak la awm ang maw? Chûng ho chu a ni mai lo maw kan Makedonia kohna dawnna te chu? TLM Mizoram hian Lalpa chakna rinchhanin chûng mite kohna chu kan chhâng thei a ni. Nge kan haider mai dâwn le? Vawiina Kohhran hote hian tawngtaina nên phârte taksa, rilru leh thlarau chhan chhuak tûra Lal Isuan thu min pêk hi i ngaipawimawh ang u.
TLM Membership nih thei dân:
1. Outstanding Gift Rs. 3,000
2. Charitable Gift Rs. 2,000
3. Founder Gift Rs. 1000
4. Patron Member Rs. 500
5. Life Member Rs. 300
6. Memmorial Gift Rs. 200
7. Anniversary Gift Rs. 200
Hêngahte hian Certificate pêk a ni.

Annual Member Rs. 100, Junior Member Rs. 10, Donation tlêm lua awm lo tam lua awm lo pêk theih reng a ni.

 

Posted in BCM News.

admin