MṬKP Rorel Inkhawm vawi 67-na, BCM Biak In, Electric veng, Aizawl ah neih a ni.

February 11, 2021 khan Mizoram Ṭhalai Kristian Pawl rorel vawi 67-na chu BCM Biak In, Electric Veng, Aizawl-a neih chuan ṬKP memberte’n rilru hrisel zawk kan neih theih nan MṬKP in hmalak nise tih leh Fa neih tam in zirtir kawngah MṬKP in hma la se tih an rel.

Rorel Inkhawm hi MṬKP President,  Rev C. Vanlalmuankima’n a kaihruai a.  Kumin rorel inkhawm hi Covid-19 avangin kalphung ti danglam hret in, Bial ṬKP aiawhin pakhat theuh leh MṬKP Executive Committee member ten ro an rel a, Rorel member  mi 115 an tel a ni.

Rorel hi BCM General Secretary leh FOD Director ni bawk  Rev F. Ramdinmawia’n telpuiin, a ni bakah hian Executive Secretary Aizawl Area Rev. Dr. R. Lalthanmawia leh Aizawl East Bialtu Pastor Rev Hrangaia Hmar ten an tel pui bawk.

Kumin rorel-ah hian MTKP executive tanga agenda lut 2 bakah Bial Agenda 10  lut te ngaihtuah a ni a, heng te hi rorel thu passed te chu a ni:-

1. Fa neih tam in zirtir kawngah MṬKP in hmalak nise

2. ṬKP member-te’n rilru hrisel zawk kan neih nan MṬKP-in hma la se

3. MṬKP in Dan Puitlinga innei te lawmpuina Certificate kan pek ṭhin hi Mizo ṭawng leh Sap ṭawng a print a nih theih nan MṬKP-in hma lak nise

4. Kum 2022 MṬKP Inkhawmpui pual Unit tin fehchhuah neih nise

5. Lunglei ah Ṭhalaite tan Youth Centre din tura hmalak dan kawng zawn nise.

6. Kum 2021-2022 MTKP Budget atan cheng nuai 13 pawm a ni.

MTKP Organiser-in report a tarlan  zingah – MṬKP hian Kum 2020 a ṬKP Ramthimni thawhlawm tlingkhawm chu Mission rawngbawlna atan tangkai taka hman a nih thu leh ṬKP Day thawhlawm tlingkhawm chu Mission Field-a School leh Biak In sak ṭanpuina atan pek a nih thu a tarlang.

Mizoram Ṭhalai Kristian Pawl-in a hmalakna langsar tak Voluntary Blood Donation an kalpui ṭhin a. Aizawl Area, Lunglei Area leh Lawngtlai Area ah te Blood Donation Calendar hi kalpuiin kum kalta chhung khan MṬKP hmingin Thisen Unit 1528 an pek thu te. Mizoram pumpuiah thisen pe tam lam ah pathumna dinhmun an hauh bawk ani.

Kumin 2020 chhung khan hripui leng karah MṬKP hian hmalakna langsar tak pahnih neiin;  Mizo ṭawng humhalh leh tih hmasawn kawngah hmalak a ni a. Hemi pual hian Sub-Committee te din in Booklet leh Talk Show te buatsaih a ni a. Tin, Pathianin min siam dan dik tak, Mipa leh hmeichhia nihna (Gender Identity) chungchanga inzirtirna kalpui niin, Counselling Guide Book leh film hmanga intihsiakna  buatsaih a ni bawk.

Tun dinhmun ah hian MṬKP Pastor Bial 88-ah Unit ṬKP 420 awmin, member 44,228 awmin mipa 27,292 leh hmeichhia 16,936 an ni a. Kum 2020 chhung khan Kohhran dan puitlingin tuak 436 innei in, Dante in tuak 311 innei an awm bawk a ni.

MTKP ROREL 2021 : MTKP HRUAITUTE