Martarte Ni

(March Pathian ni hnuhnung ber )

 

Thuhmahruai:

Kum 2002 –a BCM  rorêlna sâng ber, Assembly chuan,”Krista rinna avânga Martarte hriatrêngna Ni hi hman ni se” tiin thu a lo passed ta a. Assembly thurêl chu Administrative Committee chuan bawhzuiin March thlaa Pathian ni hnuhnûng ber hi kum tinin ‘Martarte Ni’ atân hman thin tawh tûrin a ti ta a ni.

Martar awmzia :

Martar awmzia chu mahni sakhaw vawn leh thurin phatsan duh loh avanga tihhlumte hi martar tih an ni. Martar tih tawngkam hi Greek tawng “martus” tih atanga lak chhawn a ni a, a awmzia chu ‘thuhretu’ (witness) tihna a ni. A tirtê-ah chuan Lal Isua tisa chan lai leh a tho leh taksa hmutu apostol-te sawina tlukah ngaih a ni. Kristiante tihduhdahna a lo awm tak fo hnuah chuan an rinna avanga harsatna leh tihduhdahna tuarchhuaktute sawi nan hman a ni ta a. An rinna avanga tihhlum hialte an lo awm tak hnuah phei chuan, rinna thihpuitute sawi nan hman a lo ni ta a ni (Oxford Dictionary of Christian Church, p. 1046). Sap tawngin ‘martyr’ tih a ni a, Mizo tawngin ‘martar’ kan ti a ni. Kristian-te chauh lo pawh sakhaw dang zuitu, an sakhaw thurin thihpui hial khawpa tuartute an awm ve tho avangin hun lo kal zelah ‘martar’ tih tawngkam hi rinna thihchilhtute sawi nan zau takin kan hmang ta ni berin a lang.

Sawrkar laka martarna:

Kristiante hi sakhaw hrang hrang zuitute zingah martar tam ber an ni hial awm e. Thuthlung Thar kohhran a lo din atanga rei lote-ah Stephana chu a chipui Juda-te tihduhdahna avangin a martar a. Christian Era (CE) 64-ah Rom lal Nero-a kut atangin Kristiante’n tihduhdahna nasa tak an tuar a. Tin, CE 96-ah Domitiana kut atangin an tuar leh a. Bible-ah hming malmana ziak ni lo mahse, Hebrai lehkhathawn ziaktu chuan Krista an rinnna avanga thingzainaa zaibun te, khandaiha sahhlum te leh tihduhdahna avanga hrehawm tuartu tam tak an awm thu a sawi a (Heb. 11:36-38). Hebrai Lehkhathawn hi CE 95 hnu lama ziak nia rin a ni. Chuti a nih chuan, heng martar-te leh tihduhdah tuartu a sawite hi heng tihduhdahna tum hnih tuartute pawh an ni thei ang.

AD 95 hnuah phei chuan Rome sawrkar lak atangin tihduhdahna hmun hrang hrangah a kahpah deuhin a thleng zui zel a. Chutiang hnuah chuan Kristiante zingah lehkhathiam leh khawtlangah pawh mi langsar tak tak, tawngka leh thuziaka Kristian thurin tantu leh thehdarhtu, sawrkar thuneitute hnenah pawh an dikna leh sawrkar pawi sawi lo sakhua a nihzia thlentu mi eng emaw zat an lo chhuak a. Heng mite hi ‘Kohhran Pa’ tih an ni a, ‘Sawipuitu’ (apologist) an ti bawk. Chutiang mi chu tihduhdahna hnuaiah mi tam tak an thi a ni. Chutiang zinga martar langsar zualte chu Justin-a (Justin Martara tia hriat tak hial) leh Polycarp-a Samurna bishop te an ni. Hei hi CE 150-160 lai vel a ni. CE 250-313 inkarah phei chuan Rome ram pum puiah tihduhdahna runpui a thleng a, Rome ram awp chhungah Kristiante tan khawii hmun mah a him lo. Hetih hun lai hian Krista rinna avanga tihduhdahna a nasat em avangin mi tam takin an rinna an phatsan hial a. CE 325-ah Rome ram awptu Constantine-a’n Kristian-te tana zalenna a han hawn meuh chuan kohhranho zinga inhnialna lian tak chu tihduhdahna hun chhunga rinna phatsantute kohhrana an lo luh leh phalsak leh phalsak loh chungchang a ni hial a ni.

Heng kan sawi tak hun (period) hnu lamah pawh hun liam kal tawh rei tawh deuh si-ah te pawh ram hrang hrangah martar-na a thleng thin tih kan hria. Communist ramahte a thleng tam zual awm e. Chungte chu kan sawi vek seng lovang.

Kristiante laka Kristian-te martarna:

Rome sawrkar hnuaia tihduhdahna a reh a, kohhran a lo zalên tak hnuah chuan kohhran chu pakhat, ‘Catholic Church’ (huapzo kohhran) chauh a la ni bawk a, a lianin thil a tithei em em a. Sawrkar pawhin tanrualpui atan an duh avangin, an ngam ngai lo a ni. Hetih hun laia kohhran kalphung leh Pathian thu an hrilhfiah dan dik ti lotute chu an chêp em em a. Kohhran leh sawrkar an tanrual avangin, kohhran thlurpui chuan a kalphung sawiseltute chu sawrkar kut hmangin nasa takin tihduhdah an ni a. Heng hun chhung hian Baptist Kohhran bul tantu nia sawi thin tam tak an martar a, Ringtu baptisma kalpui a, baptisma chang nawn leh ho ‘Anabaptist’ an tih mai, mi tam tak chuan an rinna an martar-pui a ni. Protestant kohhran rau rauah pawh Baptist kohhran-te hi martar-a thi tam ber niin rin a ni. Heng kan sawi bakah hian Kohhran hun tawng chhoh hun hrang hrangah martarna khawp hiala Kristian leh Kristian intihduhdahna a thleng fo thin a ni.

Nung chunga martar (living martyr):

Mahni duh thua martar ngawt theih a ni lo. Kan inpekna avang a nih theih laiin, Pathianin min hruaina a pawimawh. Kohhran ding tir lamah kha chuan martar thisenin Pathian kohhran a kui tiak duh pawh a ni thei e. “Martarte thisen avangin khawvelin Pathian aw a hre chiang thin,” an ti hial a ni. A hunin a zir tlat a, martar an hreh lo va, martar chu an ngaisang bawk. Tun lai pawh hian a tulna ramte pawh a la awm mek a, mi tam tak an la martar mek. Amaherawhchu, keini rawngbawlna chinah hi chuan Pathianin tul a ti kher rih lo pawh a ni thei bawk.

Engpawh ni se, ‘kan nun pawhin, kan thih pawhin, Lalpa tana nung leh thi kan nih theih nan, kan nun hi a tul ang zela Krista tana tuar ngama kan awm hian ‘nungchunga martar’ (living martyr) a nih theih a, chu chu a pawimawh ber a ni. Thih kher hi Pathian lawm zawng a ni lo va, Pathian ram zauna pawh a ni kher lo thei. Thih ngam lu pu-a Lal Isua thuhretu rinawm nih hi ‘martar-na’ a tling a, a tul a nih chuan, ‘thihphah hial khawpa rinawm’ turin i in buatsaih ang u.