MBF, Social Forum in Inthlan thuchhuah an siam

Mizoram Baptist Federation, Lawngtlai, Social Forum Committee chuan December 4, 2020-a Lai Autonomous District Council inthlan lo awm tur atan  MBF, Lawngtlai hmingin  mipuite hnenah Inthlan thuchah leh ngenna hetiang hian an siam.

MIZORAM BAPTIST FEDERATION LADC
INTHLAN THUCHAH 2020

Lairam chuan kan hma lawkah Lai Autonomous District Council (LADC) inthlanpui kan hmachhawn leh dawn ta a. Mizoram Baptist Federation chuan he inthlanpui lo awm tur hi Pathian duh dan leh Chanchin Tha nen inmawi zawnga hmachhawn turin mi zawng zawng a sawm a. Inthlanna kan hmachhawn dan turah Kohhran chuan hetiangin thuchah a siam a, Kohhran mi zawng zawngte thuawi taka zawm theuh turin kan inngen e:

1. Khua leh tui kan nih ang takin vote nei zawng zawng chuan kan aiawh roreltu tur thlannaah hian vote thlak theuh tur a ni.

2. Vote hi keini khua leh tuite chanvo a ni a, Kohhran mi, tumahin vote kan hralh tur a ni lo. Sum leh therhlo vangin emaw, candidate-te hnena thilphut neih vangin emaw vote thlak loh nise. Kohhran mite kan nih ang takin kan vote chu, chhia leh tha hriatna thiang tak hmangin, Pathian mi ruat ni ngeia kan hriatte thlan nana hman tur a ni.

3. Khawtlang, Pawlho leh Kohhran hote pawhin candidate-te hnenah thilphut neih tur a ni lo.

4. Candidate-te pawhin sum leh therhlo sem emaw, vote zawn nana mite tanpui (eg. Buh inphurhsak, hna

inthawhsak, adt.), sum leh thildang sengso zawnga damlo kan leh ruai siamte tih loh nise.

5. House to house campaign tih loh nise. Tun lai Covid-19 natna hri leng avanga fimkhur a tul mai bakah, politics thianghlim lo a hring thei bawk. Kohhran mite pawhin vote zawnga kan ina rawn leng kher turin i beisei lo vang u.

6. Election campaign-naah uchuak taka mimal inbeihna leh inchirhthehna lam tih loh tur a ni.

7. Inrikrapna leh tharum thawhna lam hawi thei thil hmangin tuman campaign loh nise.

8. Insenso hautak lo zawng leh Covid 19 hrileng laka kan him tlan theih nan inthlan campaign laiin Candidate chenna chaweiho leh party office-a punkhawm luih luihte pumpelh tum theuh nise.

9. Vote thlak chungchangah, mahni duh thu ngeia vote thlak tura kal nise. Candidate-te sensova vote thlak tura inphurh te, khawdang ami vote thlak tura inphurh khawmte tih loh nise. Ngai pawimawhte chu mahnia inbuaipui mai tura dah nise.

10. Inthlan ni-ah Polling Booth leh a chhehvelah hmawmsawm leh zuk leh hmuam tilte sem loh ni se.

A tawp berah chuan, boruak ralmuang leh felfai taka inthlanna kan neiha, ram hruaitu tura Pathian mi ruat dik takte kan thlan chhuah theih nan Kohhran hote, LADC inthlanna lo awm tur atana nitin tawngtai thin turin kan inngen e.

Tiin, Rev. DR. LH Lalpekhlua, Chairman leh Rev. R. Lalnunzira, Secretary,  Social Forum Committee, Mizoram Baptist Federation ten hming an sign a ni.

Download PDF Field:  LADC INTHLAN THUCHAH, 2020(PDF)