MBKHP Rorel vawi 71 na an tiak ta.

February 25, 2021 (Ningani)-a Mizoram Baptist Kohhran Hmeichhe Pawl (MBKHP) Rorel vawi 71-na chu Mizoram Baptist Kohhran Biak In, Zotlang North, Lunglei-a neihchuan  “Mizo hnam kan lo pun theih nân Fa neih tam inzirtirna neih ni se“, an ti.

Rorel Inkhawm hi chawhma dar 10:00 khan tan a ni a. Pi F. Lalrochami, President, MBKHP-in Rorel a kaihruai a,  Pathian hnena inkawltirna hun a hman zawhah Palai te chibaibukna neiin BKHP member 253 nikum rorel leh kum in rorel inkara ropuina rama kal tate sunna hun hman a ni a, Rev. V. Vanlalchhunga, Bialtu Pastor Zotlang Pastor Bial in member kal ta chhungte tana tawngtai sakna a nei.

Kumin hi MBKHP Hruaitu thlan kum a nih angin, FOD Director Rev. F. Ramdinmawia leh Sr.Advisers ten Inthlanna an neihpui a, kum 2021-2024 chhung atana MBKHP hruaitu atan hengte hi thlan an ni:-

Vice President         : Rbt H. Lalkimi, Sethlun
Asst. Secretary         : Pi V. Biaklawmi, Kikawn, Bazarveng Lunglei
Treasurer                   : Rbt. F. Zanguri, Venghlun, Lunglei
Fin. Secretary           : Dr. Zoramthangi, Serkawn
Sr.Adiviser                 : Upa C. Lalhmangaihzuala, Ramthar

Heng bakah hian FOD Committee-in President atan Pi Pc. Lalvohbiki  leh Senior Adviser pakhat zawk atan Upa R. Malsawma te a lo ruat sa tawh bawk a, MBKHP Organiser – Lalhmingmawii Chongthu pawh term hmang lai  mek a la ni bawk.

MBKHP Rorel 2021 thu passed langsar te chu (Minute ang diak diak a ni lo)  –

1. MBKHP te hian BCO Serkawn tanpui nân theih ang ang pêk ni se.

2. Christian Hospital Lawngtlai tihchangtlun nan theih ang anga tanpui ni se.

3. BCM Thurin inzirtîr thar leh nân MBKHP-in a tûl angin hma la rawh se.

4. Kum 2021 chhûng hian heng subject hrang hrang hmang hian Chaw nghei Tawngtaina neih ni se,
i) Covit-19 hrilêng a reh theih nân
ii) Ruihhlo ngaite leh zuartute tân
iii) Missionary-te tân.
ei ai keng khâwmin, chu chu Missionary chhawmdâwl ngai zualte chhawmdâwl nân ni se.

5. Mizo hnam kan lo pun theih nân Fa neih tam inzirtirna neih ni se.

6. Mental health leh Anxiety chungchânga inzirtîrna MBKHP-in buatsaih ni se.

Kum 2021-2022  Budget atan cheng nuai 13 pawmin, Bial Target sem fel nghal a ni bawk.

MBKHP organiser Nl. Lalhmingmawii Chongthu-in kum 2019-2020 chhunga BKHP rawngbawlna hrang hrang report a pe a. Report-in a tarlan danin,  tun dinhmun ah hian BKHP hi Pastor Bial 88-ah Unit  449 an awm a, member 31,868 an awm mek a, Report hun chhung – February 2020 – January 2021 chhungin member chatuan ram pan ta mi 253 an awm thung.

April 2020 – January 2021 chhunga Buhfaitham atanga sum hmuh hi cheng vaibelchhe 7, nuai 46, sing 9, sang 5 leh 936 (Rs.7,46,95,936) a ni a, Missionary Support April 2020 – January 2021 chhungin Rs.27,29,360/- hmuh a ni a,  Mirethei Kuttualleichham tanpuina atan Rs. 3,22,299/- sem a nih bak ah, Covid-19 Relief  atan Health Minister hnênah  Rs.50,000/- pêk a nih thu a tarlang bawk.

MBKHP Chhawmdawlna In report-a tarlan danin kum 2020 chhungin mi 123 enkawl an ni a, Thawktu mi 23 an awm.