MBKHP sum pek atangin Ventilator thar lei ta

Ventilator thar

Mizoram Baptist Kohhran Hmeichhe Pawl (MBKHP) in Christian Hospital, Serkawn, ICU a hman tur Ventilator leina atan kum hnih chhung sum an tuak chhuah hmangin German company, Maquet siam Ventilator tha tak mai, Rs. 10,64,000.00 (cheng nuai sawm singruk leh sangli) man chu chah thlen niin nimin, March 15,2019 khan a dahna hmun tur, ICU room-ah install fel a ni ta a. 

He khawl thar bun a nih hian Medical Superintendent, Upa Dr. B. Laldinliana chuan MBKHP te chungah lawmthu sawiin, Christian Hospital ICU chu hmasawn ve zelin, tunah hian ventilator 4 an nei a, cardiac monitor 2, dialysis machine 1 bakah defibrillator 1 leh syring pump leh infusion pump emgemawzat an neih ve tawh thu sawiin, ICU khum 2-a attached bakah Ventilator standby (a tulna hmuna pawh sawn theih) an lo neih belh thei ta chu lawmawm a tih thu a sawi a. Ventilator hi standby a tul chhan chu ventilator mamawh damlo ventilator hmang an awmin a function loh thut chuan damlo kha chatthla nghal mai dinhmunah an awm thin a. Tin, dialysis tih theih nghal a ICU  buatsaih hi ICU a damlo dialysis ngaite tan a tha em em a ni, dialysis ti tura hmun danga insawn a buaithlak hle a ni a ti a. BKHP te rawngbawlna hi Pathianin mal sawmin damlo tam tak tan damna a ni ngei a beisei thu a sawi bawk.

Ventilator thar with Dr. Puii, ICU Incharge, CHS

Baptist Kohhran Hmeichhe Pawl(BKHP) hian Christian Hospital alo changtlunna tur hian kawng hrang hrangin hma an la thin a. Tun hnai kum li chhung mai pawhin Naute upna khawl (Incubator) leina te, Chhul hmawr enna khawl(Colposcope) leina te leh Poor Patient Fund atan te Unit hrang hrangah fehchhuah leh thawhlawm hmang te-in sum an lo tuak tawh a, heng bakah hian ruihhlo ngai enkawlna Chhawmdawlna In, Melte-ah siamin thawktu engemawzat leh ruihhlongai 40-60 vel an enkawl reng bawk a ni. Chhawmdawlna In mai ni lovin Home hrang hrang tanpuina atan an luang chhuak pah reng bawk.

 

Ventilator thar

MBKHP-in Ventilator leina tur sum an hlan : 11.02.2019

Posted in BCM News.

admin