MELBOURNE ZIN REPORT

By Rev.F.Ramdinmawia, General Secretary, BCM.

Khawvêl pum huapa Chin Christian Inzawmkhâwm Global Chin Christian Federation (GCCF) nên hian kum 2017 March thla khan partnership agreement kan ziak a. Kan Assembly (2017) kha an hotu 2 te khan Canada leh Bangkok atangin min rawn hmanpui tawh nghe nghe kha. GCCF hian kum 2 dan zêlah General Conference an nei thîn a, kumin 2017 hian a vawi 4-na tûr ni 12 – 15 October hian Melbourne, Australia-ah neih tûr a ni. Tel ve tûra ngawrh taka min sâwmna chu Administrative Committee chuan ngai pawimawhin BCM President, Rev.H.Lianngaia nên kal tûrin min ruat a. Hrisêlna chak lo tak chungin kan zu kal ve hrâm a, report tawi ka han ziak a ni

October ni 10-ah Kolkata kan pan a, zân riak lovin nilai zing dâr 2-ah Thai Airways-in kan thlâwk chhuak ta a, dârkâr 2 vêl Bangkok-a kan chawlh hnuah Melbourne, Australia panin kan thlâwk chhuak leh ta a. Dârkâr 8 chuang zet kan thlawh hnu chuan Melbourne khawpui chu kan thleng ta. An ram sonaah chuan zân dâr 9 a ni.

October 12, Ningani tûkah Victoria Mizo Kohhran Hruaitu pahnih, Pu Lalhmingmawia leh Pu F.Lalnunsiama (Valtea) ten min rawn tlawh nghâl a, Victoria Mizo Kohhran chuan Immanuel Restaurant-ah Chaw (Lunch) tui tak min eipui a, kan kal chhan GCCF lamah kan tel vena tûr programme a la awm loh avângin nilêngin Melbourne khawpuiah chuan min lênpui nghâl ta a. GCCF Conference thlengtu ber Victoria Chin Baptist Church Pastor Japheth Liana’n an In lamah zanriah eiah min sâwm a. Berâm sa hem hmin, tui zet mai chu Buh tel lovin kan ei teuh mai. Australia kal ve mana Berâm sa han ei chu a inhmeh kher mai.

October 13, Zirtâwpni chuan Global Interaction Australia (GIA) Mission Director Pi Heather-i hmu tûrin kan chhuak leh ta a, ani nên hian dârkâr 2 vêl zet inkawmhona hun kan nei a. Kan thawhhona kawnga tûl hrang hrang kan sawiho thei a. chawhnu lam hun thâwl deuh kan neih kârah kan Mizo unaute khan min lênkualpui leh zuai a, zanriah ei a lo hun chuan Pi Lalthangpuii w/o Pu Lalhmingmawia chuan Mizo hrawk mil zaih tur lo buatsaihin kan tlai leh kher mai.

October 14, Inrinni chu GCCF programme-in kan nilêng thak a. Conference hmanna hmun tûra an ruat lâwk deuh Victoria Chin Baptist Church (VCBC) Biak In chu an la sak peih loh deuh avângin Salvation Army Biak In, 305 Manchester Rd, Mooroolbark, Vic 3138 hmunah nilêngin Conference hun chu kan hmang ta a. Zanriah erawh chu Victoria Chin Baptist Church Hall lian leh ropui taka sak mêk, mi 1000 lennaah kan eiho thung a. He zanriah hi Melbourne khawpuia chêng, Chin chhûngkaw pakhat buatsaih a ni.

October 15, Sunday chawhma Inkhâwm chu Kohhran hrang hrangah insem darhin hun kan hmang a. Kan President leh Bangladesh palai nên Victoria Mizo Kohhranah kan Inkhâwm a, an phârin mi an lo lâwm thiam hle mai. An Pastor Rev. Gospel Hrilvêlthanga thlahna inkhâwm a lo ni a, Bâwng an lo talhin sa dang dangte pawh an lo siam a, tlai takin kan ei. Rev. Gospel Hrilvêlthanga hi Tasmania-a Sâp Kohhran 2-in an Pastor atân an sâwm a, chuta a kal dâwn avânga thlah an ni. Mizo Pastor, Sâp Kohhranin an Pastor atâna an sâwm hi a chhuanawm khawp mai.

October 16, Thawhtan chawhma lamah Pastor Japheta’n Grêp huan leh Wine siamna hmun te min tlawhpui a; chawhnu lamah chuan kan Mizo thiante bawk khan kan ram lama kan hmuh phâk loh, Tuifinriat kam (Beach)-ah te min lênpui a, kan mit a tlai khawp mai. Zanriah erawh chu Victoria Mizo Kohhran Secretary Pu Sema te chhûngin Berâm sa hemhmin ngatin min hrai puar leh hle. Duhsakna kan dawng sêng lo a ni ber e, an fakawm hle.

GCCF Conference chhûnga Pathian biak Inkhâwm awm chhun leh pui ber, Sunday zânah chuan kan President Rev.H.Lianngaia chu Speaker atâna ruat niin, “Unity In Christ & Witnessing”, thupuia hmangin Thuchah ropui tak a sawi a, an ngaithla kham lo hle. BCM kan vânnei hle-ah kan ngai.

GCCF 4th Conference nghahna hmun hi khawvêl ram dang atangin a hla deuh bawk a, palai kal an tha vak lo. Hetiang hi palai kal dân a ni:-

Myanmar = 40. Bangladesh = 1. Europe = 2. America = 5. Canada = 2. Mizoram = 3 Singapore = 1. Australia = 60. Total = 116 kan ni.

GCCF Conference thlengtu Victoria Chin Baptist Church (VCBC) hi member 900 vêl an ni a, an Biak In an la sa lova, an Biak In tûr kawtah Hall an sa a, an Hall pawh hi a lian khawp mai. BCM Biak In lian ber tûr BCM Venglai, Lunglei hi an Hall chhûngah chuan pahnih a leng thuak awm e. Melbourne khawpui chhûnga Biak In lian ber an sa dâwn a ni. An fakawmin an chhuanawm khawp mai.

Australia-a Chin unaute leh Ramdang mite hi kum 4 an awm tawh chuan Khua leh tui nihna (Citizenship) an pe thei zêl a, an pêk hma pawhin hna thawh tûr an hmai lo hle bawk. Mahni In nei an tam tawh a. Mizo tawng hmang, inti Mizo zual ho khu mi 150 vêl an awm a, Kohhran 2-ah an inthen a. Melbourne Mizo Church leh Victoria Mizo Kohhran an ni. Tawngtaipui an ngaihna an sawi chu (1). Kristiannaa nghehna nun an neih theih nân. (2). Mizo tawng leh Mizo zia, thangthar ten an bosal loh nân. (3). Mizoho inpumkhatna tha an neih zêl theih nân. (4). Pastor tha tak an neih theih nân. (5). Hna thawh tur tha an hmuh zêl theih nân. Ni e, i tawngtaipui zêl ang u.

Melbourne khawpui hi kum 2017 hian khawvêla khawpui chênna tlâk ber (The most livable city in the world)-a thlan a ni a. Hei hi a zâwna vawi 7 thlanna a ni tawh. A râlmuang a, Dân leh Hrai an zâwm tha a, Sorkârin mi tin te a enkawl tha êm êm a. Mahse Mingoho zîngah khuan za zêla sawmli pathum (43%) te khuan “Pathian ka mamawh lo, engkim ka nei” zu ti tawh a! Khawpui nuam e ti lo chuan Pathian tak hriatlohna leh kalsanna thlarau fahrah takin a dawlh mêk lawi si. Khu khawpuiah khuan kan unaute khuan Missionary hna thawk an ni tih an inhriat reng theih nân pawh i tawngtaipui thîn ang u. Tichuan “Dam takin lo awm rawh u”, tiin October17, Thawhlehni zîng dâr 11:30 khan kan ram panin kan rawn hawsan leh ta a ni.

President nên Kolkata atanga inthenin President chuan BCM Kahrawt, Champhai Silver Jubilee leh Biak In hawn hmanpui tûrin Champhai lam a pan nghâl a, kei erawh chuan Oct 19 khan Bhutan Field pan thlain, Jaigaon-a Bhutan Field tâna kan building sak hawnna leh Pathian hnêna hlanna Oct 20 khan ka zu nei a ni. October 20 chawhnu lamah West Bengal Field Conference cum Baptist Church of North Bengal (BCNB) Silver Jubilee-a Speaker tûrin Birpara ka pan nghâl a. Inkhâwmpui programme hlawhtling tak kan nei thei a, a lâwmawm hle.

He Inkhâwmpui hi mi 700 zetin a hmuna riah chilhin an hmang a, kan Missionary te leh an chhûngte pawh he inkhâwmpuiah hian an rawn tel tha hle. Anni ho nêna inkawmhona leh rawngbâwlna chungchâng sawihona hun tha tak te pawh kan nei thei a, lâwmawm ka ti hle. October 23 (Thawhtan) zân khan Shillong-ah rawn riak chhovin Shillong Mizo kohhran hovin zanriah te min lo buatsaihsak a, chaw ei kham dâr 8 vêlah Shillong-a kan Biak In hmun lei thar pawh kohhran hruaitute nên kan en a, Biak In tûr pawh a ban khurte lo lai tanin hma an lo la tan a, an in lungrualin an phûr hle. October 24-ah Aizawl (AICS)-ah lo riak chhovin October 25 khan Board of Theological Education Committee nilêngin kan nei a. Tichuan October 26-ah Pathianin Serkawn min lo hruai thleng ve leh ta a ni.

Pathian leh a Kohhranhote duhsakna avânga kan hmuh phâk loh ram kan hmu te leh min tawngtaipui rengna avângin Pathian hmingin Kohhranhote chungah lâwm thu kan sawi tak zet a ni. BCM hi khawvêl huapin Lalpa’n rawng min bâwl tîr hi a van lâwmawm êm.