Mission Board Meeting neih a ni.

October 20 & 21, 2020 khan Mizoram Baptist Kohhran, Mission Board Meeting, Sap Upa leh Pu Buanga Hall, Serkawn-ah neih a  ni a. Meeting hi   President Rev. Dr. K. Lalrinthanga’n a kaihruai a. Rev Dr.C.Vanlaldika, AGS i/c Mission-in kumin chhung Mission rawngbawlna report tlangpui a pe.

Tun tum Board Meeting ah hian Pastor Bial, Mission Field Committee hrang hrang leh Mission Department atanga thu ngaihtuah tura lut engemaw zat  chhawpchhuah a ni a.

Thu ngaihtuah langsar zing ah, Missionary Furlough deputation programme dilna te, Upper Subansiri Baptist Association ten thawhho puia an sawmna thu te, Missionary Post hawn dilna te, DLBC Arunachal nena Memorandum of Understanding ziak thar dilna te, Non-Mizo Mission inkaihhruaina siam chungchang te, Missionary Training Manual siam thu te a tel a ni. Heng bakah hian kum 2021-2022 atana Mission Department Plan leh Budget te thlirin, Budget kaihhnawih agenda engemawzat an thlir tel  a ni bawk.

Associate General Secretary- Mission report-in a tarlan danin BCM hnuaiah hian Mission Field leh Station 21 a awm mek a, kumin, 2020 January – September chhung khan ring thar 1601 neiin, Kohhran thar 10 din a ni bawk. Tunhnaia Mission Field hrang hranga Mission School te Matric result chhuak-ah Zirlai 460 exam neiin 342-in hlawhtlinna an chang a, a pumpui a pass percentage chu 74.35 a ni.

BCM Mission Department hnuaiah hian High School 16 an awm mek a ni. Kumin chungin Missionary AICS-a training chhuak mi 10 te appointment pe-in July 7 khan tirh chhuah an nih thu te, 11th Pay Commission-in Temporary Post tih bo a rawt, Assembly-in a pawm tak avangin Mission Department-a Temporary Post a awm te Substantive Post ah hlankai vek an nih tawh thu te a tarlang bawk.