Mission Committee in Odhisa Field thar hawn remti

Mission Committee Meeting

Mizoram Baptist Kohhran, Assembly Committee zing ami, Mission Committee November 19 khan Sap Upa leh Pu Buanga Hall, Serkawn-ah an thu khawn.  Mission Committee Meeting hi BCM President, Rev. Pc Liandual’n a kaihruai a, AGS i/c Mission Rev. Dr. C. Vanlaldika’n Mission Report tlangpui a pe bawk.

He Meeting-ah hian agenda langsar tak tak zingah Assembly 2019-in Mission Field thar hawn ni se ti-a thu a dah bawhzuina Odhisa Field Survey report thlirho a ni a, Odhisa-ah hian remchang hmasa berah  Field thar hawn remtih a ni a, hei hi Assembly-ah report ni se an ti. BCM-in Mission rawngbawlnaa a thawhpui – Adi Baptist Union nen kum 5 dang thawhhona thuthlung ziak belh leh remtih a ni a, Global Interaction (GIA, Australia) te nena thawhhona thuthlung pawh kum thum atan pawhsei remtih a ni bawk. Baptist Church of North India Mission Field kan neih mekah hian India rama state lian pui pui 5 lai cover a ni a, kar hla tak taka ringtute inhlawmkhawm nan Baptist Church of North India din nnise tia thu lut chu ngun taka ngaihtuah a nih hnuah la zirchian nise tih  a ni thung. Mission Department hnuaia Contract Post-a thawk mi 156 te rawih chhunzawm thu leh Contract Post thar 11 hawn dilna te ngaihtuahin Finance Committee-ah thlen chhoh remtih a tih a ni a, Kum 2020-2021 Mission Plan leh Budget pawh pawmin Finance Committee-ah thlen chhoh tur a ni ang.

AGS Mission  Report-in a tarlan danin January – September 2019 chhungin Mission Field hrang hrang-ah ringthar  2239-in Baptistma an chang a, Kohhran thar 15 din a ni a, heng bakah hian October thla chhung khan ringthar 46 in baptisma an chang leh bawk. Report hun chhungin Missionary Furloug Deputation Programme mi 14-in an hman zawh tawh thu leh tunah hian missionary paruk-in Fulogh Deputation Programme an hman mek thu a tarlang bawk. Mission School Evaluation kalpui mek a ni a, Evaluation hi Mission Coordinator Rev. R. Lalthangliana leh BCM Education Department Diretor Rev. L. Vanlalsanga ten an nei a, a thawh hnihna an zawh fel tawh bawk ni.

Posted in BCM News.

admin