Mission Field lam thuthar

Ring thar:

South Tripura, Sachirampara area chhûng Fellowship neihna TRPC Colony-ah chuan Mi pali in Lal Isua hnungzuitu ni turin May 28, 2018, zing dar 9 khan Baptisma an chang a, Chhûngkaw khat Putar leh a fate nupa leh tlangval pakhat an ni. An milem pathian biakna atâna an lo serh hran ve hmun pawh Bawngtuthlawha laiin an tichhe vek bawk a ni. Rinawm taka Lal Isua hnung an zui theihna atan i tawngtaipui ang u. Tin, hemi area chhûng tho khaw pakhat Nasoidopara-ah chuan chhûngkaw pakhata an fapa tlangval chu, a natna hriat mai theih lohvin a dam tha thei rêng rêng lo mai a. An thinlungah Pathianin hna a thawk a ni ang, “Kristian kan nih chuan kan fapa hi a dam kan beisei” an ti a, chuvâng chuan June 4, 2018 khan chumite chhûng chu Baptisma chantir tûrin an inbuatsaih  a ni. An milem biak thin te, milem biakna hmanrua chi hrang hrang te pawh paihbo vek tûrin an inbuatsaih a ni.

March 11, 2018 khan Arnachandrapara(South Tripura) khua ringthar mi 2 leh Kristian chhungkua ațangin mi 4, Baptisma an chang a, mipa 2 leh hmeichhia 4 an ni. Tin, January thla khan nikhatah mi 60 zetin baptistma an lo chang tawh bawk. Tripura-ah hian ringthar an pung nasa hle a ni.

Assam Field-ah Baptisma chang thar

Assam Field Dhubri-ah May 27,2018 khan mi 9 in Baptisma an chang a, an zinga 6 te hi ringthar an ni. Pathian hnenah lawmthu sawi zel ang u.

Gamagur, Tripura-ah Camping hlawhtling

Lunglawn East kohhran member 8 te Gamagur, Tripura-ah Camping neihpui turin May 3-13 chhûngin an kal a. Camping hi tum thum an nei a, Camper zawng zawng hi mi 124 an ni a, Kohhran member, khaw chhûnga awm atanga chhûtin Camp lût hi 91% lût ang an ni. Camp an neih dân hi ‘Lâng Camp’ a ni a, zan lamah chuan vântlâng a duh apiang an inkhawm thîn a, Biak In hi an khat deuh vek zêl a ni. Molsom hnamte zingah Mizo tawng hre thiam hi a tam zâwk ni mahsela, hre thiam kim lo mi engemaw zât an awm avângin tawng hi Missionary ten an let zêl a ni. 

Yakhili Academy-ah Work Camp

May ni 18-25,2018 chhung khan TKP Moria Unit, Rahsiveng te chuan Yakhili Academy, Khumulung, Tripura-ah Work Camp an nei. Electric Wiring leh Dining Table siam hna an thawk a, mi 15 lai an fehchhuak a ni.

Posted in BCM News.

admin