Mission News

Rev. Dr.C.Vanlaldika, AGS

Bial huap Mission Seminar & consultation, Thenzawlah neih a ni.

#Thenzawl Pastor bial chuan AGS Mission Rev. Dr. C. Vanlaldika leh Mission Promoter Upa HL Liantluanga te Speaker & Resource Person-a  hmangin BCM Thenzawl-ah Mission Seminar & consultation an nei dawn a. Zirtawp zanah Vantlang Inkhawm neiin Inrinni nilengin Mission Seminar neih a ni ang.

Mission rawngbawlna lama hmasawn dan tur leh BCM hmalakna hrang hrang te sawihovin, zawhna leh chhanna te an neiin, Pathianni ah pawh Mission lam hawiin programme an hman chhunzawm ang.

Thenzawl Pastor Bialah hian Kohhran pasarih an awm a, member sang hnih chuang zet an awm a ni.

Mission Field tlawhin an feh chhuak:

#Aizawl City Church member 16 te chu Madhya Pradesh & Maharastra Field (Kurku Field) tlawhin an thang mek a, Thawhtanni, November 11 khan Aizawl an chhuah san a, Tun Pathianni, November 17 thleng chamin Thawhtan-ah an lo haw leh ang.

MP & MH Field (Kurku Field kan tih thin) hi kum 1979-ah hawn tan niin, Dharni-ah Mission station dah a ni a. Field Director-in a enkawl a ni. Korku hnam zingah rawngbawlin Naupang rethei tak tak, School kalna tur pawh nei lo leh awmna mumal pawh nei lo te huikhawmin Hostel siam sakin Zirna pek an ni a. helai Field-ah hian Kristian 2000 an la tling lo deuh a, Kohhran 7 lai din a ni tawh a ni. BCM Missionary chhungkaw 2 thawk-in BCM chawm, a ram mi 7 te nen rawng an bawl mek a ni.

 

#BCM Shalom Mission Vengthlang member 8 te pawh November ni 11-21 chhung hian Jharkhan Field tlawhin an fehchhuak bawk a, Jharkhand Field- BCM Mission hmalakna te enin, Kohhran hrang hrang an tlawh bakah, a tul angin tanpuinate an hlan a ni.  November 21 hian  Aizawl lo thleng leh tura beisei an ni.

Jharkhand Field hi kum 2014-ah hawn a ni a, tunah hian BCM Missionary 5 awmin a rami thawktu 41 te nen Kohhran an enkawl a ni. Tun dinhmunah Jharkhanaad Field-a BCM thawhna areaah hian Kohhran 31 an awm a, Kohhran member zawng zawng hi 1500 vel an ni. kumin chhungin baptisma chang 71 an nei tawh a ni.

#Work Camp

BCM Electric Veng, Lawngtlai  Mission Committee leh ṬKP te Arunachal East Field, Tirban leh Basar hmunah Work Camp an nei

BCM Electric Veng, Lawngtlai Mission Committee leh ṬKP ṭangkawpin Arunachal East Field, Tirban leh Basar hmunah Work Camp neiin Biak In sak, Electric Wiring, Biak In rawng hnawih, Quarters renovation te an thawk mek a ni.

He work camp hun hmang tur hian November 11 (Thawhtanni) zing khan Arunalachal lam panin an chhuak a, Nilaini-ah Work Camp-na hmun tur Tirbin leh Basar thleng thlain, hna an thawk ṭan nghal a ni. He Work Camp tur hian Cement mistiri 2, Thing mistiri 2, Rawng mistiri 2, Electrician 1 leh helper 11, an vaiin mi 18 an kal a ni.

Ruahman lawk ang chuan November 22-ah an hna thawk zovin, a tuk, November 23, Inrinni-a lo haw chho thei tura ruahman a ni.

Posted in BCM News.

admin