MISSION NEWS

Mission Field Work Camp:

Kan hriat theih chinah tunkar chhung hian Pastor bial leh Tualchhung Kohhran hrang hrang ten Mission Field-ah work Camp hetiang hian an nei mek.

#BCM Thenzawl Pastor Bial Mission Committee in a lo ruahman angin, March, 13-15 hian Ramchhung Mission, Chakma Baptist Church Area-a Borkholok khuaah missionary Nl. PC. Lalramngheti quarters repair hna work camp in an thawk ang, mi 18 an kal. A theih angin rawngbawlna an nei nghal ang.

Work Camp kalte hian Thenzawl Pastor Bial chhunga BCM Kohhran 6 aṭangin thawmhnaw hak hlui an khawn khawm bag 25 vel lai hmun hrang hranga sem turin an keng tel nghal a, hei bakah hian BKHP Thenzawl Pastor Bial te chuan eng mah chuh hman lova an chenna in kang ral ta Pu Amit Tong, Manibapsora khuaa Chakma Baptist Kohhran chairman te ṭanpui nan ₹ 5,000 an pek leh Thenzawl Pastor Bial Mission Committee in thawmhnaw ṭhahnem tak an pek chu an keng tel nghal bawk ..

#TKP Lawngtlai North Pastor Bial member 21 te pawh Betbonia-a Baptist Mission School ah Work Camp an nei mek a. March 11 khan Lawngtlai an chhuahsan a, Pathianni cham in Thawhtan-ah an haw leh ang.

 

#Hnahthial South Bial Mssion Committee bultumin a Borapansuri a thawktu Quarters sa turin  mi 14 te pawh March 10 (Thawhlehni) khan Borapansuri an thleng a, Nilaini atanga Zirtawpni thleng Quarters sak hna an thawk a ni.

 

#Zotlang(Lunglei) Pastor Bial Mission Committee hmalakna in tunkar thawhlehni atang khan mi 12 thawk chhuakin New Vuak Mual, Chakma Baptist Kohhran Biak in sak hna thawkin Work camp an nei. Work camp kalte hi an thawkrimin an hma lakna a chak hle bawk a ni.

 

Thingfal bial-in Mission Convention an nei mek: 

March Ni 13 atanga ni 15 chhung hian Thingfal bial chuan Upa HL Liantluanga, Mission Promoter Speakera hmangin Mamte Kohhranah Mission Convention an nei a. Speaker hi Missionary pahnih – Pu LH Ngurchhawna leh Pu V. Dokhuma ten an tawiawm bakah Nl. B. Lawmsangzuali’n zaia rawngbawlna nei in a tawiawm bawk.

 

BBC Thalai ten Inkhawmpui an nei mek:

March 13-15, 2020 chhung hian Bru Baptist Church Thalai Pawl (CKJD) inkhawmpui chu Chawngtelui, Lawngtlai dist. ah neih a ni a. Speakers atan Rev. Zodinsanga (Executive Secretary, Bru Baptist Church) leh NL.C Zodinmawii (missionary) te an hmang.

 

Mission Outreach programme hman mek a ni:

March 11, 2020-a chhuakin  Chakma Mission chhûnga Chakma khua, Mandirasora-ah BBS Staff leh CBC Office Staff-te’n tun Sunday March ni 15 thleng hian outreach programme  an hmang mek a. Mandirasora hi Chawngte leh Longpuighat inkâra khaw pakhat a ni a, mihring 500 vêl awmin, eng Kohhran mah a la din lohna khua a ni.

He lai tlâng dungah hian Chakma khaw pangngai tak tak, Ulusuri (mihring 500 awmna), Borkolok (mihring 550 awmna), Ajasora-I (mihring 850 awmna), Ajasora-II (mihring 660 awmna) & Ajasora-III (mihring 360 awmna) a awm a. Hêng khuahte hian Kohhran a la ding lo vek a ni. Ajasora – I-ah hian CBC House Fellowship (Kristian member 12) awmna kan nei a. Enkawltu missionary kan la nei lo thung.

Mandirasora outreach programme-ah hian thawktu leh Kristian member engemawzat kal in hun an hmang mek a ni.