Mission rawngbawlna – BUHFAITHAM hmangin

– H. Lalkimi

Mizoramah Chanchin Tha a lo luh atangin kum 124 lai a lo ni ta. Pioner Missionary-ten thlaraubo hmangaihna leh chhanchhuahna hna an thawh chuan rah tha tak a chhuah a. Kum reilo te chhûngin Mizoram chu Kristian ram a lo ni ta mai a, a va lâwmawm êm! Pathian Ram a lo zau zêlna tûra thawhna kawngah pawh hma kan sâwn chak hle a, chuta kan hmanraw pawimawh leh tangkai tak chu Buhfaithâm hi a ni. Buhfaithâm atanga sum hmuhte chu Mizoram Baptist Kohhran chuan Ramthim (Mission) rawngbâwlna atân a serh hrang a, Mission sum hnâr pawimawh tak a ni. Kohhrante hriat thar fo atâna pawimawh chu Mission rawngbâwlna hmanrua tangkai tak Buhfaithâm hi chhûngkuaa tih theih a ni tih hi a ni. Naupang atanga upa ber thlenga kan thawh theih a ni a, buhfaithâm kaltlangin thlaraubo kan man ve a lo nih chu. Vawiin Buhfaithâm Pathianni-ah hian he rawngbâwlna pawimawh tak hi i ngaihtuah thar leh ang u.

Hmu chhuaktu: Tûn hma atanga kan lo hriat bel hmasak tawh leh kan lo sawi fo tawh chu Khasi Nu hi a ni a. Pathian ram tâna thawh hlâwkna tur a ngaihtuahnaah buhfaithâm thu hi ti hian hriattîrin a awm a, “Chaw chhum apiangin buhfai vei khat lek lekin dah ila, hetianga kristian zawng zawngin kan tih chuan nasa takin hna a thawk thei ang” tiin hma a la ta nghâl a. A lo tha hle a, Pathian pawhin mal a sâwm zêl a ni.

A darh zau zêl: Mizoram kristiante chuan kan han hmang ve ta a, thahnemngaihna avânga hmalâk dân duhthawh thu ngaihmawhna tih loh chu sawisêl a awm tlêm hlein a lang. Mission rawngbâwlna tangkai tak a nih avâng hian kan thlauhthla phal tawh lo a ni ber. Tûn hma chuan pa pâwl kan tihten (ka awmna lamah chuan) an hre thiam lova, an sawisêl deuh thîn a. Tûnah (2018) hi chuan buhfaithâm hi an practice ve tawh a ni awm e. Hei hian rawngbâwlna tangkai tak a ni tih a lantîr a ni. Tualchhûng kohhran thenkhat chuan buhfaithâm bûr chi hnih hmangin rawngbâwlna sum tuak nân an hmang bawk.

Hetiang hian kohhran hrang hrangten Pathian ram rawngbâwl nân hmanraw tangkai takah kan hmang zêl a, Mizoramah chuan nghet takin a ding a, a darh zau zêl a ni. Hmân kum lawk khân Garo kristian hruaitu rinawm tak pakhat chuan ‘buhfaitham hi Khasi ram atanga intan ni lovin Garo-te hian kan hmang hmasa daih zâwkin a lang’ tiin a thu ziakah a târlang a. A hmasa emaw a hnuhnûng emaw pawh ni se, rawngbâwlna tangkai tak hian North East-a kristiante-ah bu a khuar nghet hle tih a chiang a ni.

Pathian khawngaihna avângin Mizoram kristiante India ram zau tak leh khawvêl hmun hrang hrangah Missionary niin rawng kan bâwl a. Buhfai tham dânte inzirtîrin tangkai takin an hmang ve zêl tih thawktu thenkhat hnên atangin kan dawng a, a lâwmawm êm êm a ni.

Hmasâwnna: Mizoram Baptist Kohhranah chuan Buhfaitham rawngbâwlna hi tûn hma lam chuan Kohhran puiin a buaipui vek a. Kum 1975 atang khan BCM Assembly chuan B.K.H.P. kutah a dah ta a. Kan Inkaihhruaina-ah khan BKHP thiltum-ah khan “Buhfaitham hi Assembly-in enkawl tûra a ruat anga enkawl”, tih a ni a. MBKHP chuan hmasâwnna tur a ngaihtuah reng a, MBKHP rorêl 2000-ah chuan ‘ BCM pum-ah a rual tlânga kal a nih theih nân buhfaithâm khawnna bu siam ni se’ a ti a. Tichuan Pathian ni tina khawn tûrin Buhfaitham khawnna bu siam a lo ni ta a. Hei hi BKHP Unit tinin hmang tangkai theuh ila a tha hle ang. Kum 2001-a MBKHP Rorêlnaah a thâma thâm ngei inzirtîr ni se tih a lo ni leh a. Chumi bawhzuiin Executive Committee chuan, “Buhfai ngei thâm ni sela, Mizoram Baptist Kohhran chhûngkaw tinin Buhfaitham bûr/bêl etc. hûn a, thâm tam lam/pêk tam duh dân chu mi mal leh Pathian inkâr ni se, a petu thinlunga a thawh dân ni se,” tiin a lo rêl ta a ni.

Buhfaitham lâkkhâwm hi BKHP kuta awm a ni a, sum tlingkhâwm chu Tualchhûng Treasurer hnênah a hma thei ang bera thehluh zêl a ni a, Tualchhûng Kohhran Target tanpuitu pawimawh tak a ni bawk. Târlan tawh angin buhfaitham khawnna bu leh a bêla bel tûr hi Mission Department-in budget-a dahin BKHP-te hman theih tûrin a buatsaih tawh thîn a, a lâwmawm takzet a ni. A khawnna bu leh a bêla bel tûr hi a mamawh tân MBKHP Organiser, Headquarter Office, Serkawn atangin a thlâwnin a lâk theih reng a, a khawnna bu hi Executive Secretary Office, Aizawl leh Lawngtlaiah lâk theih a ni bawk.

Kum 2016-a MBKHP-in thâm ngei inzirtîr thar leh ni se a tih BKHP Unit Serkawn -ten an bawhzuinaa thil thenkhat ka han târlang teh ang.

1. Chhûngkaw tinin buhfai ngei thâm ni se, pawisa chu lâk loh ni se.
2. A tîrah chuan an huphurh ang ngeiin a tling tam lo, mahse a pung zêl a, an lâwm zêl tawh zâwk.
3. Inrinni tin BKHP member 88 vêl Buhfaithâm buaipui tûrin khawih chêt an ni.
4. BKHP O.B leh Ex.Comt aiawh 2 zêlin Biak Inah a khawntute an lo nghâk thîn.
5. Member-te a hnûk hnaiin Unit-ah thawhhona leh inpumkhatna a siam.
6. Qouta hlang aiin a tui zâwk a, ei atân an duh a, leituten an in chan lo.
7. Tu leh Fate tâna tawngtai inkhâwmah leh Inrinni zânahte Buhfaithâm khawntute tân an tawngtai thîn.
8. BKHP member-te Mission rawngbâwlnaa an tel ve thei hi an lâwm êm êm thinna a ni.

Testimony: Mi tam tak hnên atangin ngaihnawm tak tak târlan tûr a awm ang a, mahni tawn ngei târlang mai ila. “Kum engemaw zât kal liam tawhah khan Mizoramah Assistant Secretary, Bial leh Unit-ah Secretary ka chelh kual ve a. Hna ka ngah ve khawp mai a. Tum khat chu Buhfaithâm khawn tûrin min ruat a, Inrinni-a ka khawn hman loh avângin Sunday tûkah khawn tûrin ka inbuatsaih a. Fûr lai a ni a, kan awmna lam thli a tam si, in chhuahsan a châkawm loh khawp mai. Peih lo taka ka kal chhuak chu ‘Kal ula, thilsiam zawng zawng hnênah chanchin tha hi hril rawh u’ tiha, KAL tih tak mai hian min rawn bêng harh zawk mai a. Kei ve mai mai he lai bial zîmtêa kal ve theia ka awm hi lâwm mai tur ka ni’ tiin zângkhai takin hun ka hmang thei ta a ni.
Buhfaithâma hmasâwnna kan neih zêl theih nân hêngte hi hria ila:-
1. Nu ber a awm lova ka hre lo tih a awm loh nân Buhfai emaw pawisa emaw a khawntute lo kal huna pêk mai theih tûrin dah thin ni se.
2. Chhûngkuaa Mission rawngbâwlnaa kan tel ve theihna hlu tak a ni.
3. Missionary-a kal chhuak ve thei lo tân thlaraubo chhanchhuahna hlu tak a ni.
4. Kan buhfai ei thin man a sân zêl avângin buhfaithama kan pêk pawh hi pung ve zêl sela.
5. Tualchhûng kohhran Assembly Target min chhâwk zângkhaitu pawimawh tak a ni.
A tlângpuiin buhfaitham-ah hian buhfai pe kan tam tawh lovin a lang a. Pawisa emaw buhfai emaw pawh ni se, Pathian ram zauna a ni tih hriaa thlen chin atanga hmasâwn zêl tum theuh ila. Vawiin thlenga he rawngbâwlnaa Lalpan min teltîr ve hi a va lâwmawm êm! tiin hmasâwn zêl tûrin i bei tlâng ang u khai. I thilpek hlu tak avângin Thlarau boten Lal Isua an hmu ta!

Kum 9 chhunga BCM-in Buhfaitham-a hma a sawn dan:

Kum Sum hmuh zat Kum hmasa aia punna
2009-2010 1,89,95,552.00
2010-2011 2,34,44,300.00 44,48,748.00
2011-2012 2,88,03,599.00 53,59,299.00
2012-2013 34,895,771.00 60,92,172.00
2013-2014 40,739,775.00 58,44,004.00
2014-2015 47,558,569.00 68,18,794.00
2015- 2016 55,483,671.00 79,25,102.00
2016- 2017 61,170,221.00 56,86,550.00
2017- 2018 66,894,786.00 57,24,565.00