Mission Report(Missionary Day Pual)

– Mission Promoter

Zofate tan Missionary hmasa ber ni tûrin Pu Buanga leh Sâp Upa-te chuan January 11, 1894 khân Mizoram leilung rawn rapin, Zoram chhungah ngei mai riahrûn an rawn rem ta a. He ni hian Sairang, Mizoram an rawn thleng a, Zofate tân ni chhinchhiah tlâk tak niin kan la hmêlhriat ngai loh Kristianna leh Isua Chanchin tha chu kan hnênah hriattîrin a lo awm ta a ni. Pathian hnathawh mak tak mai lo lang chu Pathian hmangaihna Kristaa lo lang chu Zofaten chhâng lêtin reilote chhûngin Mizote chu Lal Isua Krista hnung zuitu Kristian kan lo ni ta a ni.

Kan Pioneer Missionaryte thawhrimna avang liau liauvin India ram pum huap pawhin Kristian State awm chhun pawh kan ni hial a ni. Hemi avang hian Zofate chu khawvel hmun hrang hrangahte kan lo inzarpharh ta a ni kan ti thei bawk. Heng hi Kan ram hian Chanchin Tha chu lawm taka kan lo dawnsawnna rah a ni kan ti lo thei loving.

Tichuan vawiin Vawiin January 11, 2018 a lo thlen hian Chanchin Tha mi tin ta a nihzia chu lang zêlin Zofate chu chawikâna awmin Thing, Lung bul bia ni thîn kha Pathian Nung betu kan lo ni ta a nih hi. Chumai ni lovin mi dangte pawh hriattîr ve zêlin Mi tin ta tûr Chanchin tha pe chhuaktuah kan lo tang ve zêlte hi a ropuiin a va hlu tak êm! Kan tâna thil hlu tak tak kan missionary-ten min hnuchhiah a, kan sawi seng hauh loving le. A bik takin khua leh khua inrun a, ralti taka awm thinte kha Chanchin tha avangin hnam angin kan lo inhlâwm khâwm ta te hi thil ropui tak kan chan a ni awm e.

Zofate tâna ni chhinchhiah tlâk ‘Missionary Day’ hi kan ram Sorkâr pawhin sorkâr chhuti ni atân a puang a, a lâwmawm takzet a ni.He ni ropui takah hian zofaten Chanchin tha malsâwmna kan dawn ang la dawng ve lo sâng tam takten malsâwmna an lo dawn ve theihna tûrin mahni hmun theuhah inhlân thar ila, Hlim taka Kan Pathian chawimawina ni atân leh amah fak leh a ropuina atana inpek thar nan kohhranho ten i hmang theuh ang u.

Mizoram Baptist Kohhran chuan kan zosap missionary-te atanga kan la chhawm nun zel Chanhin Tha meichher chhit hi kan thupui ber a ni. Chumi lanchhuahna chu thawktu kan inlak danah hian a chiang ber awm e. Department anga nise Mission lamah hian thawktu kan ngah ber a ni. Chumi chuan a entir chu Mizoram Baptist Kohhran ngaih pawimawh ber chu CHANCHIN THA MI TIN TAN ti-a Motto kan neih angin Kan hna pui ber chu Chanmchin Tha hril hi a ni kan ti thei ang. Hetiang hian Mission-ah thawktu pawh kan nei a ni.

Hetiang hi kan Mission Field lama ringthar report 2017 kan neih dan a ni:

 

Sl. Field hming Ringthar Kohhran thar
A. Home Mission
1. Chakma Mission 154 2
2. Bru Mission 211 8
3. Non-MizoMission 128
B. India ram state dang
1. Tripura 1014 8
2. MP & MS 45
3. Arunachal East 342 1
4. Arunachal West 322
5. Arunachal Far East 161 4
6. Assam 208 1
7. Bengal 98 1
8. North India Mission 193 1
9. Jharkhand 163 3
10. Andaman & Nicobar Islands 18
11 Good News Mission 67 3
C. Foreign Mission
1. Nepal 133 3
2. Bhutan 13 1
3. Miria,Bangladesh 7 1
4. Thailand
5. Cambodia 7
6. Indonesia
7 Ghana
8. Akyap 24 1
TOTAL 3308 38

 

BCM hnuaia Mission worker zawng zawng zat:

1.Missionary – 993    

2. Native worker zat – 296

Total Worker – 1289.

 

Note: Ringthar Baptisma chang kan report hi a kim thei rih lova, Field Director tam zawk atangin report kimchang kan la dawng lova, kan dawn ang angin kan han tichhuak a ni e.

Posted in BCM News, Mission News.