Mission Sunday – July 07

Tunkar Pathianni, July 7, 2019 hi Mizoram Baptist Kohhran ni pawimawh, “Mission Sunday” a ni a. He ni hi kum tin, July Pathianni hmasa berah hman thin a ni. Kuminah pawh he ni pual hian Mizoram Baptist Kohhran chuan Programme siamin Kohhran tinah hun an hmang leh dawn a ni. Kumin Mission Sunday thupui chu “Nang malsawmna ni ang che”. (Genesis 12:2 (b) tih a ni ang. 

BCM Mission report hnuhnung ber,  Assembly 2019 report-in a tarlan danin BCM Mission hnuaiah thawktu (Mission Workers) 1297 an awm mek a. Tin, Ringthar report thar ber-ah January-June, 2019 chhung hian Ringthar 1076 leh Kohhran thar 7 an nei tawh bawk. BCM Mission Department hian Mission Fields 28 leh Mission Station 7 neiin,  Mizoram Chhungah– 3 (Chakma Mission, Bru Mission, Non-Mizo Mission),  Mizoram pawn, India ram chhungah – Mission Fields 10 leh Mission Station -2,  India ram pawn(Foreign)-ah – Mission Fields 4 leh Mission Station – 5 ah te an thawk a ni.

 

Mission Sunday hman tan dan:

Tuikuk-Takamte veina nasa tak Kohhrante atanga a awm avangin kum 1939 Chapchar Assembly, Thiltlang a neih chuan a ngaihtuah ta a, Tirhkoh pahnih rawih a rel thlu a. Easter Sunday zing thawhlawm pawh mission pual atan dah ni se, a ti a. Hei hi hun rei fu chu hman a ni.

Kum 1949 Assembly khan July Pathian ni hmasa ber zing thawhlawm hi Tuikuk/Takam pual a tan a lo ruat leh ta a. Hun engnge maw chen Mizoram buai avangin a khaihlak deuha, kum 1975 khan ti thar lehin he mi ni hi Missionary Sunday atan hman a lo nit a a ni. Kum 2016 Assembly chuan kan hman dan leh a hming hi inmil zawk turin, ‘Mission Sunday’ tiin a thlak ta a ni. July Pathian ni hmasa ber zing thawhlawm pawh he ni pual hian hman chhunzawm zel a nit a a ni.

 

Mizoram Baptist Mission tobul:

Mizoram Baptist kohhran hi a dintirh atangin Chanchin Tha hrilh hi a pianpui a ni kan ti thei awm e. Ringthar hmasate pawhin a tirte atangin ringlote Krista hnena hruai hi thupui berah an nei tlat a. Thlarau Thianghlimin a thuam a, Mizoram chhung chang ni lo, an chhehvel a mizo hnahthlak awm Bangla Desh leh Tripura a awmte an vei em em a ni. Ringtu hmasate zinga pastor, Rev. Zathanga pawhin Miria, Bâwm, Pâng leh Lau awmna ram a fan thu a thih hma khan a sawi thin. Kum 1918 khan Chanchin Tha hril tura inpete chuan Tripura-ah lutin kohhran nghet tak an phun a, tun thlengin Tripura hnam hrang hrang tiêng turin an pawimawh hle a ni.

Tichuan hnam dangte veina a lo lian zel a, Mizoram chhunga Tuikuk –Takam-te veina pawh a lo lian zel a, kum 1939 Chapchâr Assembly, Thiltlanga neih chuan a ngaituah ta a, chutah chuan tirhkoh pahnih rawih rel thluin Easter Sunday zing thawhlawm hi mission bik atan dah a rel nghal a. Tuikuk – Takam puala thawhlawm hmasa ber tlingkhawm hi Rs.244/- chiah a ni. Tirhkohte hlawh atan Rs.11Pm an fixed nghal bawk.

Ramthim veina a lo len zel tak avangin 11-12 July 1962-a Assembly Executive Committee chuan Ramthim Sub-Committee a din ta a. Kum 1963 June Executive Committee chuan Sub-Committee chu ding chhunzawm zel tura relin 1966 thleng a ding chho nghe nghe. Kum 1966 chuan Account pawh a hrana vawng turin a rel zui a.

Damdawi lama rawngbawlna pawh tula hriat a nih avangin June 1963 khan Rotlang (W) Tuikuk zinga thawk turin Nurse Lianzami chu tirh a ni a, 1964 khan amah thlak turin Nurse Vanlalnghaki tirh thlak leh a ni. Ramthim rawngbawlnaah hian Education, Direct Evangelism leh Medical lam hmangin thuang thuma rawngbawl a ni.

Pastor bial hrang hrang atangin Ramthim lam ngaihtuahtu bik Committee din tulzia sawi a nih avangin 17 -18 June 1966 Executive Committee chuan “Zoram Baptist Mission” (ZBM) chu a din ta a ni.

 

Related Article: Mission Rawngbawlna

Posted in Uncategorized.

admin