Mission Sunday – July 5

July ni 5, 2020 Pathianni hi Mizoram Baptist Kohhran ni pawimawh, “Mission Sunday” a ni a. He ni hi kum tin, July Pathianni hmasa berah hman thin a ni. Kumin Mission Sunday-ah hian thupui pahnih – Zinglam leh zan lam atan siam a ni a. Zing lam thupui atan chuan  “Li thuk lam pan Kohhran”. (Luka 5:4) tih a ni ang a, Zan lam thupui ah “Lo chu khawvel a ni “,(Matthaia13:38). tih a ni.

Kum dangah chuan Mission Sunday-ah hian Pathianni zing leh zan Inkhawm-ah Mission Sunday thupui hmangain Tualchung Kohhran tinah thuchah ngaihthlak thin a ni a, Pathianni chawhnu lamah Mission rawngbawlna chanchin leh hmasawn zelna atana infuih tharna atan inpawlhona te buatsaih thin a ni.  Kuminah erawh chuan Covid-19 hrileng avanga Kohhran Programme te hman theih a nih loh avangin TV lamah Mission Sunday Puala thuchah leh Mission lama Kohhran rawngbawl dan chanchin te pek chhuah a ni.

Hetiang hi Mission Sunday hman tan dan a ni. Tuikuk-Takamte veina nasa tak Kohhrante atanga a awm avangin kum 1939 Chapchar Assembly, Thiltlang a neih chuan a ngaihtuah ta a, Tirhkoh pahnih rawih a rel thlu a. Easter Sunday zing thawhlawm pawh mission pual atan dah ni se, a ti a. Hei hi hun rei fu chu hman a ni.

Kum 1949 Assembly khan July Pathian ni hmasa ber zing thawhlawm chu Tuikuk/Takam pual a tan dah ni se tiin a rel a. Hun engnge maw chen Mizoram buai avangin a khaihlak deuha, kum 1975 khan ti thar lehin he mi ni hi Missionary Sunday atan hman a lo ni ta a ni. Kum 2016 Assembly chuan kan hman dan leh a hming hi inmil zawk turin, ‘Mission Sunday’ tiin a thlak ta a ni. July Pathian ni hmasa ber zing thawhlawm pawh he ni pual hian hman chhunzawm zel a ni ta a ni.

BCM Mission report hnuhnung ber,  Assembly 2020 report-in a tarlan danin BCM Mission hnuaiah thawktu (Mission Workers) 1299 an awm mek a. Mission Fields 24 neiin,   Tunah hian Mission Field thar ‘Odhisa Field’ chu hawn tura ruahmanna kalpui mek a ni bawk.