Missionary B. Jonathana kan then ta.

Mizoram Baptist Kohhran-a Missionary thawk lai, Pu B. Jonathana,  chu Agust 14, 2021 zing dar 8:35 khan Cancer natna avangin Civil Hospital, Lunglei-ah Chatuan ram min pan san ta. Zanah tlaivarpui niin, a tuk August 15, 2021 chhun  dar 12:00 ah BCM Biak In, Salem, Lunglei-ah Vuina Inkhawm neih a ni a, Salem Thlanmual-ah ropui taka thlah liam a ni ta.

Pu B. Jonathana thihna hian Mizoram Baptist Kohhran mai bak ah hun rei tak rawng alo bawl tawhna Tripura hmuna kohhran leh ringtu te a fan chhuak nghal a, a chanchin hria apiangin an lainatin an sun takzet a a ni.  BCM chuan Thahnem ngai taka rawng a lo bawl tawhna te hre rengin a rawngbawlna avanga lawmthu sawi chungin ui leh zah takin a thlah liam ta a ni.

Biak In lama Vuina inkhawm tan hma hian chawhma dar 10:30-ah an inpui Salem Veng ah thlahna hi neih phawt  a ni a. Pro.Pastor K. Lalrammawia’n kaihruai in, Pu B.Jonathan-a chanchin chhungkaw lam aiawhin a nupui Pi Lalhmangaihzuali’n a sawi a. Midang engemawzatin Pu B. Jonathana uina thu an sawi bawk a, Kohhran leh Tualchhung Mission puala ralna thilpek hlan nghal a ni a, thlahna tawngtaina neih a nih hnu-ah Biak In lam panpui a ni.

Biak In lama Vuina Inkhawm hi chhun dar 12 ah neih a ni a, Upa B. Lalkhuma, Chairman, BCM Salem-in a kaihruai a, Upa F. Lalrinthanga leh Upa C. Lalhmingmuana ten Pathian thu chhiar-in Rev. R. Lalthangliana, Mission Director-in Pu B. Jonathana rawngbawlna chanchin a sawi a. Kohhran leh Pawl hrang hrang aiawh ten a kuang chungcah pangpar an dah a, hemi zawh hian Upa K.Lalduhawma, Secretary BCM, Salem in a lawina kohhran aiawh leh chhungkaw aiawh in Pu B.Vanlalthuama (Pu B.Jonathana nau) ten thu an sawi bawk.  Rev. Dr. C. Vanlaldika, AGS (Mission) in vuina thuchah sawiin, Rev. R. Lalbiakliana, AGS (Service) in Chhungkaw tana tawngtai sakna leh Malsawm tawngtaina-in Vuina Inkhawm hi a khar ta a ni.

 ……………………

PU B. JONATHANA CHANCHIN TLANGPUI 

A Pianna leh Seilenna:

Pu B. Jonathana hi a pa chu Rev. B. Bawlliana (L) a ni a, a nu chu Pi B. Thangchuangi  (L) a ni. Dt. 10th June 1968 ah Chawngte ‘P’ ah a piang a. an unau hi 9 ni in an te ber hian boral san tawh in an upat dan indawt in – J. Dengsanga h/o J.Lalrinawmi (L), Chawngte ‘P’, B. Lalnunmawii w/o HC Biaksanga (L) Chawngte ‘P’, Biakchhungi w/o F. Lunglawma,  Chawngte ‘P’,  Lalmuanpuii w/o M.Piangliana (L) Lungrang ‘S’,  Biakzami w/o Hrangchungnunga, Chawngte ‘P’, B. Engzuala h/o B.Sangpari, Chawngte ‘P’, B. Jonathana h/o Lalhmangaihzuali, B. Vanlalthuama h/o PC Lalhlupuii, Salem Veng, Lunglei leh B. Lalneihpuii (L) te an ni.

Mathana hi mizo naupang dangte ang bawkin naupang harhvang leh luikal vel pawh hrat ve tak thin a ni. A naupan lai hun tam zawk hi Chawngte P’ ah   a hmang. Zirna lamah pawh Primary hi Chawngte ‘L’ ah a kal a, Middle School hi Hermon Middle School Chawngte ‘P’ leh Govt’ Middle School Chawngte ‘L’ ah a kal a, High School hi  Christian H/S Serkawn ah leh  Govt H/S Chawngte ‘P’ ah te a kal bawk ani.

Chhungkaw lam:

Dt.1st Dec 1994 khan Lalhmangaihzuali Chhangte  D/o C. Zomawia, Lungleng Veng, Hnahthial nen BCM Salem, Lunglei ah Rev. Lalthlamuana’n a inneih tir a.Pathian malsawmna changin fa pahnih B.Lalramtana (kum 26)  leh  B.Lawmsangzuali (kum 23) te an nei a ni.

Missionary tura kohna:

Mathana hi Pastor fa anih angin a nu leh pa ten an hnung zuia rawngbawl rawng bawl ve ngei tur in, a piantirh hian Pastor ni turin an hlan a. A hming Jonathana tih pawh hi a pa in a phuah a ni a, Lal Saula fapa Jonathan khan a pa raldo a dopui thin angin a fapa pawh hi a rawngbawlna chhunzawmtu lo ni rawh se tiin a hming pawh hi a pa in a phuah a ni. Chutiang chuan a tet te atanga a nu leh pa kaihhruaina hnuai ah seilian in rawngbawlna-a luh a, Pastor nih ngei pawh tum in a hun a hmang chho a. Hun a lo kal zel a, Pastor ni tura kawng a zawh tak tak hma in, Missionary a kal theihna kawng in hawng a lo awm a, Pathian rawngbawl tura kal tum reng a ni bawk a, a rilru siam in, “missionary turin ka dil ang a, kohhrante kal tlanga min la ve a nih chuan Lalpa kohna a ni ang” tiin a dil ve ta a. Heta missionary tura dilna an hawn hi Boro field a thawk tura dilna a ni a, Missionary atan chuan an la ta ngei a, mahse Boro field lamah tir ta loin Chakma Mission lamah an tir ta zawk a, a dilna leh a rilruk dan chiah nilo mahse Pathian remruat zawk a ni ang e tiin lungawi takin a thawk ta ni.

Missionary Rawngbawlna Kawng a Zawh :

Kum 1989 June Ni 1 ah BCM Missionary ni turin Mission Committee in a la a. BCM Zion, Chawngte ‘L’ atanga missionary chhuak a ni a. June 10, 1989 khan Missionary tura tirhchhuah a ni. Home Missionah Chakma te zing ah Evangelist Teacher hna thawk in 1989-1990 chhung hianDevasora leh Puankhai ah te a awm a. 1990 ah BMS, Tuichawng ah dah a ni a, 1991-1992 chhung in BMS Zohmun ah a awm leh a, 1993-1994 chhung khan BMS Susilui ah awm leh in, 1995 kum hian DIET, Lunglei ah Training tura koh a nih ang in a Training a. A training zawh kum,1996 January-July  hian Chakma zing ah bawk Udalthanasora ah Evangelist Teacher in dah a ni a. Home Mission, Chakma te zinga a awm chhung hian School kalpui hleih theih lova chakma khua te pem zung zung thin an nih avang hian hmun hrang hrang ah sawn kual a ni zing hle chung pawh in phunnawi hauh lovin, an sawnna apiang ah a kal thin a ni.

Kum 1996 khan Home Mission-a Missionary thawklai engemawzat rampawn lama missionary tura tirh an ni a, chung zing ah chuan Mathana pawh hi tel ve in, 1996 July thla tawp lamah Tripura Field, Zamatia hnam zingah, Hare hmunah Evagelist ni turin tirh a ni a. 2000 ah Missionary Training Institute (MTI) ah Missionary Training tura koh a ni a, MTI-a Missionary Training hnuhnung ber te zing ah a tel a ni. Training tha taka zovin 2001 ah a awmna ngai Tripura, Hare hmunah bawk kir lehin 2002 thleng a awm a, 2003 atang hian Rio, Jamatia hnam zing ah tho awm leh in 2010 thleng a awm a ni. 2010 ah Bangphur (Jamatia) ah awm leh a, 2017 ah Jubillee Bible School, Serkawn ah Refresher Course nei in Training a nei a, training a zawh hian a hmun ngai Bangphur ah bawk let leh in hetah hian a natna avanga Mizorama Tripuri Fellowship enkawl tura an dah hma zawng 2020 thleng khan a awm a ni.

A rawngbawlna a tulna avangin  Pu Mathana hi ni 1.5.2005 khan Tripura Baptist Christian Union (TBCU) Assembly Kamlachhara hmuna neih chuan Ordained Evangelist atan a nemnghet a. Ordained Evangelist hi Mizoram lamah chuan kan hrethiam chiah lo maithei. Serh leh sang khawih thei tura nemnghehna ti i la kan hrethiam mai awm e. Ordained Evangelist niin ‘Pastor ’ hna a thawk a ni. Ordained Evangelist te hi TBCU hnuaiah hian Pastor angin an thawk thin a ni. Pu Mathana  rual hian BCM Missionary tho Pu V.Remkunga, Pu John F Zonunsanga leh Pu C.Lalnunsiamate ordained an ni bawk. An ni ho hi Tripura Field a BCM Missionary ordination dawng hmasaberte ni a hriat  an ni.Hetianga serh leh sang khawih theihna pek a nih avang hian ama kut ngeiin mi tam tak Baptisma a chantir nghe nghe a ni. Tripura a awm chhung hian Zamatia hnam zing ah rawng a bawl a, a rawngbawlna hnam te hian an ngai in an thlahlel ngawih ngawih a, hetia a thih thu an hriat hian an tuar takzet a ni.

Pu Mathana vui ni hian St.James High School, Gongrai, Chapel ah Mizoram lama vuina inkhawm neih rual chiah in Tripura Missionary te leh ringtu ten a pualin hun an hmang a. Hei mai bak ah hian rawng alo bawl rengna te Tripura Baptist Christian Union (TBCU) chuan an headquarters Office leh a hnuaia Association hrang hranga Office te chu Pu B.Jonathana sun nan August ni 16 khan Office chawlh a puang a ni.

A hun tawp lam :

A chaw lem lamah engemaw harsatna a neih deuh thin avangin Agartala lamah in entir turin an kal a. Doctor ten investigation hrang hrang an neih hnuin ni 6.Oct.2020 khan cancer a ni tih hriat chhuah a ni a. Tichuan, Mizoram lama in enkawl turin ni 19.Oct.2020 khan an chhova, Zemabawk Cancer Hospital-ah hun engemaw chen enkawl a ni a. Thachhuak leh mai tura kan beisei laiin a that chhuah leh mai loh deuh avangin Hqrs lam hotute remruatna in Mizoram (Aizawl) lama Tripuri Fellowship enkawl turin an dah ta a. A thih ni thlengin  he hna hi a chelh ta a ni. Amah hi zaia tha leh mai tura beisei a nih laiin, a natna chuan zung a lo kaih nasat deuh tawh avangin Doctor ten zai chi niin an ngai ta lo a. Kumin (2021) May thla tir lama in check up leh tura tih niin, Lunglei lamah chhungkuain an haw phei a. Hri leng karah duh anga thiltih zung zung theih a nilo deuh bawk nen, a theih ang angin Lunglei lamah te Doctor rawna inenkawl zui a ni a. Damdawi In leh In lamah theih ang anga inenkawl a ni a, August 2021 thla tir lam atang khan amah hi chau zual deuhin August ni 6, 2021 khan Civil Hospital Lunglei-ah inenkawl turin a lut leh a. Hemi hnu hian that lam pan aiin amah hi a chau zui hret hret niin a lang a, August ni 14, 2021, zan dar 8:30 khan a rawng a bawlsak Lalpa hnena chawl hlen turin min lo kalsan ta a ni.

A mizia :

Pu Mathana hi mi ti zawk zawk lo, pa zak zum leh inthlahrung, pa inkiltawih tak mai a ni a.Hetia en mai chuan pa ngawichawi leh tawngtlem,nelawm vaklo niin a hriat a. Mahse a bula khawsa tam leh hrechiang a piangin  a bula awm nuam an tiin an ngaina tlat thung. Tawng tlem viau e tilo chuan  tawngkam bungrua a ngahin thil ngaihnawm taka sawi thiam a ni.Tin, amah hi pa fiamthu duhtak a ni bawk.A bula awm a nuamin a hahdam thlak a,a hlimawm thei em em a ni.Hetiang mi a nih avang hian a thawhna hnamte pawhin an ngainain a bula awm hi nuam an ti thei hle a ni. Pathian thu sawi pawh thiam tak a ni.Pu Mathana hi rawngbawlpui nuam tak a ni tiin sawi i la, a chiang mai awm e.

Rawngbawlna lama a nuna entawn tlak na te :

Pu Mathana hi rawngbawlna lama inpe leh thahnem ngai tak mai a ni a.Hemi kawngah hian a nunah entawn tur tam tak a awm. Kan sawi vek seng lovang. A tlangpui chauh tawi te tein heti hian kan han lachhuak e;

A thawhna ram mite a hmangaih :

Pu Mathana hian a thawhna ram mite hi a hmangaih hle a. Theih ni phei se chuan a thawhna hmunah hian pension hnuah pawh in benbela awm hlen hial a duh a ni. Chuti khawp chuan a thawhnate hnam hi a hmangaih a ni. A thawhna ram mite pawh hian hei hi an hrethiamin an ngainat phah em em a ni.A thawhna ram mite a hmangaih tlat avang hian an hnena Chanchin Tha hril pawh tih takzetin a thawh phah bawk. Hei hi Missionary ten kan entawn ve a pawimawhin a tul hle a ni.

 A thawhna ram mite khawsak angin a khawsa ve :

Pu Mathana nuna entawn tlak deuh pakhat chu a ram mite anga a khawsa ve mai thei zel hi a ni. An khawsak angin a khawsa vein, an ei leh in ang ang a tawm ve zel thei.An zinga a han khawsa vel tak tak chu a rammi a nilo tih hriat harsa khawp hian a awm thei. Hei hi Missionaryte pawhin kan entawn tur leh kan zir tur pawimawh tak a ni.

A thawhna ram mi te tawng a thiam hle :

Pu Mathana hian a thawhna ram mite tawng hi a thiam hle. A rammi thenkhat chuan keini aiin kan tawng a thiam zawk an ti hial reng a ni.Hei hi rawngbawlna atan hian thil pawimawh leh tul lutuk a ni. Tawng a thiam that avang hian a thawhna hnamte nen an inkar a tihnaiin an ngainat phah bawk a ni.Tin, hmundang atanga an thawhna hmun tlawhtute tawng leh kawngah pawh harsatna a nei lo. Tawng a thiam mai a nilova, mi thusawi lehlin hi a thiam hle bawk.Upa Dr. R.Lalthangliana phei chuan, “Khawvela tawng leh thiam ber,” tiin fiamthu titakin a fak hial nghe nghe. Hetiang khawpa mi talent nei tha hi a ni.Hei hi a rawngbawlpui Missionaryte pawhin a nuna entawn tur leh zirtur pawimawh tak kan neih a ni.

 Awlsam tak leh a nihna anga khawsa thin a ni :

Pu Mathana nuna entawn tlak deuh pakhat chu awlsam taka khawsa thin (simple living) mi a nihna hi a ni.Pa zak zum leh inthlahrung tak a ni e tilo chuan a nihna ang hi a zahpui ngai lem lo. A nih ang ang hian a lang ve tawp mai thin.Nihlohna anga in lantir leh khawsak vel hi a rilruah hian a awm velo niin a lang. Mi ten engtinnge an sawi ang tih lam hi a ngaihtuah viau lem lo. A nih ang ang hian a nung ve mai thin. Hetiang mi a nihna hi a thawhna hnam ten an ngainatna chhan pakhat pawh niin a lang.

 A Bible chang ngainat leh Hla duh zawng :

Pu Mathana hian Pathian thu  Matthaia 28:18-19 leh Johana 3:16-17  te hi a duh berte zinga mi an ni a. Tin, ‘Min hruainaah chuan ka kal ang’ (KHB No.254) leh ‘Isua neih ka duh zawk’ (KHB No.261) te hi a hla duh leh ngainat bikte an ni bawk.

 

A mi thianghlimte thihna chu LALPA ngaih chuan hlu tak a ni (Sam 116:15”
 Kan rawngbawlpui duhtak leh la thlakhlelh ngawih ngawih Pu Mathanan heti maia min kalsan mai hi keini a rawngbawlpuite chuan kan tuar thiam lovin hriatthiam har kan va ti em!Pu Mathan,Tripura Fielda i hmun ruak hi tu in nge luahkhat zo ta ang le? Lalpa a in tawh khawm leh ngei beseia thlir chungin i hmabak hi theih tawp chhuahin kan lo chhunzawm zel ang. Thlamuang takin chawl tawh ang che.