Missionary Day-hmang dawn

Pioneer Missionaries to Mizoram

January 11, 2020 (Inrinni) hi Mizoram-a Missionary hmasa ber lo thlen champha phak, “Missionary Day” a ni a. He Ni hi ram pumah hman a nih theih nan Mizoram Sorkar chuan Sorkar chawlh (State Holiday) atan a hmang thin a, Kohhran hrang hrang ten awmni khamin inkhawm leh Inpawlhona/zaikhawm-in hun an hmang thin a ni. 

Mizoram Baptist Kohhran pawhin he Ni hi urhsun takin a hmang thin a. Kuminah pawh Tualchhung Kohhran tinah Programme siamin an hmang leh dawn a, Kohhran tam zawk chuan he Ni-ah hian Missionary Day lawmna ruai leh sawhchiar te buatsaihin awmni khamin hun an hmang dawn a ni.

Kumin Missionary Day-ah hian Zing lam leh zan lamah thupui hran neiin Inkhawm a ni ang a. Zing inkhawm thupui-ah  “Chanchin Tha hi kan damna a ni (Mathaia 8:8)”  tih thu hman a ni ang a, Tawngtai rual thupui siamsa hmangin Tawngtaihona neih a ni ang. Zan lam inkhawm-ah hian ‘Thu hretu ni tûra koh’ (Tirhkohte 1:8)  tih thupui hmangin thuchah ngaihtlak a ni ang.

Tawngtai rual Thupui:

1) Thawhlawm  hlanna

2)Pathianin Missionary ropui tak takte min pek avangin lawm thu sawi ila. An hnathawh ropui tak avang leh hnam damna Chanchin Tha kan neih avangin lawm thu i sawi ang u.

3)Vawiin thlenga Chanchin Tha pe chhuak ve thei dinhmuna Lalpan min la dintir ve avang pawhin lawm thu i sawi ang u.

4)BCM Member zawng zawngte thlaraubo chhandam nana thawk zel thei turin Pathian hnenah chakna i dil ang u.

5)‘Chanchin Tha mi tin tan’ tih kan Motto hi a taka nunpuia, kan damna Chanchin Tha hi hril zel thei tura thawhhona tha tak kan neih zel theih nan Pathian hnenah dil bawk ila.

6)   Mahni inhlan tharna i nei theuh bawk ang u.

……………..

Mizorama Chanchin tha lo luh dan

Sap Sipai Officer, Thomas Herbert Lewin (Thangliana) chuan 25th. December 1871 khan a nupui Dari leh a hote nen Belkhai atanga mel 6 Tuikawi khuaah Krismas hman puiin ngaihnawm takin Lal Isua pian thu hi a lo sawi tawh a. Kum sawmhnih a vei hnu 1891 khan, The Welsh Calvinistic Methodist Foreign Mission hnuaia Khasi Hills Missionary  thawk lai Rev. William Williams pawh a thawhna hmun atangin Mizoramah rawn zinin Bible milemte pawh a sem ni awma sawi a ni. Mizote chanchin a lo hriat thawi tawh avangin missionary intirh nan a tha dawn awm em? tih enthlithlai tura lo kal a ni. Thla khat chauh Mizorama awm phalna pek a ni a, a thawhna hmun panin a haw leh ta a ni.

January 11, 1894 khan kan rama Missionary hmasa ber Sap Upa leh Pu Buanga-te chuan Sairang an lo thleng a. Heta tanga chhiar tana a kum za-na, Mizoram Gospel Centenery chu Mizoram kohhran lian pahnih Baptist Kohhran, Presbyterian Church of India, Mizoram Synod leh kohhran dangte chuan lungrual takin Mizoram pum pui huapin 1994 khan an lawm a ni. He hun pawimawh takah hian Sap Upa leh Pu Buanga ten Mizo hnam tana an thawh nasat zia leh Mizo hnam tana an hnathawh hlut zia hi hun reilo te chhunga sawi sen pawh a ni lovang.

Isua Krista Chanchin Tha min hrilh a, Chhandamna kawng min kawhhmuh a, Kohhran min dinsak a. A AW B leh lehkha chhiar tur min siamsak bakah  zirna sikul min dinsakin, lehkha min zirtir bawk a. Kan taksa, rilru leh thlarau tihdamna rawngbawl hna thawkin nun dan mawi leh tha min zirtir a. Kan hnam hmasawnna lungphum phumtute an ni. Ramhuai biakna leh hlauhna lak ata Lal Isua Krista Chanchin Tha-in min chhan chhuak a, chatuana nunna min pe a. Silh leh fen mumal tak pawh la inbel nachang hre lo, saruak deuh thaw a awm thin kha an rawngbawlna avangin khawvel pum pui huapa inchei dan pangngaiin kan lo inchei ve ta a.

A, AW, B  nei lo kha India ram hmar chhak state pariat zingah ziak leh chhiar thiam tamna ber kan lo ni ta reng mai. India ram zau takah pawh a berte zinga mi kan ni ta.  Maurap in chhe te te-a khawsa thin zofate kha tunah chuan in tha tak tak mawi leh nuam tak takah kan lo khawsa  ve ta. Ei leh in tur tuihnai engmah nei ngai lo khan Sap Upa leh Pu Buangate rawngbawlna avangin ei tur tuihnai leh tha tak tak kan lo eiin kan lo in phak ve ta. Mizo mipuite chhim leh hmar, chhak leh thlanga miten tun dinhmun kan lo thleng ta hi kan zosapte vang liau liau a ni. Lalpan kan pioneer missionary Sap Upa leh Pu Buanga-te hmangin thil ropui tak min tihsak avangin Pathian hnenah  lawm thu i sawi ang u.

Kan ram sorkar, kohhran leh mipui zawng zawngte hian January 11, Missionary Day hi hlut nachang hria ila, kohhran tin ten Pathian hnena lawmthu sawia inkhawmna hun atan i hmang theuh ang u. He hun ropui leh awmze nei takah hian lam thei lam ila, a lawm nan ruai hial pawh theh thei chuan theh ila, kan missionary-te rawngbawlna avanga Lalpa fak leh chawimawi nan i hmang theuh ang u. Kan ram sorkar-in chhuti ni atan a lo puang hi a lawmawm hle a, zofate khawvela kan awm ve chhung chu tidanglam lovin hmang chhunzawm zel thei ila a va lawmawm dawn em.

Posted in BCM News.

admin