Missionary ropui, Pi R. Lalthianghlimi ropui taka thlah liam a ni.

Pi R. Lallthianghlimi Missionary pensioner chu nimin, August 8, 2018 chhuan dar 12:00 khan a rawng a bawl thin, a Lalpa hnenah a chawl ta. Hemi zan hian a chewnna In, Zobawkah tlaivarpui a ni a, nimin, August 9, 2018 khan ropui taka vui a nih hnu-ah Zobawk thlanmual-ah thlah liam a ni. Amah thlahna Inkhawm-ah hian Rev. B. Lalrinawma, Mission Coordination leh AGS i/c Mission charge latu chuan Mizoram Baptist Kohhran aiawhin thu a sawi a. Rev. Pc Lalropui, bialtu pastor-in a vui inkhawm kaihruaiin thuchah a sawi bawk. Anni bakah hian chhungkaw aiawh leh pawl hrang hrang aiawh ten thu sawiin amah sun nan pangpar an dah bawk.

 

Pi R. Lalthianghlimi hi Upa R. Pianglawma fanu niin Tahrik ni  9th January 1956 ah apiang a, amah hi naupan lai atanga piangthar a ni. A phak ang tawkin kohhrana inhmang thin a, Missionary hnathawh a duh avangin Jubilee Bible School ah a zir phawt a, Dt. 1st May 1981 ah Missionary atan lak a ni a, Tripura Field ah a thawk nghal a, Kum 1985 ah Confirm (tihngheh) a ni.  Tripura a a thawh lai hian  Halam hnam hrang hrang, Kaipeng, Molsom, Kalai etc zingah a thawk kual thin a ni.

Kum 1991 ah Teacher’s Training Institute (TTI) ah a training a, Kum 2000 ah  Missionary Training Institute (MTI), Serkawnah a training leh a, tichuan Tripura ah vek a thawh zawm leh a, Kum 2009 ah Mizoram chhung Baptist Mission School, Tuichawngah transfer a ni a, hetah hian  1st February 2018 a pension a  chhuah thlengin a thawk ta a ni.


Hetia pension a a chhuah ve leh natna-in a tlakbuak a, Ropuina ram min pan san ta mai hi kan intiam lo hle a, Mizoram Baptist Kohhran (BCM) chuan kan chan nasa hle a ni. Hetia natna a tawh lai pawh a, hmel hlim tak pu a, min lo chhawn thinte kha amahah hian a natna hian a tibuai lo tih a chiang hle a ni.
Pi R. Thinghlimi hi mihlim thei tak, a hnathawh na reng rengah mite entawn tlak tura theih tawp chhuah a thawk thin a ni. Tuichawngah pawh hian thawktute fuihtu ber a ni thin a ni, Mission enkawltute pawh a thiam ang leh a hriat ang tawkin thurawn a pe ve thin a ni.

Pi R. Thinghlimi hian a rawngbawl sak hi a hrechiang hle a, chumi tan chuan a thawk tawp thlengin fakna a hlan a ni. Hetiang mi Missionary ropui tak kan nei hi BCM chuan a ropui kan tiin kan inchhuang a, hetia min kalsan ta mai erawh hi chu kan la intiam lovin kan ui hle a ni.

A kal dawn hnaih te-a Pathian thu a sawi leh a inhlanna chu hei hi a ni:-

“Kei zawng tunah pawh hlanin ka awm tawh mek a ni, ka intihsiakna tha chu ka bei zo tawh a, ka tlansiakna kawng ka hlen tawh a, rinna chu ka vawng reng tawh a ni; tunah chuan felna lallukhum chu ka tan dahin a awm tawh, chu chu Lalpa, ngaihtuahtu fel tak chuan, chumi niah chuan  min pe dawn a ni. Kei atan zawng nun hi Krista a ni a, thih pawh hlawkna a ni”

ti chungin  duh leh hmangaih em em rawng a bawl sak thin. a LALPA hnena chawl kum khua turin Lei hrehawm a chhuah san ta a ni.

Posted in BCM News.

Leave a Reply