Missionary Sunday

(July Pathian ni hmasa ber)

Missionary Sunday hman a lo nih dan:

Kum 1949 khan July Pathian ni hmasa ber zing thawhlawm hi Tuikuk-Takam pual atan Assembly chuan a ruat a. Hun eng emaw chen a khaihlak deuhva, kum 1975 khan tithar lehin July Pathianni hmasa ber hi Missionary Sunday atan hman a lo ni ta a ni.

Zoram Baptist Mission tobul:

Mizoram Baptist kohhran hi a dintirh atangin Chanchin Tha hrilh hi a pianpui a ni kan ti thei awm e. Ringthar hmasate pawhin a tirte atangin ringlote Krista hnena hruai hi thupui berah an nei tlat a. Thlarau Thianghlimin a thuam a, Mizoram chhung chang ni lo, an chhehvel a mizo hnahthlak awm Bangla Desh leh Tripura a awmte an vei em em a ni. Ringtu hmasate zinga pastor,  Rev. Zathanga pawhin  Miria, Bâwm, Pâng leh Lau awmna ram a fan thu a thih hma khan a sawi thin. Kum 1918 khan Chanchin Tha hril tura inpete chuan Tripura-ah lutin kohhran nghet tak an phun a, tun thlengin Tripura hnam hrang hrang tiêng turin an pawimawh hle a ni.

Tichuan hnam dangte veina a lo lian zel a, Mizoram chhunga Tuikuk –Takam-te veina pawh a lo lian zel a, kum 1939 Chapchâr Assembly, Thiltlanga neih chuan a ngaituah ta a, chutah chuan tirhkoh pahnih rawih rel thluin  Easter Sunday zing thawhlawm hi mission bik atan dah a rel nghal a. Tuikuk – Takam puala thawhlawm hmasa ber tlingkhawm hi Rs.244/- chiah a ni. Tirhkohte hlawh atan Rs.11Pm an fixed nghal bawk.

Ramthim veina a lo len zel tak avangin 11-12 July 1962-a Assembly Executive Committee chuan Ramthim Sub-Committee a din ta a. Kum 1963 June Executive Committee chuan Sub-Committee chu ding chhunzawm zel tura relin 1966 thleng a ding chho nghe nghe. Kum 1966 chuan Account pawh a hrana vawng turin a rel zui a.

Damdawi lama rawngbawlna pawh tula hriat a nih avangin June 1963 khan Rotlang (W) Tuikuk zinga thawk turin Nurse Lianzami chu tirh a ni a, 1964 khan amah thlak turin Nurse Vanlalnghaki tirh thlak leh a ni.  Ramthim rawngbawlnaah hian Education, Direct Evangelism leh Medical lam hmangin thuang thuma rawngbawl a ni.

Pastor bial hrang hrang atangin Ramthim lam ngaihtuahtu bik Committee din tulzia sawi a nih avangin 17 -18 June 1966 Executive Committee chuan “Zoram Baptist Mission” (ZBM)  chu a din ta a ni.

Missionary Sunday tobul:

Kohhran Assembly rorelnain ramthim lam ngaihtuahtu bik Committee a siam hma pawh hian Pastor bial thenkhat, Phawngpui bial, Tuithumhnar bial te chuan Matupui/Kampelet te, Mire ramte bei turin an bial huapa Committee dinin thuhriltute an tir a, Ringtu siamin an bial kohhranin an harh phah hle a ni.

Kohhranhoten ramthim veina kan lo neih theih nan 1951 leh 1952 khan Tirhkoh pahnih a inkawpin kohhran hrang hrang a tlawhkual tir a, hei hian kohhran te tiharhin Ramthim veina a neihtir nasa hle a ni. Tichuan vawiin thlengin he ni hi kan lo hmang chhunzawm ta zel a ni.