Missionary thlen champha

March 8, 2017 (Nilaini) hi Mizoram Baptist Kohhran Nipawimawh, ‘Missionary Thlen Champha” a ni a.  Kumin atana thupui  thlan chhuah chu “Thiltha chanchin lawmawm thlentute ke chu a va mawi em!” (Rom 10:15)” tih a ni. Missionary thlen champha hi Pathinni a nih loh chuan Kohhran ten awmni khama hman emaw, Inkhawm Programme hranpa siama turin Assembly chuan a phut lo a,  Kumin hi Nilaini-ah a tlak avangin zan lam inkhawm-ah hemi pual Programme hmang thei Kohhran te tan thupui erawh chu siam a ni thung. 

Mizoram Baptist Kohhran hian Missionary hna lam hi a ngaipawimawh deuh deuh va, kan rama Missionary lo chhuakte ngaihhlutna pawh a nei nasa tial tial a. Kum 1968-a Assembly chuan he ni ah hian programme fel tak neia, Ramthim veina rilru Kohhran miten kan neih theih nana hman a duh ta a. Hun eng emaw ti chhung chu awmni kham programme te siama hman thin a ni. Amaherawhchu January ni 11 hi Ram pumin Missionary Day programme neia hman a ni bawk a. March ni 8 hi chu Kohhran nawlpuiin awmni khama hmang lovin, Kohhran hnathawktute chawlh atan 1989 atangin hman a lo ni ta a ni.

Mizorama Chanchintha rawn thlentu, Sap Upa leh Pu Buanga te chu 1894, January 11-ah Sairang rawn thlengin, Aizwl-ah an in beng bel a. Mizoramah kum li lai an thawh hnu in Sap ramah an kir leh a. Chumi hnu chuan Arunachal-a Abor hnam, tuna Adi hnam zingah an thawk leh a. Chuta an thawh lai chuan Baptist Missionary Society chuan Mizoram chhim lamah Missioanry tirh an duha, Sap Upa leh Pu Buanga chu tawng thiam sa an nih avangin an sawm leh a. BMS-in an sawmna chu pawmin,  kum 1903-ah Mizorama Missionary hna chhunzawm turin an lo chhuak leh ta a, 1903, March ni 8-ah Mizoram chhim lam, Tlabung an lo thleng ta a ni. Mizoram Baptist Kohhran min dinpui tûra kan Missionary-te pahnih Sâp Upa leh Pu Buangaten Tlabung an lo thlen ni hi BCM chuan ni pawimawh bîk chhinchhiah tlâkah ngaiin, he ni pawimawh tak hriat reng nân hian Kohhran Office chawlh ni atân a lo dah ta a ni. Mahni hmun theuhah he ni pawimawhna hi hriain Kohhranhoten ni bik a ni tih i vawng reng ang u.

Posted in BCM News.

Leave a Reply

Your email address will not be published. Required fields are marked *