Missionary thlen champha March 8

March 8, 2020 (Inrinni) hi Mizoram Baptist Kohhran Nipawimawh, ‘Missionary Thlen Champha” a ni a.  Kumin atana thupui  thlan chhuah chu Lungkham tur dik-Pathian ram (Matthaia 6:33)” tih a ni. Missionary thlen champha hi Pathinni a nih loh chuan Kohhran ten awmni khama hman emaw, Inkhawm Programme hranpa siama turin Assembly chuan a phut lo a.  Kumin hi Inrinni-ah a tlak avangin zan lam inkhawm-ah hemi pual Programme hmang thei Kohhran te tan thupui leh Inkhawm Programme erawh chu siam a ni thung.

 

Baptist Kohhran hian Missionary hna lam hi a ngaipawimawh deuh deuh va, kan rama Missionary lo chhuakte ngaihhlutna pawh a nei nasa tial tial a. Kum 1968-a Assembly chuan he ni ah hian programme fel tak nei a, Ramthim veina rilru Kohhran miten kan neih theih nana hman a duh ta a. Hun eng emaw ti chhung chu awmni kham programme te siama hman thin a ni. Amaherawhchu January ni 11 hi Ram pumin Missionary Day programme neia hman a ni bawk a. March ni 8 hi chu Kohhran nawlpuiin awmni khama hmang lovin, Kohhran hnathawktute chawlh atan 1989 atangin hman a lo ni ta a ni.

 

Missionary hnathawk hmasa ber Sap Upa leh Pu Buanga (Rev F.W. Savidge & Rev J.H. Lorrain)-te kha Mizoram hmar lama kum 4 zet an thawh hnuah, Abor hnam, tuna Arunachal Adi ho zinga an thawh leh hnu khan Baptist Missionary Society (BMS) tirhin Mizoram chhim lamah an lo chhuak leh a. Kum 1903 March ni 8-ah Tlabung an lo thleng a, hemi ni hi kan Kohhran Asssembly chuan ni pawimawh-ah a lo puang ta a ni.