Mizoram BMP Meet atan inbuatsaih tan

BMP Emblem

Mizoram Baptist Kohhran, Fellowship Organisations Department(FOD) Committee Meeting, April ni 30, 2019-a  neih chuan Mizoram BMP Meet vawi 3-na, February, 2020-a Thingsai, Lunglei District-a neih tûr atân  Organising Committee a din fel ta a. Anni hian he Meet atana tul leh pawimawh hrang hrang a ngaihtuah dawn a ni.  Organising Committee member a ruat chu hêngte hi an ni.1. Rev.R.Lalbiakliana, AGS i/c Service
2. Upa KMS Dawngliana, BCM Zotlang, Lunglei
3. Rev.K.Lalbiakenga, MTKP Organiser
4. Pu Lalnuntluanga, BCM Salem, Lunglei
5. Pu B.Malsawmkima, BCM Chanmari, Lunglei
6. Rev.F.Ramdinmawia, Director, FOD

Ram pum huap BMP Meet hi kum 3 danah neih thin a ni a, kum 2014 khan Lunglei Bazarveng Biak Inah nghah a ni a, kum 2017-ah Zobawk ‘S’ Pastor bial-in Zobawk Playground-ah an lo dawl tawh bawk a ni.

……………..

BMP chu engnge ni?

Baptist Mipa Pawl (BMP) hi Thingsaiah May 4, 1980 khan din tan a ni. Chutih lai chuan a hming hi sâp tawngin “Baptist Men’s Fellowship” tih a ni a, a lam a har deuh avangin 1983-ah “Baptist Mipa Pawl” tia thlak a ni. BCM Assembly 1988 chuan BMP hi Kohhran hnuaia Fellowship pakhat ni turin a lo pawm ta a, chuta tang chuan Tualchhung Kohhran hrang hrangah din phal a ni ta bawk a. Assembly chuan BMP Inkaihhruaina Dan ruahman chu a pawm nghal bawk a ni. BCM Assembly 2006 chuan BMP din  ni atan Thingsaia a din tan  hun 4 May 1980 chu BMP Day atan a pawm a, chuta tang chuan kum tinin BMP Day hi hman thin a ni ta a ni.

BCM Assembly 2011 chuan BMP chu Tualchhung Kohhran bakah Pastor Bial tina din a lo phalsak leh ta zel a, tichuan Pastor Bial tam takah din a lo ni ta zel a, a lawmawm hle. Tunah chuan hmun tam takah Bial BMP Inkhawmpui leh rorelte pawh neih thin a lo ni ta.  Bial hrang hrang atangin BMP ram pum huap inkhawmpui nei tura dilna a lo lut a.  FOD Committee chuan ngun taka a ngaihtuah hnuah, tum khat atan 2014-ah meet nei turin Central Committee-ah thlenin phalsak an ni a. Tunah chuan BMP member-te chuan thlarau leh rawngbawlna lamah hma an sawn zel a, a lawmawm em em a ni.

2018 BCm Statistics in a tarlan dani BMP member hi 15684 an awm mek a ni. Chhungkaw Pa berte an nih avangin BMP hi an pawimawh tak meuh a, kan ram leh Kohhran kalphung leh sukthlek hi kan ngaihpawimawh zawng hian kan hriat loh hlanin thui tak a hril a ni. Kan nupui fanaute hian pain thil tha leh tha lo hriaah min ngai tlat a, inkhawm kan ngaihpawimawh leh an ngaipawimawh ve mai a. Kan inthlahdah leh chuti tho. Kan pawimawh a ni tih hi i theihnghilh lovang u.

BMP Din chhan:

Baptist Mipa Pawl hian dihchhan leh thiltum mumal tak a nei a, chungte chu :-

  • Baptist mipate thlarau nun buatsaih leh tihchak.
  • Kristian chhungkaw din.
  • Kohhran tana kutke tangkai nih.
  • Khawtlang thatna tura thawh.

BMP Thuvawn.

“Kei leh ka chhungte erawh hi zawngin Lalpa rawng a nia kan bawl dawn ni”.  (Josua 24 : 15b).

Posted in BCM News.

admin