Mizoram BMP Meet atan inbuatsaihna zawh thawhkhat a ni ta.

Baptist Mipa Pawl (BMP) Intawhkhawmna BMP Meet vawi 3-na chu February 7-9, 2020 hian Thingsai Pastor Bial-in BMP din tanna khua, Thingsai-ah an thleng dawn a. A dawltu Thingsai Pastor Bial te an tangin chak taka hma lain inbuatsaihna an zo thawkhat ta. Tunah hian Pandal Feet 140 x 90 a zau, mi 3000 leng thei tura ruahman chu zo tawhin, Decoration tih mek a ni. Department hrang hrangte pawh ruahman angin chak takin hma an la mek a ni. Thingsai Pastor Bial chhunga Kohhran te leh Kohhran unau dangte pawh he BMP Meet atan hian an inhawngin an phur tlang hle a, Pandal sak hnatlang leh kawng hrang hrangin an pui thin a ni.

Thingsaia BMP Meet 2020 lo awm tur atana inbuatsaihna kal mek enpui tur leh TV-a Live-a pek chhuah dan tur ruahmanna neihpui turin FOD Director Rev. F. Ramdinmawia, General Secretary leh Pu C.Lalhmachhuana BCM Audio Visual Manager, Pu C. Lalengkiama, Production Assistant leh Pu B.Malsawmkima, LDC, FOD te chu zan khat riakin Thingsaiah an kal dawn a ni.

BMP Meet 2020 thupui atan “Isua zuitu rinawm” tih thlan a ni a, thuchah sawi turin Rev. Pc Liandula – BCM President, Rev. Dr. C. Vanlaldika – AGS Mission, Rev. R. Lalbiakliana- AGS Service.Rev. R.Lalnunzira, Executive Secretary, Lawngtlai leh Rev. Dr. R. Lalthanmawia, Executive Secretary, Aizawl te ruat an ni a,  Lalpa Zanriah(Sacrament) buatsaih turin Rev. Dr. K. Lalrinthanga, President Elect ruat a ni bawk. Heng bakah hian Zaipawl, Group zai leh Special Item hrang hranga chanvo nei turte pawh ruat fel an ni tawh a, Bible Study hruai turin Rev. Pc Lalsanglura, Thingfal Bial leh Rev. Zirsangliana Ralte, Cherhlun Bial te ruat an ni bawk.

Mizoram BMP Meet hi Kum 3 danah neih thin a ni a, a vawi khat nan kum 2014 khan Lunglei Bazarveng Biak Inah nghah a ni a, kum 2017-ah Zobawk ‘S’ Pastor bial-in Zobawk Playground-ah an lo dawl tawh bawk a ni. Kum 2020 BMP Meet hi February 7-9, 2020 ah Thingsai-ah neih a ni dawn a, Rokhawlhna dangin a tlakbuak a nih loh chuan BMP Meet Programme hi LPS leh Zonet Cable ah live-a pek chhuah tum a ni.

Baptist Mipa Pawl (BMP) hi Thingsaiah May 4, 1980 ah din a ni a. Chutih lai chuan a hming hi sâp tawngin “Baptist Men’s Fellowship” tih a ni a, a lam a har deuh avangin 1983-ah “Baptist Mipa Pawl” tia thlak a ni. 2018 BCm Statistics in a tarlan dani BMP member 15684 an awm mek a ni.

 

Posted in BCM News.

admin

Leave a Reply