Mizoram BMP Meet vawi 3-na zaninah tan dawn

BMP Meet 2020 @ Thingsai

Baptist Mipa Pawl (BMP) Mizoram pum huap intawhkhawmna (Mizoram BMP Meet) vawi 3-na chu, zanin atang hian ‘Isua zuitu rinawm’ tih thupuia hmangin Thingsai Field-ah neih a ni dawn a.  He Meet hmang tur hian Mizoram hmun hrang hrang atangin BMP member thahnem takin Thingsai an pan khawm mek. 

Zanin, February 7 (Zirtawpni) zan dar 6:30-ah Meet hawnna neiin, inkhawm hi Pu K. Zodinmawia, Secretary, Republic Pastor Bial-in a kaihruai ang a, General Secretary Rev.F. Ramdinmawia’n BMP Meet vawi 3-na hi a hawng ang a, Mizoram BMP Meet zaipawl ten Opening Song an sa ang. Rev. R. Lalnunzira, Executive Secretary, Lawngtlai Area-in ‘Isua zuitu rinawm’  tih thupui hawnna thuchah a sawi ang. Heng bakah hian Zaipawl, Group zai leh Solo engemawzat a awm dawn a ni.

Naktuk, Inrinni Chawhma Dar 10:00-12:00-ah Pathian chibaibuk inkhawm-ah Rev. Dr. R. Lalthanmawia, Executive Secretary, Aizawl Area-in ‘Isua zuitu rinawm – Nitin nunah’ tih thupui hmangin thuchah a sawi ang a. Inrinni chawhnu lamah inpawlhona awmin, Special Item hrang hrang a awm ang a, Rev. F. Ngursailova, Thingsai Bialtu Pastorin thuchah tawi a sawi bawk ang.

Inrinni zanah hian Rev. Dr. C. Vanlaldika, Associate General Secretary- Mission-in ‘Isua zuitu rinawm- Kohhranah’ tih thupui hmangin thuchah a sawi ang a, Pathianni zing Inkhawmah Rev. R. Lalbiakliana, AGS – Service in Isua zuitu rinawm – Chhungkua-ah’ tih thupui hmangin thuchah a sawi bawk ang. Pathianni Chawhnu-ah Lalpa zanriah (Sacrament) inkhawm neih a ni ang a, Rev. Dr. K. Lalrinthanga, President elect-in Lalpa Zanriah hia buatsaih ang. Pathianni zanah Rev. PC. Liandula, President -in ‘Isua zuitu rinawm- Chanchin Tha hril kawngah’ tih thupui hmangin thuchah a sawi ve thung ang a, inkhawmpui a tiak ang.

BMP Meet-ah hian Inkhawm apiangin BMP Zaipawl 5-7 an zai thin ang a, Solo leh Group zai 3-4 leh Live Band pakhat an nei ziah bawk ang. Inkhawm apiangin thawhlawm lakkhawm thin a ni ang a, chung thawhlawmte chu Kohhran dingthar, Biak In sa mek te tanpui nan hman tur a ni dawn a ni.

Kan tarlan tawh thin ang khan Mizoram BMP Meet hi Kum 3 na-ah neih thin a ni a, a vawi khat nan kum 2014 khan Lunglei Bazarveng Biak Inah nghah a ni a, kum 2017-ah Zobawk ‘S’ Pastor bial-in Zobawk Playground-ah an lo dawl tawh bawk a ni.

Baptist Mipa Pawl (BMP) hi May 4, 1980 khan Thingsaiah din a ni a. 2018 BCM Statistics in a tarlan dani BMP member 15684 an awm mek a ni.

BMP Meet Programme

 

Posted in BCM News.

admin