MTKP HRIATTIRNA

TKP kalphunga kan rorêlna sâng ber, MTKP Rorêlna February 8, 2018-a neih leh tâk thu ûm zuiin MTKP Executive Committee chuan mawhphurtu tûr mi hrang hrangte a ruat a, hma lâk dân tûr duan mêk a ni. Hêng ruahmannate hi siam peih a nih vêleh kan inhriattîr thuai ang a. Tûn atâna kan lo hriat nghâl tûr thil thenkhat a awm a, chûngte chu:-

1. MTKP Inkhâwmpui thlengtu tanpuina Rs. 20/-.
MTKP Inkhâwmpui thlengtu tanpuina member tina Rs. 10/- khawn thin Rs. 20/-a tihsân tâk chu December thla ral hma hian kumin 2018 atâna kan khawn te theh lût fel hman theuh tûrin kan inngên a. Chutiang zêlin kum tin December thla ral hmâin chumi kum atâna khawn zêl chu theh luh thin tûr a ni ang. He thurêl hi kumin atanga hman tan nghâl tûr a nih avângin Unit thenkhat kumin atâna Rs. 10/- lo inkhawn fel tawhte pawhin Rs. 10/- dang khawn belh leh mai tûrin kan inngên a. Tin, ‘member tin’ tih a nih ang takin Unit member zât atanga chhûta sum thawh khâwm tûr zât rawn tlin ngei tûra hma la tûrin ka ngên che u a ni.

2. Christian Hospital Poor Patient Fund atâna Fehchhuah.
Christian Hospital Poor Patient Fund atâna Unit tinte vawi khat fehchhuah sum hmuh theh khâwm tûr kha October 2018 ral hmâin Pastor Bial TKP kaltlangin MTKP-ah chhûn luh tûr a ni.

3. TKP Hla (Chorus) Tharte Theh darh a ni dâwn.
MTKP buatsaih TKP Hla Inphuahsiaknaa pakhatna atanga pathumna hlate chu MTKP Inkhâwmpui 2019-a mipui sak theih tûrin buatsaih mêk a ni a. A buaipui tûra ruatten hma an la zêl a, tlâng hrang hranga TKP member-ten nakkum Inkhâwmpui hmaa an lo zir thiam theih nân ruahmanna siamin theh darh a ni ang.

4. MTKP Thuzir 2018 Exam Question Office atanga Siam a ni dâwn.
Kumin MTKP Thuzir exam ni atân November 18, 2018, dâr 1:30 PM ruat a ni. Exam zawhna (question) hi MTKP-in a siam (set) ang a, Bial tinah copy 1 thawn chhuakin Bial TKP-ten in mamawh tam dân azirin in lo tipung mai dâwn a ni.

5. Blood Donation Calendar Siam a ni leh dâwn.
Tûn hnai kum eng emawti chhûnga MTKP hmalâkna pawimawh tak pakhat, a thlâwna thisen inpêk chhâwk dân tûr, Blood Donation Calendar kan siam thin chu kumin hian chhunzawm leh a ni dâwn a. Calendar lo buatsaih tûr hian Rbt. H. Lalthangliana, Vice President leh Pu V. Rokhâwlkima, Assistant Secretary te ruat an ni. Tin, hemi kawnga hma la ve leh tûrin Area TKP/Coordination Committee te leh Pastor Bial tinte ngen ni se, thisen pêk dân (unit zât) report hi kan mi ruatte hnênah khian rawn hriattîr leh vek ni se tih a ni bawk. In Bial/Unit theuhvah in theih anga lo ûm zui tûrin ka ngên a che u.

6. Flag man sân a ngai.
Tûn hnaia India sawrkârin direct tax a lâk tan Goods and Services Tax (GST) avâng hian flag siamna hmanrua chi hrang hrangte a to chho zêl a. Chuvângin TKP flag man chu, Unit flag Rs. 700/- leh Pastor Bial flag Rs. 800/- a ni tawh dâwn a ni. Unit leh Bialte tân phurrit tling tûrah kan ngai lo va; tûn hmaa kan siamna ang rate-a kan siam reng chuan amah leh amah a intum zo lo thuai dâwn a a ni.
Krista leh Kohhran tân,

Sd/-
Rev. Lianchhûnga Khiangte
Organiser
Mizoram Thalai Kristian Pâwl

Posted in BCM News.