MTKP Inkhawmpui 2019 thupui thlang fel

August 1, 2018 (Nilaini) khan Mizoram Thalai Kristian Pawl, Executive Meeting vawi 16-na Sap Upa leh Pu Buanga Hall, Serkawn ah neih a ni a. Thu pawimawh tak tak an rel  zingah – MTKP 2019, Inkhawmpui Thupui atan “Pathian Hmangaihna” tih chu an thlan a ni a, Kum 2019 TKP Ramthim Ni thupui atan “Krista Thu Hretu Rinawm” thlangin Kum 2019 TKP Day Thupui atan “Ka Chakna Lalpa” tih chu thlan a ni bawk. 

Kumin MTKP rorel an an thurel bawhzuina pakhat Career Guidance chu September thla ral hma ngeiin Booklet an siam chu zawrh chhuah theih a peih fel hman nise an ti a. Tin, Lunglei khawpui chhunga School thlanbik ah te Awarness Campaign neih nise an ti bawk. MTKP chuan Kumin World Blood Donors Day a Lunglei AVBD hnen atanga Tea Urn an dawn chu, MBKP in a enkawl Chhawmdawlna In Melte a thawktu ten tangkai zawka an hman atan pek nise an ti a.

Kum 2019, January 11 hi Mizorama Chanchin Tha lo thlen, Kum 125-na Quasquicentenial a ni a. Hemi lawmna leh tul te buaipuia hma la turin BCM Assembly chuan MTKPO kutah a dah chu bawhzui zel a ni a. Kumin October thla chhung ngei hian Mizoram a ChanchinTha lo lut dan chanchin sawihona Talk Show buatsaih nise an ti a. Lunglei khawpui chungah Quiz neih anih theihna turin hmalakna chak tak kalpui mek ani bawk a.

Tin, Thupui (topic) thlan bik pahnih zînga an duh zâwk zawk 1) “Chanchin Thain Mizo khawtlâng nun a tihdanglam dân”
2) “Mission rawngbâwlnaa Zoram Kohhrante hmabâk” hmangin Essay competition buatsaih nise tih ani a. Heng thuziak te hi Organiser, MTKP hnênah copy 4 theh luh tûr a ni. A sei zâwng chu thumal (word) 2500 atanga 3000
tûr a ni a, mi pakhatin thupui pakhat aia tam ziah lo tur ani.

Tin, Quasquicentenial  lawmna pakhat atan Hla in phuah siak buatsaih a ani bawk a. Heng Essay leh Hla phuah te hi September 30, 2018 thleng in email-in organisermtkp@mizobaptist.org ah a soft/photo copy thawn nise tih ani bawk.
Lâwmman hetian hian buatsaih a ni:-
Pakhatna Rs 10,000.00 & Citation
Pahnihna Rs 8,000.00 & Citation
Pathumna Rs 5,000.00 & Citation
Consolation prize Rs 3,000.00 & Citation (Mi pahnih tân) ani ang.

Quasquicentenial pual hian Aizawl Area TKP ten Fak Zairi buatsaih turin hmalakna an kalpui mek bawk a. Kumin kum tawp lam November 30 hian Siaha khawpui a Gospel Concert buatsaih a ni ang a. December 7 hian Kolasib ah Gospel Concert buatsaih turin hmalakna chak taka kalpui mek ani bawk.

Mizoram Thalai Kristian Pawl hmalakna lian tak pakhat Human Trafficking Film chu mipui chu hlawhtling takin Mizoram a District hrang hrang ah tichhuah a ni lo ni tawh bawk ani.
…………..

Reports: Elvist

Posted in BCM News.

admin