MTKP Inkhawmpui tan..Hruaitu thar thlang

Mizoram Thalai Kristian Pawl (MTKP) Inkhawmpui vawi 47 chu nizan khan tan a ni ta a. He inkhawmpui lian hi Tlabung, Lichengl Field-ah Sap Upa leh Pu Buanga Run-ah neih a ni. Vawiin lamah MTKP Rorel, BCM Biak In, Tlabungah neih a ni a, MTKP Hruaitu (OB) 2019-2022 atan thlan thar a ni bawk. Tarlan tawh ang khan he Inkhawmpui thupui tur chu ‘Pathian Hmangaihna” tih a ni. Nizan lamah Tlabung lam atanga report kan dawn danin mikhual 5600 -6000 vel an in report tawh a, in report lo enngemawzat an la awm ni-a thu dawn a ni. Vawiin lamah pawh Tlabung panin palai tur leh Inkhawmpui n chhim tur engngemawzat, Mizoram hmun hrang hrang atanga kal  an awm thu kan dawng bawk.

Nizan Thlenkim zan-ah inkhawm an thahnem hle a, Palai lawmna leh Inkhawmpui hawnna Inkhawm neiin  Upa Lalmuanawma Sailo-in inkhawm a kaihruai a. BCM Choir –in Theme song “Lalpa ka hmangaih che” tih hla an an sa a. Hnathial ‘S’ Pastor Bial-in Shadow mime hmuhnawm tak an entirin bawk.A dawltu Tlabung Pastor Bial TKP ten Inkhawmpui an inbuatsaih dan leh harsatna hrang hrang hmachhawn dan video clip & Live Music chawhpawlh chuan  rilru a khawih hle. Rev. Lalmuanzuala Sailo, Bialtu Pastor-in Inkhawmpui a hawngin, Zaipawl, Male Voice leh Mal zai te ngaihtlak a ni bawk. Rev. Dr. C. Vanlaldika, AGS i/c Mission-in ‘Pathian chu Hmangaihna a

ni” tih thupui hmangin thuchah ngaihnawm tak a sawi bawk.

[Sap Upa leh Pu Buanga Run]

Vawiin, February 18 (Zirtawpni) nilengin Rorelna neih a ni a. Rorel palai ni lote tan Chawhma lamin Sap Upa leh Pu Buanga Run-ah Pathian biak inklhawm neih niin chawhnu lamah Inpawlhona neih a ni thung.

Chanchin kan ziak lai hian Rorel thu passed kan hre hman lo a, MTKP hruaitu thar thlan niin, hengte hi kum 2019-2022 atana MTKP hruaitu atan thlan an ni:-

President              : Rev.C Vanlalmuankima (FOD ruat)
Vice President    : V. Rokhawlkima, Zion, Lunglei
Organiser              : Rev. K.Lalbiakenga(Pastoral Comtt. ruat)
Asst.Secretary     : K. Lalawmpuia, Chanmari, Lunglei
Treasurer              : Lalnuntluanga, Salem, Lunglei
Fin.Secy                  : Zothantluangi Khiangte, Zotlang North

Senior Advisers :
1. Upa Dr.Lalchhanhima Fanchun (FOD ruat)
2. Upa PC Vanlalrova

Vawiin Rorelna-a Rev. Lianchhunga Khiangte, Organiser, MTKP-in report-a a tarlan danin  Mizoram Thalai Kristian Pâwlah hian member 43,353 an awm a, Hmeichhia 16143 leh Mipa 27210 kan ni. Pastor Bial 85-ah Unit 420 an awm a ni.>> (See detailed Reports)

MTKP chuan in nikum 2017-2018-a chhung khan Missionary Support atan BCM Headquarters-ah Rs. 1,70,000/-  a pe a, hei bakah hian  Pastor Bial TKP 80 leh TKP Unit 271 ten BCM Headquarters-a Missionary support an chhûn luh tling khâwm chu Rs. 18,81,470/- a ni bawk. Chutichuan, kum kal ta 2017-2018 chhûnga TKP Mission Support tling khâwm chu Rs. 20,51,470/- a ni.

Kumin MTKP Inkhawmpui hi Mizporama Cable TV lian pahnih LPS (10) leh Zonet-ah te Live a pek chhuah a ni a, Youtube- Zoen Channel-ah Live Stream pek chhuah a ni bawk.

Posted in BCM News.

admin