MTKP INKHÂWMPUI TLUANG TAKIN NEIH A NI  

Mizoram Thalai Kristian Pâwl Inkhâwmpui vawi 47-na chu February 14-17, 2019 khân Tlabungah tluang takin neih a ni a. Inkhâwmpui programme tam ber hi Lichêng Muala pandal 260’x170′ zeta zau ‘Sâp Upa leh Pu Buanga Rûn’-ah hman a ni.

Pandal hi MTKP inkhâwmpui pandal-ah chuan a len ber tum niin mihring 9000 zet thut lenna a ni. Inkhâwmpui palai inziak lût (registered) hi 8652 awmin hei pawh hi palai tam ber tum nia hriat a ni. MTKP rorêlna sâng ber, a tum 65-na neih a ni bawk a, palai 497-ten inpawh takin ro an rêl a ni.

Sap Upa leh Pu Buanga Runa, Licheng Field, Tlabung

BCM huang pâwn lam pâwl 11 zet atangin palai an rawn tel a, chûngte chu: Asia Pacific Baptist Youth (APBY), Baptist Youth Fellowship India (BYFI), North East India Christian Council Youth Assembly (NEICCYA), Nagaland Baptist Church Council (NBCC) Youth, Jampui–Sakhan Thalai Kristian Pâwl (JSTKP), Baptist Church of Maruchah, Bangladesh, Central Kristian Thalai Pâwl, Evangelical Church of Maraland Krizyhpa Thyutlia Py (ECMKTP), Lairam Isua Krista Baptist Kohhran Thalai Pâwl (LIKBKTP), Central Khristian Juain Dol (CKJD) Bru Baptist Church, Kristian Boidkhallie Dawl (KBD) Chakma Baptist Church.

Inkhâwmpui thlengtu Tlabunga Kohhranhote leh khawtlâng mipui inpêkna a ropui a, inkhâwmpui an thleng hneh hle a ni. An lungrualzia mita hmutu palaite rilru a hneh hle. Mikhual an beisei zât nei lo chhûngkuaten mikhual ngah zâwkte hnênah an buhfai thleisa leh sa te thlengin an pe a. Inrinni bazârpui pawh zing dâr 8:00-ah khârin Pathianniah lên khawthawnna lawng (speedboat)-te an chawlhtîr thap bawk a. Hêng zawng zawng hi inkhâwmpui programme tluang leh hlung taka a kal nân a pawimawh hle a ni.

Inkhâwmpui thupui ‘Pathian Hmangaihna’ thu leh hlâa puanchhuah chu palai tam takin an hlâwkpui a. TV leh YouTube atanga lo entute pawhin malsâwmna an chang nasa hle a ni. Thlarau lama chakna thar chang leh piantharna chang hial te an awm thu (feedback) dawn zui a ni a. Hêng zawng zawng hi inkhâwmpui atâna Kohhranhote thahnemngai taka kan tawngtaina rah, Pathian hnathawh a ni. Lalpan ropuina chang rawh se.

 

– Organiser, MTKP

Posted in BCM News.

admin