MTKP Report (31-07-2018)

1. TKP-ten Chêng Nuai 20 chuangin Missionary Kan Châwm.
MTKP chuan kum tin hian BCM Mission Department-ah support a chhûng lût thin a, nikum 2017-2018-a a pêk zât chu ` 1,70,000/- a ni. Tin, hetih lai hian Pastor Bial 80 leh Unit 271 ten BCM Headquarters-a Missionary support an chhûn luh tling khâwm chu ` 18,81,470/- a ni bawk. Chutichuan, kum kal ta 2017-2018 chhûnga TKP Mission Support tling khâwm chu ` 20,51,470/- a ni a, TKP member pakhatin ` 45.78 zêl pe ang kan ni.

2. Pu H. Vanlalpêka Chhawmdâwl (Relief) a ni.
Pu H. Vanlalpêka, Finance Secretary, TKP Kanaan Unit, Lunglâwn Pastor Bial te chhûngkua chuan dt. 4.6.2018 (Thawhtanni) zânah khuarêl chhiatna râpthlâk tak an tâwk a, an in chu lei minin hnâwlin chhûngkaw member pathum laiin nunna an chân a, an in thar an luah luh hlim chauh pawh lei hian a min hnan ta vek a ni. Tin, an in hnuai luahtu a puzawn te chhûngkaw ruang 7 lai khaw danga phûm tûrin thawn chhuah a ni bawk. Hemi chungchângah hian Office Bearers meeting (No.20/2016-19 dated 05-06-2018) chuan MTKP hminga chhawmdâwlna pêk ve thain a hria a. Ramthim Ni thawhlâwm atangin relief ` 10,000/- pêk a ni. June 7, 2018 khân Committee member mi 10 rualte thawk chhuakin an hlân a ni.

3. Tlabung Tuilian kâra Hnatlângte Tanpuina Pêk a ni.
Tuilian avânga harsatna namên lo tâwk, nakum MTKP Inkhâwmpui thlengtu tûr, Tlabung khua chu an harsatnate hriatpuiin kan tawmpui a ni tih lantîrin chhawmdâwl hna thawktu mi tlâwmngai hnatlângte thingpui lumna tûr ` 5000/-pêin tanpui ve an ni.

4. MTKP-in Thisen Pe Chawimawina leh Lâwmman a Dawng.
Nunna chhanhim nân leh a mamawh apiangte chhawr theih tûra TKP-ten thisen a thlâwna an pêk thin chu hmun hrang hrangah chhunzawm zêl a ni a. World Blood Donor Day (June 14, 2018) denchhena Association for Voluntary Blood Donation (AVBD) Aizâwl buatsaih thisen pe chawimawina Lal Thanhawla Auditorium-a neihah Mizoram TKP chuan chawimawina a dawng. Tin, TKP Coordination Committee Aizâwl chu religious group zînga titha ber niin lâwmman pakhatna an dawng bawk. TKP Coordination Committee hian voluntary blood donation camp tum 4 buatsaihin thisen unit 522 an pe a ni. He ni vêk hian Civil Hospital Lungleia AVBD Lunglei buatsaih chawimawina hlanna inkhâwmah Lunglei District-a Kohhran pâwl thisen pe tam ber chawimawina chu MTKP hlan a ni a. MTKP hian kum kal ta chhûng khân Lunglei district-ah thisen unit 2347 a pe a ni. Lâwmman dawngtu dangte chu, Adventist Youth Fellowship 124 units, District PYD 65 units, SAY 37 units, KTP 22 units leh MPYD 17 units te an ni.

5. Ram Hruaitu Pawimawh Thenkhat Hmuh an ni.
June 13-14,2018 chhûng khân MTKP Inkhâwmpui 2019 chungchânga thu pawimawh hrang hrang sawipuiin President, Organiser leh Upa P.C. Liankhama, Senior Adviser te chuan Mizoram sawrkâr hotu pawimawh Pu Joseph Lalhimpuia, MYC Chairman; Pu Lalthanzâra, Minister PWD etc. leh Pu R. Lalzirliana, Minister P&E etc. te an hmu a. Ram hruaitute hian tha taka lo dawngsawngin rah tha a chhuah ngei pawh beisei a ni.

6. MTKP-in Khual Tha a Thleng.

June 20-24, 2018 chhûng hian Zeme Baptist Association (ZBA) Nagaland hruaitu mi palite chu MTKP nêna inûnauna siam tûr leh kan kalphung te zirchiang tûrin an rawn zin a. Anmahni lawmna inkhâwm BCM Biak In Zotlâng North-ah buatsaihin an châm chhûngin Lunglei leh Aizâwla BCM hmunhmâ pawimawhte tlawhpui an ni. ZBA hruaitu lo kalte chu hêngte hi an ni:
1) Mr. Iluilung Kuame, Development Secretary, ZBA.
2) Mr. Edaneing Newme, Mission Secretary, ZBA.
3) Mr. Hairangteu Pame, President, Youth Department.
4) Mr. Kebau Riame, Secretary, Youth Department.

7. Financial Statements: 2018-2019 Tihchhuah a ni.

Sum vawn leh enkawl (financial management) chungchânga hma kan sâwn zêl theih nâna ruahmanna kawng khat, nikum lam pawha kan lo tih tawh ang khân Financial Statements: 2018-2019 (June 22, 2018 thleng) chu tihchhuah a ni a, Finance Secretary, MTKP leh Circulation Manager, Thalai Êntu te kuta sum luh dân te chipchiar takin târlan a ni.

8. TKP Bul Tantute Inkawmhona Video Tihchhuah a ni ta.

July 30, 1951 (Thawhtanni) zâna Sêrkâwn Sikulpuia Thalai Kristian Pâwl (TKP) din a nih tuma telte zînga min la dampuite tîtîpuina March 23, 2018-a Er. Henry-a in, Chaltlâng, Aizâwla neih video chu peihin tihchhuah tan a ni ta. Historical document hlu tak a ni a, he thil kan tihlawhtling thei hi tûn term chhûnga MTKP achievement lian berte zînga pakhatah chhiar tûr a ni ngei ang. Inkawmhona video hi dârkâr khata sei a ni.

9. TKP Day Hlimawm leh Hlâwk takin Hman a ni.

TKP din champhaphâk kum 67-na, TKP Day chu Unit hrang hrangah hlimawm leh hlâwk takin hma a ni a. A tlângpuiin hemi ni, July 30 chhûn lam hian khawtlâng tâna hna tangkai te thawkin zân lamah Pathian biak inkhâwm neih a ni. TKP hruaituten Unit eng emaw zât kan hmanpui hlawm a ni.

10. MTKP Hminga Palainate:

10.1. TKP Lamthuamthum Unit, Haulawng Golden Jubilee. 16 June 2018.
10.2. TKP Zotlâng Unit, Lunglei Diamond Jubilee. 18-19 June 2018.
10.3. TKP Hnahthial South Pastor Bial Meet, BCM Chânmari, Htl. 29 June 2018.
10.4. MTKP Inkhâwmpui 2018 Promotional Visit (Tlabung). 8 July 2018.
10.5. TKP Rualalung Unit Diamond Jubilee. 19-20 July 2018.
10.6. TKP Mualchêng South Unit Diamond Jubilee. 25-26 July 2018.
(REV LIANCHHÛNGA KHIANGTE)