MTKP Rorel 2022 BCM Biak In, Venglai, Lungleiah nghah a ni dawn.

Mizoram Thalai Kristian Pawl (MTKP) Executive Committee Meeting, November 18-a neih chuan Kum 2022 MTKP Rorel-na hmun atan BCM Biak In, Venglai, Lunglei chu an ruat fel a. Kum 2022 hi MTKP Inkhawmpui neih kum ni mahse, hrileng avangin Inkhawmpui hi neih theih a ni dawn lo va. Hemi a nih avang hian  MTKP  Rorel leh Inkhawm, November 17-19 (Zirtawp zan tanga Pathianni zan) thleng  programme siam ni se tiin a rel a ni.

Meeting hi MTKP President Rev. Vanlalmuanakima’n a kaihruai a. MTKP Secretary Rev. K. Lalbiakenga’n report tlagpui a pe a. Secretary report-in a tarlan danin kum 2021, November thla thlengin Bial leh Unit TKP ten Voluntary Blood Donation an neih tawh atangin thisen unit 1173 pek tawh a ni a, chungte chu Aizawl Area-ah Unit 322, Lunglei Area-ah Unit 533, Lawngtlai Area-ah Unit 318 te a ni. 2025 MTKP Inkhawmpui dawl turin Lunglawn Pastor Bial te an remchan thu te, MTKP Kraws, Kikawn tlang, Lunglei ami siamthat a nih thu te. Kum 2022-a TKP Thuzir tur ziak tura ruat ten an ziah zawh tawh thu leh chulmam hna thawh mek a nih thu te a tarlang bawk.

 

An thu rel zingah Mizorama Krismas hmanna hmasa ber, Tuikawi-a MTKP Lungphun chu siam that ni se an ti a, Releif & Development Department ten Veirengte-a ‘Rilru Hriselna leh mihring inthlah pun zelna chungchanga Kristian Zirtirna’ kawnga thawk ho tura sawmna chu remtih a ni bawk.