Naktukah Souvenir tlangzarh dawn

Naktuk, September 28, 2018 (Zirtawpni) khian Mizorama Chanchin Tha lo thlen champhaphâk kum 125-na (Mizoram Gospel Quasquicentennial) lawmna Souvenir chu September 28, 2018 (Zirtâwpni) chawhma dâr 10:00 hian Rev. Dr. C.L. Hminga’n BCM Office Sêrkâwnah a tlângzarh dawn ta.

Tarlan tawh ang khan Mizoram Gospel Quasquicentennial Souvenir hi thil chi hrang hrang, Pen, T-Shirt, Banga khai mawi (Wall hanging banner scroll) leh No (Coffee mug) te siam a ni a. Pen leh T.Shirt hi quality hrang hrang, man in ang lo thliah an ni.

Tin, hêng souvenir hralhna atanga sum lo lût hian Gospel Quasquicentennial lawmna thil lian tak tak, Quiz (Lunglei), Talk Show (Aizâwl), Fak Zairi Homecoming Music Videos (Aizâwl), Concert (Kolasib/Siaha), Essay Inziaksiakna leh Hla Inphuahsiakna te buatsaih chhoh mek a ni a, a lawmna ni pui ber chu January 11, 2019 -ah neih a ni ang a, Tualchhung Kohhran theuhah he hun hi hman a ni ang.

He Jubilee hriatrengna atan hian District khawpui theuhah phun tur, Granite-a siam Monument pawh ziak zawh tawh a ni a, District tinah pek chhuah mek a ni.

 

 

 

Posted in BCM News.

admin