Naupangte Ni hman a ni dawn:

November 17, 2019, Pathianni hi Mizoram Baptist Kohhran Nipawimawh “Naupangte Ni” a ni a. Tualchhung Kohhran tin ten he Ni hi Pathianni zing Inkhawm-ah hmang theuh tura beisei an ni. Hemi Ni atana thupui thlan sa “Naupang chu a kalna awm kawngah chuan zirtir ula.” (Thufingte 22:6), tih thu hmangin Pathian thuchah ngaihthlak a ni ang.

Hei bakah hian Headquarters atanga thuchah chhiar tura buatsaih chu chhiar chhuah a ni bawk ang a, KNP Zaipawl leh Special item te beisei a ni bawk. Tualchhung Kohhran tam tak chuan he Ni hi KNP kutah hlanin Inkhawm pumpui an kairhuai thin a, Naupangte hnen atangin Pathian thu chah kawng hrang hrangin an entir thin a ni.

BCM Assembly 2015 chuan Naupangte Ni hi kum khatah vawi khat tal hman thin ni se tiin a rel a. Assembly Executive Committee 2015 (August) chuan November Chawlhni vawi thumna (3) chu Naupangte Ni atan a rel a. Kum 2016 atang atang khan hman ta a ni ta a ni. “Naupangte Ni-hi Kohhran pum huapin, naupangte pawimawhna  inzirtirna hun a tan hman thin ni se, Naupangte pawh a tam thei ang ber chanvo nei tura hun pek ni se”, tiin Committee chuan he ni hi Naupangte puala hman turin a lo siam ta a ni.

Hemi Ni pual hian BCM AV leh Serkawn Kohhran KNP te tangkawp chuan Naupang Pual programme  an buatsaih a. He Programme hi Pathianni tlai leh Thawhtanni tlai dar 5-6-ah LPS 12-ah tihchhuah a ni ang a, zan rei dar 10-11-ah repeat leh a ni ang. Zonet – Rinna Channel-ah zan dar 7-8-ah tih chhuah a ni bawk dawn a ni.

Posted in BCM News.

admin