Naupangte Ni

NAUPANGTE NI

November Pathian ni vawithumna

 

Naupangte Ni chungchang:  

Assembly 2015-in Naupangte Ni hi kum tin Pathian ni zing Inkhawm vawi khat hman thin ni se, tiin a lo rel ta a. Kum tin November Chawlhni vawi thumna (3) apiang hi hman thin ni se tiin Assembly Executive Committee 2015 (August) chuan a lo rel fel ta a ni. KNP Day ah hi chuan KNP ten tha an tih angin programme an siam thin a, Naupangte Ni-ah erawh hi chuan Kohhran pum huapa naupangte pawimawhna  inzirtirna hun a tan hman ni se la. Naupangte pawhin chanvo a tam thei ang berin nei tura hun pek thiam ni se a tha ang.

Naupangte Pawimawhna :

Ram leh hnam changkang apiangin naupangte an ngaipawimawh an ti thin. Hei hi kan Bible zirtirnaah pawh a dik a ni, “ Naupang chu a kalna awm kawngah chuan zirtir ula, A upat hun pawhin a thlah lo vang” (Thufingte 22:6) Kan tu leh fate kaihhruai an awlsam lai leh enkawl an nawm laia ngaihthah hi thil pawi tak a ni. A tuartu chu ram, kohhran leh chhungkua  a ni thin. BCM Assembly-in Naupangte kan ngaihpawimawhna hre renga ‘Naupangte Ni’ a ruat ta hi a lawmawm hle a ni. Tualchhung Kohhran tina hemi nia thusawitu apiangten kan rorelna sang ber duh dan hre reng a, “Naupangte Pawimawhna” chungchang zirtir thei, thu leh hla buatsaih theuh i tum ang u.

                Khaw pakhatah chuan Kohhran pawl (denomination) thum lai kan awm a. Baptist Church of Mizoram chuan KNP tha taka enkawlin a kalpui a, an puala inkhawm neih pui thin mai bakah Bible chang vawn leh hla zir nante hun hman a ni thin a. Kohhran pawl pakhat chuan naupang enkawlna hran an buatsaih loh avangin an tu leh fa thenkhat kan KNP-ah an rawn tel ve thin a, Sunday school thlengin an kai zel thin a. A then pawl dang sunday school lama kal an awm bawk. Hun a lo kal zel a, kan KNP zinga telte kha Baptisma zir pawlah an lo kai chho ve zel a, Baptisma chan a lo hun chuan an chhungte remtihna lo chuan chantir ngawt kan ngam lo va. In lama an chhungte an va dil a, an lo remti mai bawk a, an chang ve ta a. Chawhnu Lalpa zanriah kil hun dawn chuan, “kan Kohhran member puitling, dan zawhkimte chauhvin ei theih a ni” tih kan puan chuan an chhungte hnenah Baptist-a luh an va dil leh a, an lo remti ta hauh lo mai.

                Hun a  kal zel a, an nu leh paten, “In lian ve tawh a, he lamah inkhawm tawh mai rawh u,” an lo ti a. An fate chuan, “Kan inkhawmna ngaia inkhawm in phal loh chuan kan inkhawm tawh lo mai ang e,” an ti ta tlat mai. An chhungten, “Aw, naupangho kan lo ngaihthah rei atin a ni, kan hruai theih tawh loh chuan keimahni zawk Baptist kohhranah awm ve mai ang, chhungkua awm hran nuai zawng a buaithlak e,”  tiin an lo lut a. Naupang nei lo chhungkaw hnih/thum lek an bang ta, hun a lo kal zel a, Biak In luah lum zo pawh an awm tak lohvah chuan an Biak In a lo ram ta a. Kum hnih hnuah chuan an thiat ta nghe nghe. Naupangte i ngaipawimawh thar zual theuh teh ang u.