NEICC Day of Prayer-October 15

NEICC

Tunkar Patianni(October 15,2017) hi NEICC Tawngtai Ni (NEICC Day of Prayer) a ni a. He Ni hi North East India Christian Council zawmtu Kohhran hrang hrang ten an hmang ang. NEICC Headquarters Shillong atanga ruahman angin Kohhran pawl hrang hrangah rawng inbawltawn a ni dawn a ni. Kumin NEICC Day of Prayer thupui chu “Ngai teh, unaute inngeih dial diala awm khawm hi a va thain a va nuam em!” (Sam 133:1)’ tih a ni ang.

Hemi pual inkhawm-ah hian NEICC pual thilpek lakkhawm a ni ang a, headquarters atanga tawngtai subject siam sa hmangin Tawngtairual a awm bawk ang.

Tawngtai subject:

  1. NEICC hnuaia kohhranhote inunauna a that zêl theih nân.
  2. Kohhran hrang hrangte Pathian ram zau nâna kan thawhho zêl theih nân.
  3. NEICC hruaitute, Office-a thawktute tân.
  4. NEICC project pahnih Union Christian Council College ( UCC) leh NEICC Higher Seconndary School (Lower primary to Class XII) UCC Campus-a awm te tân.
  5. NEICC Thalai Pâwl (NEICC Youth Assembly) leh NEICC Hmeichhe Pâwl (NEICC Women Assembly) tân.

NEICC hi Nov 23, 1937 khân Assam Christian Council (ACC) hming pu-a din a ni. 1962 khân NEICC tiin a hming hi thlâk a ni. Kohhran 34 leh, Para Churches 17 (Pawl 53) inzawmkhawmna a ni. Kohhran hrang hrangte thawhho nân 1952 khân Shillong khaw dai Barapani dîl mawi zet kamah Union Christian College ( UCC) Campus zau tak neiin din a ni. Tûnah hian thawktu 80 neiin, Zirlai 850 zet an awm bawk. Kum 2016 NEHU result hnuhnûng berah khân Top 10 -ah mi 7 zet an nei a, Mizo 4 zirtîrtu an awm bawk. Tuna BCM General Secretary Rev. F. Ramdinmawia hi UCC Governing Body member ni lai mêk a ni.

NEICC Day of Prayer hman tan dan leh hman chhan:

NEICC Day of Prayer hi, kum 1975-a NEICC Inkhâwmpui, All Saints’ Cathedral, Shillong-a Church of North India-in an dâwl kumin passed a ni. Kum tin November Pathianni vawi 3-na hi hman thin ni se ti-a rêl thlûk a ni. Inpumkhatna leh India hmar Chhak Kohhrante intawngtaisak tawnna ni atân ruat a ni. Hemi ni-a thawhlâwm pawh NEICC puala pêk zêl ni rawh se, tih pawh lungrual taka tihthlûk a ni bawk. Hun a lo kal deuh va, Kohhran-hote hman remchan rual tâwk lohna avângin, 1994 NEICC Inkhâwmpui, Chandmary Pres-byterian Kohhran, Aizawl-in an dâwl kumin, tûna kan hman lai, October Pathianni vawi 3-naah hian sawn a ni ta a ni.

NEICC hnuaiah hian member 51 zet an awmkhâwm a. NEICC thil tum ber chu, kohhran hrang hrangte inhriat-thiam tawnna neih te, thil tihho te, thawhho te, in zahtawn te, tanrual te, inpumkhatna siamte a ni.

NEICC Day of Prayer 2017 Thuchah

-Rev. R. Lalnunzira, Secretary, NEICC

 “Ngai teh, unaute inngeih dial diala awm khawm hi

a va thain a va nuam em!” (Sam 133:1)’


Inngeihna ram Ringtute tâna Pathian tlâng ruat:

Unau mipa naupang tê tak tê pahnih hi a nu-in “Ngai teh, unaute inngeih dial diala awm khâwm hi a va thain a va nuam êm! tih hi vawng rawh u,” a ti a. Nakinah chuan, “A malin rawn kai ve ve ru le,” a ti a. Sawi hmasak inchuhin an han insual phawt a. An thuvawn a that tehlul nên, insual phah nân chuan an hmang ang lawi si a. Inngeihna ram hi thu mai ni lovin, a tak ram (practical)-a thleng tûrin Pathianin min duh thîn. Samari mi tha (Luka 1: 25-37) chanchin hian a va ti chiang em! Juda ho leh Samari mite inhalzia hre renga he tehkhin thu kher Lal Isuan a sawi hi tum chiangkuang tak a nei a ni. Inngeihna ram hi a mite tâna Pathian tlâng ruat dik tak a ni tih min hrilh a ni.

Juda ho hmân lai chanchinah chuan Samari mi hi an hmusitin an ten a. An thutna hnu-ah pawh an thu duh lo. An zinvahna-ah Samari ram kal tlang a ngaih pawhin, an hêl hrâm hrâm zuk nia!!! History-ah chuan, Juda ho hian Samari ho hi hnam dazât, Israel mi ni si, hnamdang nêna inneih pawlh, hnam uirê, thlahpawlh (half breed)-ah an ngai tlat a, an ten a ni ber mai. Chumite inkâra kan Vân Palai thu chu ‘I vêngte an ni’ tih hi zuk ni tlat a! “Krista avângin amah nên inremin min siam a, inremna rawngbâwl hna min pe a” (2 Kor.5:18). He rawngbâwl hna thawh leh he ram atanga Lal rawngbâwl hi a tûl tak zet thîn.

Tûn lai thil awmzia- Inngeih lohna khawvêl:
Kuminah hian bial inkhâwmpui thupuiah ‘Tûn lai thil awmzia’ tih kan hmang nual hlawm a. Thil chiang tak chu ingeihlohna khawvêl a nihzia hi a ni. Ram leh ram, sakhua leh sakhua, hnam leh hnam, chi leh chi, chh¦ngkua leh chhûngkua inngeih loh leh indo a bâng thei lo. Ni tin hian thisen chhuahna leh râpthlâk taka innghaisakna a thleng reng mai a ni. Thil mak erawh a ni lêm lo, Pathian thuin a sawi angin khawvêl pian ken ve rêng a ni.

Hetih lai hian, keini Pathian ringtute hi thu khat vua-a kan inngeih a tûl tak meuh mai. Kohhran ramri (denominational wall) hian Pathian ram hliah lo se la, chhûng khat laina daidang lo se la, Politics ram ri kham lo se, chhiatni thatni daidang lo se, therhlo induhsak bîkna siam lo se. Mi tin ta tûr Chanchin Tha zâwk hi min khalh kaltu ni zêl rawh se. Kohhran malah pawh, kan rawngbâwlhona hian inhuatna leh inngeih lohna hring lo bawk sela, a va tha dâwn êm. A châng chuan Pathian rawng kan bâwlho a talâng hian keimahni leh rawngbâwlpuite inkârah inkawmngeih aiin inngeih lohna a hring leh tlat thîn. A pawi hle a ni. Kan thlarau nun tichak lotu tam tak pawh hi kan inngeih lohna hi a ni ve fo mai. Remna palai hna i thawk zêl ang u.

Unau inngeihna, Pathian malsâwm ram rim:
Kan thupui innghahna Sâm 133 hi ngun taka kan bih chuan, unau inngeih dial diala awm khâwmna hi ‘a tha’ a, ‘a nuam’ bawk . A kim thlap mai a nih chu. Thil tha zawng zawng hi a nuam kher lo va, thil nuam zawng zawng hi a tha kher lo bawk. Inngeihna ram erawh chu a tha-in a nuam famkim thlap a ni. A tha-nuam a nih tawp mai.

He inngeihna ram hi Lû-a hriak hlu tak ang a ni. Lal Davida mitthla-ah hian Puithiam lalber Arona (Mosia unaupa) hriak thih kha a lo lang ni ngei tûr a ni. Hriak thih hian, ‘Pathian ruat’ tih te, ‘rimtui’ tih te, a entîr a. Chuti a nih chuan, Inngeihna ram chu Lalpa ruat (Lalpa hriak thih), Lalpa tân leh mi dangte tâna rimtui tihna a lo ni a, a va hlu êm!! He Sâm number 133, châng 3 lek awmah hian, ‘luang thla’ (running down) tih hi vawi 3 ngawt- khabe hmula luang thla, Arona khabe hmul ngeia luang thla, kawrfual hmâwra luang thla, tiin a sawi hman a. Unau inngeihna-ah chuan Lalpa hriak chu a luang liam zawih zawih (overflow) tihna a ni ber mai. Lalpa ruat leh hriak thih, rimtui êm êm bawk si chu ingeihna ramah hian a luang liam zawih zawih a nih chu.

‘Hermon daifîm Zion tlângte-a tla thin’ angin a rawn tehkhin leh bawk a. Daifîm chu, thing leh mau, thlai leh mihring hial pawh ti harhtu (refresh) tu leh châwmtu a ni a. A tlâkna kher kher hi Jerusalem-a Zion tlâng, Temple awmna, Israel fate’n Pathian chibai an bûkna hmun (Central Shrine) a ni lehnghâl a, a mak khawp mai. Pathian chibai kan bûk hona Biak in hi Unau inngeihna chuan a châwmin a ti harh hle dâwn tihna a nih chu. Inkhâwm leh Pathian chibai bûk a va nuam dâwn ve le.

A hnuhnûng apiang a tha tih mai tûrin, a tâwp berah hian Unau inngeih dial diala awm khâwmna-ah chuan Malsâwmna thupêk a awm tlat mai. A lêt zâwngin, unau inngeihlohna hmunah chuan Malsâwmna thupêk a awm lo tihna pawh a ni thei ang. Tawngtaia kan dîl tam ber, malsâwmna (damna, hrisêlna, vênhimna, etc.) hi unau inngeihna-ah hian a lo bet teuh mai. Lal Isuan ” …maichâm bula thilpêk i hlan lai ngeia i unauvin i chungah lungnihlohna a nei tih i hriatchhuah leh chuan, chuta maichâm hmaah chuan i thilpêk chu hnutchhiah la, kal langin i unau rem zet la, chumi hnuah chuan i thilpêk chu rawn hlân rawh.” (Matt 5:23 & 24) a ti a ni.

Kan Kohhran ti nuam lotu, ti tha lotu hi unau inngeihlohna a ni thei ang em le? Kan rawngbâwlna a sâwt tâwk lohna chhan hi kan inngeih loh thin vâng a ni thei mai lo maw?. Pathian pâwlna nung leh Thlarau malsâwmna dâltu hi kan innghirnghona avâng a ni thei fo vang. Pathian tâna rimtui lo (rimchhia) chu unau inngeih tlat lohna hi a lo ni dâwn a nih hi. Pathian ram zau nâna kan thawh hlâwk theih nân, unau ingeih dial diala awm hi kan tâna Pathian tlâng ruat chu a ni e. Mi mal, unau, chhûngkua leh Kohhrante inngeih dial diala awm khâwm tumna hi rahbi thar kan tukna vawiin atang hian lo ni mawlh rawh se. Amen.

Posted in BCM News.

Leave a Reply

Your email address will not be published. Required fields are marked *