NEICC Day of Prayer-October 20

Tunkar Patianni(October 20,2019) hi NEICC Tawngtai Ni (NEICC Day of Prayer) a ni a. He Ni hi North East India Christian Council zawmtu Kohhran hrang hrang ten an hmang ang. NEICC Headquarters Shillong atanga ruahman angin Kohhran pawl hrang hrangah rawng inbawltawn a ni dawn a ni. Kumin NEICC Day of Prayer thupui chu “An zaa pumkhat an nihna tûrin (Johana 17:20-21). tih a ni ang.

Hemi pual inkhawm-ah hian NEICC pual thilpek lakkhawm a ni ang a, headquarters atanga tawngtai subject siam sa hmangin Tawngtairual a awm bawk ang. He hunah hian NEICC Member Kohhran hrang hrang atangin hruaitute pawh an fehchhuak dawn a, BCM Headquarters hruaitu te leh Bialtu Pastor te pawh Kohhran dang-ah fehchhuakin inpumkhatna thupui an sawi ang. BCM hruaitute leh Bialtu pastor te kalna tur (Lunglei leh Lawngtlai)kan hriat theih chin heng hi a ni.

Lunglei khawchhung

  1. Rev. F. Ramdinmawia, General Secretary – PCI Ramthar Lunglei
  2. Rev. Dr. C. Vanlaldika, AGS, Mission – PCI Farmveng, Lunglei
  3. Rev. R. Lalbiakliana, AGS Service – PCI Rahsiveng
  4. Rev. Dr. Lalzarliana, Comm.Director – PCI Electric Lunglei
  5. Rev. ZD Rodingliana, CED Director – PCI, Chanmari, Lunglei
  6. Rev. C. Chhuntluanga, Pastor Coordinator – S.A Bazar Corp
  7. Rev. Sangliankhuma Chinzah, Direcor, Social Concern – S.A Citadel Corp

Lawngtlai khaw chhung

  1. Rev. R. Lalnunzira E/S chu – LIKBK Centre churh Bazar
  2. Rev. H. Lalremruata – LIKBK Bethel, Lawngtlai vengpui
  3. Rev. Lalṭanpuia Colney –  LIKBK Moria Biakinah
  4. Rev. F. Lalnunmuana – PCI Bazar Lawngtlaiah
  5. Rev. C. Vanlawma –  LIKBK Peniel Lawngtlai ah

Tawngtai subject:

  1. NEICC office Bearers te,Executive Committee member te leh standing committee hrang hrang 6-a member te tân.
  2. NEICC office-a thawktute leh an chhûngte tân.
  3. NEICC Hmeichhe Pâwl hruaitute tân.
  4. NEICC Thalai Pâwl hruaitute tân leh kan hma lawka thalai pual intawhkhâwmna (Youth Fest) nei tum a lo hlawhtlin theih nân.
  5. Union Christian College Principal, thawktute leh zirlaite tân.
  6. Union Christian College-a Research leh Training centre din chhok mêk a lo puitlin theih nân.
  7. NEICC Biennial Session(Inkhâwmpui) Jalukie Baptist Church, Nagaland-a neih tur chu inbuatsaihna tha taka a kal zêl theih nân leh Inkhâwmpui hlawhtling taka an neih theih nân.
  8. Thalaite puala ni khat awh Praise & Worship hun Umpling Presbyterian Church-ah hman tum mêk a ni, a hlawhtlin theih nân.
  9. Hmâr chhak state-a kohhran pâwl hrang hrangten Mission Field-a rawng kan bâwlnaah harsatna insiam tawn lova inlungruala chanchin tha kan hril zêl theih nân.

NEICC hi Nov 23, 1937 khân Assam Christian Council (ACC) hming pu-a din a ni. 1962 khân NEICC tiin a hming hi thlâk a ni. Kohhran 34 leh, Para Churches 17 (Pawl 53) inzawmkhawmna a ni. Kohhran hrang hrangte thawhho nân 1952 khân Shillong khaw dai Barapani dîl mawi zet kamah Union Christian College ( UCC) Campus zau tak neiin din a ni. Tûnah hian thawktu 80 neiin, Zirlai 850 zet an awm bawk. Kum 2016 NEHU result hnuhnûng berah khân Top 10 -ah mi 7 zet an nei a, Mizo 4 zirtîrtu an awm bawk. Tuna BCM General Secretary Rev. F. Ramdinmawia hi UCC Governing Body member ni lai mêk a ni.

NEICC CHANCHIN TAWI:

North East India Christian Council (NEICC) hi India hmâr chhaka Protestant Kristiante inzawmkhâwmna pâwl lian leh pawimawh tak a ni a. Member kohhran 35, leh Associate MemberKristian pâwl 17, a vaiin 52 a nei a. Member nih dîlna a dawng reng bawk hi a lâwmawm hle. Mizoram chhûngah hian Baptist Church of Mizoram, Mizoram Synod, Evangelical Church of Maraland, Lairam Isua Krista Baptist Kohhran, Salvation Army, Evangelical Free Church of India, Independent Church of India, Zoram Evangelical Fellowship, Mizo Theological Association, The Leprosy Mission leh Thlarau Bo Zawngtute hi member an ni.

NEICC Office hi Shillong-ah awmin, kohhrante inpumkhatna atân leh thawhhona tha an neih theih nân hma a la mawlh mawlh reng a. Kum 1937 khan Assam Christian Council tih hming pua din a ni a, 1962 atangin tûna a hming hi a lo pu ta zâwk a ni. NEICC hnuaiah hian pêng 2- Hmeichhe lam NEICC Women Assembly leh NEICC Youth Assembly tih ten hruaitu hran neiin anmahni zâwnah ve ve kawng tam takin hma an la reng bawk a ni.

NEICC hi National Council of Churches in India (NCCI)-ah member a ni a, North East-a kohhran hrang hrangten an hmachhawn thil pawimawha awkâ an chhuahna United Christian Forum North East India (UCFNEI)-ah pawh a meizang hlaptu pakhat a ni a. He Forum-ah hian Catholic te nên thawh ho a ni a, tûnah hian Secretary hna hi NEICC Secretary hian a chelh mêk a ni. Rawngbâwlna kum hlum (project) 2 lai a nei mêk a. Kum 1952 atang khan Union Christian College (UCC) a din a, tûnah hian Arts, Commerce leh Science zirlai 1000 dâwn a nei a. Kum 2016 khan UCC Higher Secondary School a lo din ve leh bawk. Tûnah hian Center of Research, Documentation and Training din turin hma a la tan mêk a ni.

NEICC Inkhâwmpui tûn hmaa kum tina neih thin chu 2012 atangin kum khat dana neih thin a ni ta a. Nakum 2020, May 14-17 chhûng khian Jalukie, Nagaland-ah Nagaland Baptist
hurches Council-in thlengin 4th Biennial Session/79th Session kan nei dâwn a ni. Kum tinin October Pathianni Vawi 3-na hi NEICC Day of Prayer atâna hman thin a ni a. Hemi ni hian kohhranten NEICC pual program siamin tawngtaisakna hun an hmang a. NEICC puala thilpêk lâkkhâwmte hi a sâwtpui hle thin a ni.

Tûn term 2018-20 chhûnga Office Bearers-te:
President : Rev. Dr. Kethozelhou Keyho, Nagaland Baptist Church Council, Nagaland
Vice Presidents : Rev. Dr. Laiu Fachhai, Evangelical Church of Maraland, Mizoram
: Rev. H.L. Myrsing, Ri Bhoi Presbyterian Church, Meghalay
Secretary : Rev. Dr. Ramengliana, Manipur Presbyterian Church Synod, Manipur
(full time)
Treasurer : Rev. Dr. Brightstar J. Syiemlieh, KJP Synod Sepngi, Meghalaya

NEICC hian kum tin kohhran hrang hrangte kal khâwmna tur programme – seminar emaw, consultation emaw a buatsaih thîn. Chi bing innghirnghona leh inbeihna a awmin remna palai hna a thawk thîn. Mission Field-a kohhran pâwl innêk buai hi a duh lo hle a, thawhhona thuthlung a siam chu kohhranhote zâwm ngei tûrin a beisei a ni.

NEICC Day of Prayer hman tan dan leh hman chhan:

NEICC Day of Prayer hi, kum 1975-a NEICC Inkhâwmpui, All Saints’ Cathedral, Shillong-a Church of North India-in an dâwl kumin passed a ni. Kum tin November Pathianni vawi 3-na hi hman thin ni se ti-a rêl thlûk a ni. Inpumkhatna leh India hmar Chhak Kohhrante intawngtaisak tawnna ni atân ruat a ni. Hemi ni-a thawhlâwm pawh NEICC puala pêk zêl ni rawh se, tih pawh lungrual taka tihthlûk a ni bawk. Hun a lo kal deuh va, Kohhran-hote hman remchan rual tâwk lohna avângin, 1994 NEICC Inkhâwmpui, Chandmary Pres-byterian Kohhran, Aizawl-in an dâwl kumin, tûna kan hman lai, October Pathianni vawi 3-naah hian sawn a ni ta a ni.

NEICC hnuaiah hian member 51 zet an awmkhâwm a. NEICC thil tum ber chu, kohhran hrang hrangte inhriat-thiam tawnna neih te, thil tihho te, thawhho te, in zahtawn te, tanrual te, inpumkhatna siamte a ni.

Posted in BCM News.

admin