NEICC Day of Prayer:

Tunkar Patianni (October 18,2020) hi NEICC Tawngtai Ni (NEICC Day of Prayer) a ni a. Kumin NEICC Day of Prayer thupui chu “Thupêk thar”(Johana 13:34) tih a ni ang.

Kum dangah chuan he Ni hi North East India Christian Council zawmtu Kohhran hrang hrang ten urhsun takin an hmang thin a,  NEICC Headquarters Shillong atanga ruahman angin Kohhran pawl hrang hrangah rawng inbawltawnin, Kohhran pawl bik sawi lovin Thuchah sawitu tur leh an kalna tur te ruahman sak thin an ni.

Kuminah erawh chuan Covid-19 hrileng avangin Kohhran Inkhawm leh Pulpit rawngbawlna in hman thleng (Pulpit Exchange) te a rem tak loh avangin NEICC Headquarters chuan hemi ni puala tawngtai thupui atan – NEICC hruaitute leh NEICC hnuaia Kohhran hrang hrang te leh an hruaitute tana tawngtai turin ngenna a siam a, a theih anga hemi ni pual thawhlawm pawh lakkhawm turin a chah a ni.

North East India Christian Council (NEICC) hi November 23, 1937 khan Assam Christian Council tih hming pua din a ni a. Kum 1962-ah NEICC ti a thlak leh niin chu hming chu a pu hlen ta a ni.

A din tirh atangin BCM hi member nghet a ni. Tunah hian kohhran hrang hrang leh Christian Organisation 51, NEICCah hian kan thawkho mek a. Shillongah headquarters neiin full time-a thawk Secretary-in a thut chilh a. Tuna Secretary hna cheih mêktu chu Rev. Dr. Ramêngliana (Manipur Presbyterian Church Synod ) a ni.

Inpumkhatna leh India hmarchhak kohhrante intawngtaisak tawnna ni (NEICC Day of Prayer) atan kum tin November Pathianni vawi 3-na ruatin hman a ni thin a. Kum 1994 NEICC Conference chuan tuna kan hman lai October Pathianni vawi 3-naah hian a sawn leh ta a ni.

NEICC in a tum leh tih thinte chu India hmarchhaka kohhran inpumkhatna leh inunauna tha siam a ni a. Tin, a tul huna ram rorelna leh sorkar hmaah pawh kristiante aiawha din te, Chanchin Tha hril, tihdam rawngbawlna leh thuziak lam leh zirna kawnga thawhhona tha siam te, a tul anga khawtlang nun siam leh harsatna a tawhte hmachhawn puite a ni. Hemi ni a thawhlawm pawh NEICC inrelbawlna atan headquarters kal tlanga thawn thin a ni.