M.TKP Inkhawmpui hun ruat fel

MTKP Executive Committee Meeting, nimin, March 20, 2012 -a neih chuan Mizoram Thalai Kristian Pawl Inkhawmpui hun atan Marh 21 – 24, 2013 a ruat fel ta.  Inkhawmpui thupui atan  “Lalpa hman tlak” (II Tim. 2:21) tih an thlang fel nghal bawk.  MTKP Inkhawmpui Programme leh tul dang te lo bawhzui turin OB te ruat an ni a, Inkhawmpui hlabu pawh buatsaih leh tura ruahman a ni bawk.

MTKP Inkhawmpui 2013 hi Haulawng Pastor Bial-in, Haulawng Lamthuamthum-ah an thleng dawn a, kum 2010 atang khan inbuatsaihna an kalpui tan tawh a ni. Mizoram Thalai Kristian Pawl (MTKP) Inkhawmpui hi kum 1998 hmalam kha chuan kum tin neih thin a ni a. Kum 2000 atang khan kum khat dan-ah neih thin niin 2010 thleng khan hman a ni a. 2011 -ah FOD Inkaihruaina revised a ni a, chutah chuan MTKP leh MBKHP Inkhawmpui chu kum hnih dan zela neih turin inkaihhruaina-ah dah a ni ta a ni.

BCM This Week

 

 

  • R&D ah kum 3 Project atan Training  buatsaih :
    BCM Relief & Development Department bul tumin kut hnathawktute leh hmeichhe rethei zawkte hmasawnna tur Project planning training March 12-17 chhung hian R & D Training Hall, Ramzotlang, Serkawn-ah neih mek a ni. BWAID Australia pawhin an rawn support theih tur thu an rawn sawi tawh bawk.He Project hi July, 2012 atanga kum 3 chhung awh turin Australian Baptist World Aid leh Association for Stimulating Knowhow (ASK) India te nena tang hova kalpui tur a ni dawn a ni. He Project-ah hian Kut hnathawktu, thingtlang khaw thlan bik 30 te hnenah SALT Farming, Health leh Hmeichhe harsa zualte tanpui leh dawmkan kawngah hma a la dawn a ni. He Training neihpui tur hian BWAid atangin Project Officer, Felicity Errington lo kalin Training a hmanpui mek a ni.

 

  • Lunglei South ABC Tawngtai dawn: Tunkar Pathianni chawhma inkhawmah khian Lunglei South ABC  huam chhunga Tualchhung Kohhran hrang hrangah kan ram sualna pung nasa lutuk a reh theih nan leh hemi kawnga hmalatute tha tichak turin tawngtai rualna an nei dawn.
  • Diltlang Bial TKP Meet: Diltlang Pastor bial TKP chuan March 16-18, 2012 hian Diltlang Biak inah ‘Thalaite u, in that lai chen ula’ thupui hmangin Meet an nei a. He TKP Meet hmanpui tur hian MTKP hruaitute Rev.Samuel Lalremsanga(Organiser MTKP), Pu R. Lalrochama(Fin.Secretary, MTKP), Tv.C. Lalengzuala(Editor, Thalai Entu) Zaithiam  leh Nl.CR. Laldingliani te an kal.
  •  Bungtlang Pastor Bial BKHP Seminar: Bungtlang Pastor Bial BKHP chuan March 16-18, 2012 chhung hian Bungtlang Biak inah ‘I rawngbawlna kha hlen rawh’ tih thupui hmangin Seminar an nei mek a. MBKHP atangin Asst. Secretary, Dr. Chawngthanpari leh Vice President, Pi F. Zanguri ten an hmanpui.
  •  Aizawl City KNP Hruaitu Seminar: March 16, 2013 (Zirtawpni) hian Aizawl khawpui huam chhunga Kohhran tina KNP hruaitute chuan Central Church-ah Seminar an nei mek a, FOD Director, Rev.R. Lalbiakliana’n a hmanpui.
  •  Hnahthial Model KNP te Pangzawlah: Vawiin Pathianni hmang hian Hnahthial Model Kohhrana KNP te chuan Pangzawl Ramrikawn Kohhran an tlawh dawn a; zingah kalin tlaiah an haw leh ang.
  •  KNP Inkhawmpui: Zobawk Pastor bial KNP chuan March 17-18, 2012 hian Bazar Biak inah Inkhawmpui an nei mek a. Bialtu pastor thar pahnih, Rev.F. Lalsangliana leh pro Pastor VL. Nithanga te bakah FOD Director, Rev.R. Lalbiakliana’n a hmanpui.
  •  Tlabung Unit BKHP Diamond Jubilee: Tlabung Unit BKHP chuan March 15, 2012 khan an din champha kum 60-na, Diamond Jubilee an lawm a. MBKHP Organiser, Pi B. Singpari ten an hmanpui.
  •  Evangelist Team te Rawngbawlna:  Kan hriat theih chinah BCM Recognised team zingah Invaders for God (Speaker: P.L.Sanglura) te chuan Chawngte ‘L’ ah rawngbawlna an nei mek a. Upa K. Laltawnga te pawhin Chawntlangpui(?) ah Ruihhlo ngaite pualin Camp an nei bawk.

BCM President thar-Rev.Dr.Raltawnga

 

Mizoram Baptist Kohhran President thar, Rev. Dr. Raltawnnga chuan March 8, 2012 khan Rev. Dr.K.Thanzauva hnen atangin Charge a la ta.  Rev. Dr. Raltawnga hian 2013 Assembly thleng BCM a kaihruai tawh dawn a ni.

Rev. Dr. Raltawnga hi 1988  khan Associate General Secretary i/c General Administration atân Assembly-in a thlang a, 1991 March thleng a thawk. Rev. Hrangêna a thih tâk avângin 1990 August atanga 1991 March thla thleng General Secretary hna nên a kawp.  1991 April atanga 1998 April 22 thlengin General Secretary hna a thawk a. 2001 atanga 2004 April thlengin Aizâwl-ah Executive Secretary hna a thawk bawk. Kum 1987 khân Assembly Chairman a ni a, 2005-ah President a ni a, 2007 hian President-elect atân thlan a niin 2008 ah President a ni a, 2011-ah President Elect-ah thlan nawn leh a ni a, kumin 2012 hian President a ni chho leh ta a ni.

 

……………….

Rev. Raltawnga B.A (Hons); B.D; M.A; D.Th

 

            Rev. Raltawnga hi January 9, 1944-ah Hmuntlâng khuaah a lo piang a. Ft 5’, 4”-a sang a ni a, a pa chu Kâpchhûnga(L) a ni a, a nu Hrângtluangi(L) a ni. Amah hi Chhakchhuak hnam a ni a, unau pianpui pahnih a nei. Hmuntlâng khuaah hian 1958 khân Pâwl ruk a zir zo va. Hemi kum vêk hian an bialtu Pastor Rev. B. Thangseian he khuaah hian baptisma a chantîr. Kum 1973 December 4-ah Lalthanchhingi Hauhnâr (d/o H. Hautluanga) nên Lunglei Vênglai Baptist Kohhran Biak inah an innei a. Rev. K.T. Chungnungan a vawntîr. Fa pali, mipa pahnih leh hmeichhe pahnih an nei.

 

Lehkha zirna lam : Mautam kum 1959 khân sikul kal thei lovin hlo a thlo a. Kum 1960-61 khân Region High School Lawngtlai-ah pâwl sarih leh pâwl riat a zir zo va. 1962 leh 63-ah Gandhi Memorial High School-ah pâwl kua leh pâwl sâwm zovin 1964-ah HSLC exam chu a pass bawk. Kum 1966-ah St. Edmund’s College, Shillong-ah P.U. a pass a, 1969-ah B.A (Economics Honours) a zo. 1965 October 3-ah a piangthar a, rawngbâwl tûra Pathian kohna chhângin Union Biblical Seminary, Yeotmal(Yavatmal)-ah Pathian thu a zir a, 1972-ah B.D. a zo. Kohhrana a thawh hnuin Kohhranin literature lam zir tûr a mamawhna avânga tirin 1983-84 chhûngin Selly Oak College, Birmingham (UK)-ah BMS chawmin Communications lam a zir a. Cross-cultural communications leh Mission lamah Certificate course a zo bawk. Hetih lai hian West Bromwich College of TV & Technology-ah Television programme production course thla thum chhûngin a zo a, hei hi certificate course a ni. Kum 1985 khân Wheaton College Graduate Scholl, Wheaton, Illinois (USA) atangin M.A. (Communications) pawh a zo leh. Kum 1998 atang khân Aisa Baptist Graduate Theological Seminary, Baguio City Philippines-ah theology subject-ah Doctor of Theology degree course a zir a, 2003-ah Doctor of Theology (Th.D) degree chu a la ve leh.

 

Rawngbawlna lam : College-ah a kal laiin Shillong Mizo Kohhranah a theih angin rawng a bâwl a, Usher hna te, naupang lam Sunday school Secretary hna te a thawk thîn. Tin, College zirlaite tâna Camp leh English Service buatsaihtu pâwl Shillong Inter-Collegiate Evangelical Union pâwlah Secretary-ah te a tang thîn. Pathian thu a zir laiin Operation Mobilization leh India Every Home Crusade zawmin India ram state panga (M.P; M.H, U.P; Gujerat, Rajasthan)-ah rawngbâwlin khaw 250 vêla tlawh tawh. Kum 1972 July thla atangin full time a rawngbâwl tûrin Mizoram Baptist Kohhranah a lut ta a ni.

 

Baptist Kohhrana hna hrang hrang a chelh tawh te: July 1, 1972 atang khân BCM-ah full time-in a thawk tan a. Sunday School leh Liteature lam hnaah Upa R.T.Bawia a tanpui a. Lehkhabu ziak tûr endik hna (editing) leh hna tul dang awm apiang thawhtîr a ni. August 72 atanga April 74 thlengin Kristian High School Sêrkâwn-ah zirtîrtu hna a thawk a, hemi kum hian Jubilee Bible School-ah zirtîr hna nên a kawp bawk. Kum 1973 January atangin April 74 thleng High School-ah hian full time teacher niin Hostel Warden hna a thawk. Hemi kum January thla hian Vênglai Baptist Biak inah Probationary Pastor atân lâk luh a ni a, Lunglei khaw pumpuiah bialtu Rev. Lama chu Pastor hnaah hian a pui thîn. Hemi kum vêk hian Bible School-ah zirtîr hna thawkin, mipa leh hmeichhe hostel a enkawl kawp bawk. 1974 May atanga 1979 May 17, thlengin Thingsai bialah pastor hna a thawk a, Cherhlunah Pro. Pastor-in a awm phawt a, ordained hnuah a awm tlang ta zêl. 1975 March thlaah Zobawk Ebenezer Kohhranah BCM Assembly chuan Pastor atân a nemnghet (ordain). June 1979 atangin 1980 chhûngin Jubilee Bible School-ah zirtîrtu hna a atangin 1980 chhûngin Jubilee Bible School-ah zirtîrtu hna a chelh.

 

            Assembly-in 1980-ah Literature Secretary atân a thlan tâk avângin Bible School a zirtîr hna chu session hnihna atang chuan part time chauhvin a thawk. 1982 &1983 June thlengin Sunday School leh Literature Secretary hna a chelh kawp. Upa R.T. Bawia Bookroom manager-ah dah a nih tak avâng a ni. Kum 1977-ah Shillong-ah Bible lehlin hna atân training thla khat leh a chanve a nei a. Chuta tang chuan BCM aiawhin Mizo Bible translation committee-ah telin, Thuthlungthar bu letlingtute zîngah a tel a, lehlin hna (first draft) hi 1983 May thla khân zawh a ni. 1983 July atangin 1985 December thlengin U.K. leh USA-ah Communications lam a zir ta a ni.

            1981-1983 chhûngin MTKP President atân General Committee-in a ruat angin a thawk. 1988 atangin Associate General Secretary i/c General Administration atân Assembly-in a thlang a, 1991 March thleng a thawk. Rev. Hrangêna a thih tâk avângin 1990 August atanga 1991 March thla thleng General Secretary hna nên a kawp. Mizoram Gospel Centenary Committee 1993-95 atân Chairman a ni bawk. 1991 April atanga 1998 April 22 thlengin General Secretary hna a thawk a. 2001 atanga 2004 April thlengin Aizâwl-ah Executive Secretary hna a thawk bawk. Kum 2004 May atangin Rahsivêng Pastor bial hawn tharah bialtu Pastor-in dah a ni a, March 30, 2010   thlengin chu hna chu a la thawk. Kum 1987 khân Assembly Chairman a ni a, 2005-ah President a ni a, 2007 hian President-elect atân thlan a ni. kum 2008-ah BCM President niin 2009 Assembly-ah a tawp a. 2011-ah President Elect atan thlan a ni leh a, 2012, March 8 khan Rev. Dr.K.Thanzauva hnen atangin President Charge hi a la leh ta a ni.

 

Lekha ziak lam : Lehkhabu tlem a ziak ve a, chungte chu-

1. Kristian thurin tlângpui (1978), vawihnih chhut a ni tawh.

2. Baptist Confession chhuizauna (19998)

3. Bible Chanchin (1990)

4. Kum sâng rorêl leh taksa thawhlehna (1982, booklet)

5. Evangelist tanpuitu (1998)

6. Seventh Day Zirtirna hnialna.

7. Galatia Hrilhfiahna

Hêng bâkah hian Nilai zân thuzir, Sunday school zirlai leh Beirual thuzir bûte pawh midangte nêna intawmin a ziak tawh a, articles chi hrang tam tak a ziak.

Rawngbâwlna zinna : Rawngbâwlna avângin hêngah te hian a zin chhuak:- 1977 January khân Deolali (MH)-ah All India Congress on Evangelism-ah BCM aiawhin a tel. 1985-ah Los Angeles (USA)-ah 16th. BWA Congress-ah a tel. 1990 April-May-ah BCM zaipâwl hruaiin UK-ah a kal. 1992-ah BMS Bi-Centenary lawmna Westminster Abbey UK-ah a tel. 1993-ah BMS Mission Partnership Consultation Meeting Charney Manor, Oxfordshire UK-ah telin Paper pawh a present ve. 1993 khân Kathmandu (Nepal)-ah UMN Board meeting-ah a tel a, 1994-ah ABF leh BWA hotute nên Mission chungchânga hemi hmuna inbiaknaah a tel. 1992-ah ABF Congress, Singapore a neihnaah a kal a, BCM Zaipâwlte a kalpui. 1996 hian BWA General Council meeting Hongkong-ah a tel a. 1997 hian ABF Congress meeing Taipei-ah telin BCM zaipâwlte a hruai bawk. Thailand-a BCM Missionary te awmna hmun pawh a tlawh. 2005 khân BWA Centenial Congress Birmingham (UK)-ah zaipâwl hruaiin a kal leh. BCM Mission Field India ram chhûnga mi chu a tlawh chhuak tawh bawk.

 

Mizoram Baptist Kohhran President thar, Rev. Dr. Rlaltawnnga chuan March 8, 2012 khan Rev. Dr.K.Thanzauva hnen atangin Charge a la a, Assembly Rorel a kaihruai nghal a ni. President thar,  Rev. Dr. Raltawnga hian kum 2013 BCM Assembly thlengin he mawhphurhna hi a chelh dawn a ni. Hetih lai hian President Elect atan Rev. F. Sangvela chu thlan thar a ni bawk a. Ani hi tuna executive Secretary Aizawl Area chelh lai a ni bawk.

BMS Monument hawng

 

 

 

Baptist Missionary Society(BMS) te rawngbawlna hriatrengna lungphun, BMS Monument, BCM Headquartes Office kawt, BCM Mual, Serkawna phun chu vawiin March 11, 2012 (Pathian ni) tlai dar 4:00 khan hawn a ni ta. Hawnna Inkhawm hi Rev. Raltawnga,BCM President-in a kaihruai a, Rev. Dr. K. Thanzauva, Outgoing President chuan Monument buatsaih dan chanchin report a pe a, Rev. Peter Dunn, BMS World Mission Director – U.K -in a hawn hnu ah Rev. H. Lianngaia, General Secretary in Pathian hnenah a hlan.

 

 

He Monument-ah hian Mizorama Missionary lo kal hmasa ber- Sap Upa leh Pu Buanga te lim (an awm chin chunglam) Sailungvar-a siam dah a ni a. Milim hnungah hian Monument pillar pathum Triangle shape, Marble Chips-a chei, ft.20 a sang, Triangle shape-in a ding thiang a. Piller pakhatah Mizorama lo kal BMS Missionary-te hming ziak tarlan a ni a. Piller pahnihna-ah chuan BMS logo hnuaiah William Carey thusawi ropui leh Pathian leh kan Missionary te avanga lawmthu sawina thu a inziak a. Piller pathumna chu BMS Centenary pual bik deuha duan a ni a. Tin, Piller pakhatna bang lehlamah hian BCM BCM hruaitu hmasate (1903-2003) thleng hming tarlan a ni. Heng Piller pathum ding thiang te insuihfinna chhip-ah hian Kraws dah a ni bawk. He Minument hual vel hian pangpar mawi tak awmze nei takin phun vek a ni bawk.

 

   

 

 

 

Minister 6 Ordain an ni ta

Vawiin-a Mizoram Baptist Kohhran Assembly Ordination Service chu tluang takin zawh fel a ni a, tun tumah hian Probationary Pastor 5 leh Dr. RL Hnuni te chu Minister atan nemngheh an ni ta. Ordination Service hi Rev. Dr. Raltawnga, BCM President-in a kaihruai a, Ordain tur mi 6 te hnen atangin an testimony ngaihthlak vek an ni a, Rev. Lalthangliana, Co-ordinator BCM Pastoral Department-in Ordain turte hmelhriattirna leh BCM-in Pastor a neih dan leh a mamawh dan report tawi a pek hnu-ah Presiding Minister Rev. Dr. Raltawng’n a mal te te-in zawhna a zawh hnu-ah nemngheh an ni ta a ni.

 

     

H.Ramthianghlima

Joe Laldinpuia

Lalhnehliana

 

 

 

ZD Lalrozuala

Dr RL Hnuni

Lalremruata

 

 

Tun tuma Minister ordain te zinga pakhat Dr. RL Hnuni hi Mizorama Kohhran hote zingah hmeichhe Ordain hmasa ber a nih avangin ngaihven a hlawh hle a. Mizoram Baptist Kohhran History-ah Hmeichhia, Minster atana ordain hi an la awm ngai lo va. Dr. RL Hnuni hi Ordain a nih chuan a hmasa ber a ni ta  a ni.  Assembly 2011-chuan Pastor ni lo, Minister-a ordain dan a siam thar a, chu Dan hmang chuan Prof Dr. RL Hnuni chu Minister atan ordain turin Pastoral Committee leh Assembly Executive Committee chuan a thlang a. Hei hi BCM History-a thil thar danglam tak pakhat a ni. He Ordination hi Pastor atana Ordain a ni lova, Woman Ordination pawh a ni chuang lo. Minister atana Ordain (Ordination for Minister) a ni. Dr. RL Hnuni Ordain tur hian BCM Pastoral Committee te, Executive Committee leh Central Committee te paltlang vekin Assembly ah Report a nih hnu-ah vawiin, March 11, 2012 hian Pro Pastro zir chhuak mi dang pang ate rualin ordain a ni ve ta a ni.

Assembly Rorel zo ta

 

 

Mizoram Baptist Kohhran Rorelna sang ber, BCM Assembly Rorelna chu vawiin tlai dar  5:30 khan an zo ta. Vawiin a an thu rel langsar zingah –  Pastor Bial pahnih – hawn thar leh ABC pakhat hawn remtihna te, Budget 2012-2013 pawm leh thawktu  nghet te  DA 10% a tihpun leh Contract basis te hlawh Rs. 500/-a tihpun te a ni. Heng bakah hian Post thar  15 hawn remtihna te, Hna chawlhsan te hmun ruak  5 hum dilna te a tel bawk.

 

Champhai leh Phuaibuang Bial atanga  Khawzawl Bial Thar Siam Dan Tur

CHAMPHAI BIAL KHAWZAWL BIAL PHUAIBUANG BIAL
Bethani Khawzawl Dinthar* Phuaibuang*
Bethel Vengchhak Khawlian
Kahrawt * Hmuncheng NE Tlangnuam
N. Khawbung Kawlbem  
Ngur Chiahpui  
Khuangleng

 

 
Zokhawthar

 

 
Zote

 

 

 

 

Thingsai leh Cherhlun Bial atanga Tuiphai Bial Thar Siam dan Tur

Thingsai Bial Cherhlun bial Tuiphai Bial
Thingsai* Cherhlun* Khawhri
Gilgal Kalvary Tarpho*
Nazareth Bethlehem Aithur
Bethel Ngharchhip  
Bualpui H New  Ngharchhip  
  Chawngtui  
     

.

 

 

 

 

 

 

 

 

Zopui ABC thar siam thu

Lunglei South ABC leh Lawngtlai ABC atangin  Pastor bial pathum la chhuakin  ZOPUI ABC Thar Siam remtih a ni a. Zopui ABC chhunga awm turte chu Zobawk Bial, Hrangchalkawn Bial leh Tawipui Bial te an ni ang.

 

 

 

Budget for 2012 – 2013

Department 2011-2012 2012- 2013 Variance % % of Budget
Central 106,306,000 126,567,400 20,261,400 19.06
Mission 102,270,000 117,979,000 15,709,000 15.36
Service 103,948,050 122,925,200 18,977,150 18.26
Total 312,524,050 367,471,600 54,947,550 17.58

 

Minute

 

Dr. RL Hnuni Ordain dawn ta

 

 

Naktuk Pathianni zing inkhawm hi Minister Ordination Service atana hman a ni dawn a. Hetah hian Probationary Pastor zo tawh mi panga leh Dr. RL Hnuni, Principal, AICS te ordain an ni ang. Rev. Dr. Raltawnga, BCM President thar chu Presiding Minister a ni ang a, thuchah a sawi nghal ang. Ordination Service hi Assembly neihna hmun, Electricveng Biak In, Lungleiah neih a ni ang.

 

Tun tuma Ordain tur zing ami, Dr. RL Hnuni hi 1951-ah a piang a, A pa chu R. Lalthianga(L) Ramlaitui(Lunglei Dist) niin a nu hi Khawngaihthangi(L) Hmuntlang(Lunglei Dist) an ni.  1975   ah NEHU-hnuaiah ah B.A. History 24th position niin Hons a zo a.  B.D 1979-ah   Bachelor of Divinity (B+ (High second Class)-ah a passed bawk.  1980-ah Rev. Dr. K. Thanzauva nen inneiin kum khat hnu-ah in Eastern Theological College, Johat-ah Lecturer-in an thawk dun a. 1983-ah M.Th  chu an nupa-in United Theological College, Bangalore-ah an zir a, Eastern theological College atanga tirh an ni, 1985-ah M.Th chu First Class-ah a passed.  Doctor of Theology:  D.Th chu  South Asia Theological Research Institute (SATHRI),Senate of Serampore College (University) United Theological College Bangalore-ah 1991-ah preparatory period kum 1 chhung a zir leh a, a pasal erawh chuan Whitley College, Melbourne-ah Admission a hmuh avangin September 1990-ah Australiaah a kalsan a. Kum khat preparatory period a tih hnu-ah research a ti thei chauh a ni.  1992-ah Exposure program Senate-in neih a phal a, an chhungkua-in Melbourne-ah a pasal zirna hmunah chuanan kal a. Research hna tak tak chu Melbourne-ah kum 2 chhung a thawk a, India ramah 1994-ah an lo kir hnuin Germany –ah 1995-ah Bochum University-ah a ziak chhunzawm a. Library hrang hrang Bochum Univ. Bielefeld, leh Wuppertal Hochshule  Library te hmang tangkaiin a thesis a ziak zova. Doctor of Theology degree chu 1997-ah Senate of Serampore-in Convocation, Mangalore-ah a pet a a ni. India ram pumah  hmeichhe zingah Old Testament subject-a M.Th  leh D.Th degree nei hmasa ber a ni.  

 

Mizoram Baptist Kohhran History-ah Hmeichhia, Minster atana ordain hi an la awm ngai lo va. Dr. RL Hnuni hi Ordain a nih chuan a hmasa ber a ni dawn a ni.  Assembly 2011-chuan Pastor ni lo, Minister-a ordain dan a siam thar a, chu Dan hmang chuan Prof Dr R.L.Hnuni chu Minister atan ordain turin Pastoral Committee leh Assembly Executive Committee chuan a thlang a. Hei hi BCM History-a thil thar danglam tak pakhat a ni. He Ordination hi Pastor atana Ordain a ni lova, Woman Ordination pawh a ni chuang lo. Minister atana Ordain (Ordination for Minister) a ni.Pi Hnuni Ordain tur hian BCM Pastoral Committee te, Executive Committee leh Central Committee te paltlang vekin Assembly ah Report a nih hnu-ah naktuk, March 11, 2012 hian Pro Pastro zir chhuak mi dang pang ate rualin ordain a ni ve dawn ta a ni.

 

Dr. RL Hnuni Chanchin kimchang zawkin

 

Propastor, Minister atana ordain tur midangte chu hengte hi an ni:-

 

         1)  H. Ramthianghlima

         2)  Joe Laldinpuia

         3)  Lalhnehliana

         4)  R. Lalremruata

         5)  ZD. Lalrozuala

Assembly Rorel Ni hnih chhunga thurel lagsar te

 

 

Assembly Rorelna tluang taka kalpui mek a ni a. Nihnih (Ningani leh Zirtawp Ni) chhunga an rorel thu passed langsar zualte lo tarlang i la:-

 

1. Mission Field thar-Arunachal –Far East Field hawn tura ruahmanna pawm te,

2. Rajbongshi hnam zingah thawh ve ni se tih te,

3. Mizotawnga Bible zirna (Bible School) AICS hnuaia din remtihna te,

4. Mission rawngbawl kum 75-na lawmna leh Missionary Conference 2014-a neih remtih thu te.

5. Ram pum huapin BCM hian Mission leh kan ram (India) pualin awmni khama tawngtai neih te.

6. Buarpui ABC huam chhungah kawngpui tha kan neih theih nan sorkar-ah thlen ni se tih te

7. Christian Hospital Lawngtlai-ah hian Doctor kan mamawhnate phuhruk turin Medical & Health Committee-in hma lo la zel rawh se, tih te.

8. Mizoram Baptist Kohhran hian Pathian thilsiam dangte humhalh kawngah inzirtirna neih nise tih te..

9. Shillong-ah BCM-in ram lei tur ngaihtuah ni se .. tih te a ni.

 

Heng bakah hian Assembly Executive Committee-in a lo rel fel tawh, Assmbly-a rel that leh pawmpui hran ngai tawh lo Report engemawzat a awm a, chung zinga langsar deuh te chu-

 

1. Nomination Committee member thlanthar report te

2. Probationary Pastor panga lak thar thu te

3. Dr. RL Hnuni – Minister atana nemngheh thu te,

4. Pro.Pastor Panga Ordain tura thlan chhuah thu te

5. Mission Pawl dang – 6 te nen MoU Sign remtih thu te,

6. Pu David Lalremruata Deputation-a Ph.D zir phalsak thu te

7. Motor hlui tihrala, a thar lei thu te
Minute Deatails:
Assembly 2012 Minute

 

Vawiin lamah ABC atanga thulut ngaihtuah chhunzawm mek a ni a, heng bakah hian Administrative Wiorking thu te, Service Department atanga thu lut te, Central leh Finance atanga thu lut bakah Budget an la hmabak a ni.

BMS Monument hawng dawn

   

Baptist Missionary Society(BMS) te rawngbawlna hriatrengna lungphun – BMS Monument, BCM Headquartes Office kawt, BCM Mual, Serkawna phun chu naktuk, March 11, 2012 (Pathian ni) tlai dar 4:00 hian hawn a ni dawn ta.  Hawnna Inkhawm hi Rev. H. Lianngaia, General Secretary-in a kaihruai ang a, Rev. Peter Dunn, BMS World Mission Director – U.K -in a hawng dawn a ni. He Monument hawnna programme hi Assembly neih mek priogamme chhungah dah a nih avangain Assembly Palaite pawh engemawzat tel tura beisei an ni.

He Monument-ah hian  Mizorama Missionary lo kal hmasa ber- Sap Upa leh Pu Buanga  te  lim (an awm chin chunglam) Sailungvar-a siam dah a ni a. Milim hnungah hian Monument pillar pathum  Triangle shape,  Marble Chips-a chei, ft.20 a sang, Triangle shape-in a ding thiang a. Piller pakhatah Mizorama lo kal BMS Missionary-te hming ziak tarlan a ni a. Piller pahnihna-ah chuan  BMS logo hnuaiah William Carey thusawi ropui leh Pathian leh kan Missionary te avanga lawmthu sawina thu a inziak a. Piller pathumna chu BMS Centenary pual bik deuha duan a ni a.  Tin, Piller pakhatna bang lehlamah hian BCM  BCM hruaitu hmasate (1903-2003) thleng hming tarlan a ni. Heng Piller pathum ding thiang te insuihfinna chhip-ah hian Kraws dah a ni bawk.  He Minument hual vel hian pangpar mawi tak awmze nei  takin phun vek a ni bawk.