Office khar ta

BCM hnuaia thawktu, ni tin Office kalte chuan December 21, 2011 atang hian Krismas chawlh an hmang dawn a; kum thar January 5, 2012-ah Office kal tan lehin January 6-ah Thawktute inhlan tharna hun hman a ni ang. Inhlan tharna programme hi Headquarters Office leh a chhehvela mite chuan Sap Upa leh Pu Buanga Hall-ah an hmang ang a; Lawngtlai leh Aizawla thawktute chuan Executive Secretary Office-ah a huhovin an hmang ang.

BCM Hqrs. Office chuan vawiin chhun dar 12:00 khan Office kharna inkhawm Sap Upa leh Pu Buanga Hall-ah hmangin Rev. C. Ngurhnema, AGS-in inkhawm a kaihruaia, kumtluana Pathian hruaina leh venhimna kawng hrang hranga kan chan te leh Pathian hnathawh ropui tak tak kan hmuhte avanga Pathian hnena lawmthu sawiin Krismas leh kumthar progamme hrang hrangah te Pathian rawngbawltu kan nih ang takin theihtawp chhuaha mahni awmna Tualchung Kohhran-ah te tan la tur leh Kum thar lo thleng tur pawh rilru thara hmuaka, inpekna thar nen thawk turin staff te a fuih. Inthlahna thingpui ruai buatsaihin kumin 2011 atan Office an khar ta a ni.

BYFI President thar

 Rev. Samuel Lalremsanga India ram pum huapa Baptist Thalai pawl, Baptist Youth Fellowship of India (BYFI) inkhawmpui lian December 9-11, 2011-a Andra Pradesh-a neih zawh takah chuan hruaitu thar an thlang a. BYFI President atan tuna MTKP Organiser, Rev. Samuel Lalremsanga chu thlan a ni. He mi rual hian MTKP Fin. Secretary, Pu Victor Lalrinawma Sailo chu Executive Committee member atan ruat a ni bawk.

HATIM Campus thar kut thlak tan

Kar liamta Inrinni (December 10,2011) khan Higher and Technical Institude, Mizoram (HATIM) Campus thar Kawmzawl ram a mi chu Ground Breaking Ceremony neih a ni.

Inkhawm tawite buatsaihah Rev H. Sangchema Director Education Department-in a kaihruai a. Dr Chawngthanpari chuan helai hmun Pathianin a pek anih dan te a sawi a. Rev Dr K Thanzauva’n thu sawi velehin Ram siamthra turin mithiam, hmathlir dik a mamawh a, chutiang bawkin Institution-in a mamawh mithiam Pi Chawngthanpari kan nei hi kan vanneihna a ni a ti.

Thusawi zawhah hna tan nan lei a chek hmasaber a, Rev H.Sangchema leh Dr Chawngthanpari te’n an dawt leh a. Hemi ni a hnatlang hmasa ber Serkawn Unit BMP President Pu Chhunkunga Ralte leh Secretary Pu P.Lianngura ten chek velah in hnathawh zui nghal a ni a, Serkawn BMP te leh College Student te’n nilengin a hmun hma an sam fai hnatlang neih zui a ni a, he hnatlang-ah hian mi za chuang zet an thawk a ni.

Mission News Updates

 

• Ringthar: December thla hian Ramchhung Mission a kan rawngbawlna Chakma hnam zingah ringthar mi 61 Baptisma chang thar an awm. Zohmunah mi 21, Bawlpu 1 a tel a, Phairuangkaiah mi 18 leh Udalthana ah 6, Buddhist Puithiam ‘Bante’ an tih a tel bawk. Longpuighaat-ah Baptisma Ni 13 thawhlehni khan mi 16 in an chang a, an zinga 1 phei chu kum 9 lai Buddhist Puithiam hna lo thawk tawh ‘Bante’ a ni. Heng ho hi kan hriat theih dan tur chuan khawlai-a lukawlh, puan senduk sin kan hmuh thin te an ni. Kumin chhung hian Longpuighaat Circle-ah hian ringthar Baptisma chang 188 zet an awm tawh a ni. Lalpa hnenah lawmthu i sawi mawlh mawlh ang u.

 

•Tawngtai:  Chawngte L Kohhran Mission Committee chuan Dec 16 atanga ni 18 chhung khan Ngharum, Chakma Baptist Kohhranah chaw nghei tawngtai an hmang. An Kohhran hian Longpuighaat Circle-ah Evangelist 1 an ruai bawk

 

•Camping:  Ni 14 atanga ni 17 chhung hian Tuichawng Chakma Kohhranah Chakma Circle Team hmangin Camping neih ani a, He Camping hi Ramhlun N Kohhran Aizawl leh Aizawl East Pastor Bial te thilpek hmang a buatsaih ani.

 

•Work Camp:  Ni 14 atanga ni 17 hian Zohnuai Kohhran te Bolisora-ah Missionary Quarter sa-in Work Camp an nei a, Zan lamah Longpuighaat Chakma Team-in, Pu Jomadona Speaker hovin Audio Visual hmangin Crusade an nei bawk. Ni 17 hian Zohnuai Kohhran BMP President Pu. R.Rohmingthanga Work Camp tura kal a, Accident-a thi ta hriat rengna lung chu an Accident na hmun ah an phun nghal.

 

• Zin chhuak: Rev.Dr K.Lalrinthanga A.G/S i/c Mission te nupa chuan kan Mission Field Andaman & Nicobar Islands ah Krismas hman an tum a, Mission Promoter Pu H.S Lalhmingthanga pawhin Ziro Arunachal West Field-ah Krismas a hmang dawn bawk.

 

• Tunlaiin kan Mission Field a bikin Tripura leh Arunachal Pradesh-ah Krismas Carol ngawrh takin an hmang a, Kohhran in tinah an tawngtai thin ani.

Admin Note:

Chawlhkar hnih lai thanga Delhi-a ka zin avangin BCM News kan up-date lo va, Visitors te hriatthiamna ka ngen a. Tunah chuan dam takin Office ka zawm ve leh ta e.

Rev.HC Vankairinga-Chatuan ramah

Rev.HC Vankairinga, AICS-a Dean of Ministerial Training Programme chelh mektu chuan December ni 11 (Pathianni) chhun dar 1:40 ah khan kal na avangin Lalpa hnenah min lo chawlhsan ta. Amah hi 1957 ah Thingkah khua ah lo pianga Unau 8 zinga a upa ber a ni. 1985-1987 ah ETC Jorhat-ah B.Th a zir a, zirna-ah a tih that em avangin College hotute’n Mature Candidate-in BD zir an remtih sak a. 1990 ah BD zovin, a zirna hmunah hian Junior Lecturer turin an sawm nghal a. Kohhran lamah zirzawm zel a rem tak loh avangin Bial lamah Pastorin a awm a.

1994 khan Diltlang Pastor bial-a rawng a bawl laiin a nupui K.Ropari chuan nau chungah a boral san hlauh mai a, nu thihsan naute leh a u te 2 chu a enkawl ta a. Hun engemaw chen Pastor hna a thawh hnu-ah UBS Pune atangin M.Th zir leh in 2000 kum khan B+ ah a zo a. Kum 2001 khan Kawlthanmawii Kawlni nen innei leh in fapa 1 leh fanu 1 an nei. Kum 2000 kum khan a kal thlak sak (Kidney Transplant) a lo ni tawh a ni.

Amah hi BD. M.Th Degree nei, AICS tun dinhmun a thlen theihna tur a a kil a lung tangkai ber te zinga mi ani a. A thiamna Kohhran hote tan a thahnem ngai tak a hmang thin tu ani. A Vuina Inkhawm AICS Chapel-a neihah hian heng mite hian thu an sawi. BCM, aiawhin Rev.C.Ngurhnema, AICS aiawhin Principal Dr. RL Hnuni, Mizo Theological Association ai awhin President. Rev Dr. Lalchhuanawma, Thlamuanna thuchah Rev. Dr. K. Thanzauvan a sawi a, Tuivamit thlanmualah ropui tak a vui liam a ni ta a ni.