Palm Sunday – April 9

April 9, 2017 (Pathianni) hi Kristiante ni pawimawh – Tumkau Pathianni (Palm Sunday) a ni a. He Ni hi khawvel pumah Kristiante chuan urhsun takin an hmang thin a, Mizoram Baptist Kohhran pawhin Kohhran Nipawimawh zingah telhin urhsun takin kan hmang thin a ni. Kumin Tumkau Pathianni thupui chu ‘“Lalpa hminga Lal lo kal chu fakin awm rawh se!” (Luka 19:38) tih a ni ang.

 

Ni Pawimawh-a hman a lo nih dan :
Tunhma lam khan BCM Ni pawimawh (special days programme)-ah Tumkau Pathian ni hi telh thin a ni lova. Kum 2012 atang khan Ni pawimawh programme-a telh a ni ta a ni. Kristiante ni pawimawh, a ni leh thla pangngai reng lo chi (movable feast) an tihte zinga pakhat a ni a, March leh April thla chhungah a thleng thin.

Tumkau Pathianni :
Tumkau Pathian ni hi Lal Isua, Jerusalema lal a nih anga a luh ni hriat rengna ni a ni a. Pathian ni a nih bakah Kristiante tan ni pawimawh bik, Lal Isua lal a nihna puan chhuah thar lehna hun leh amah chawimawina ni atan hman a ni. Hetianga hmang hmasa bertute chu Jerusalem kohhran an ni a, kum zabi 4-na tawp lamah an hmang tan chauh niin sawi a ni. A tak taka Lal Isua Jerusalem-a lal anga a luh atanga kum 300 hnu daihah he ni hi serh tan a ni chauh tihna a ni.

Tumkau Pathian ni hi ‘Hnehna nena (Jerusalema) luhna ni’ (Triumphal Entry) ti pawhin sawi a ni bawk. He hun hi a pawimawh em avangin Chanchin Tha bu ziaktu palite hian an ziak theuh a ni (Matt.21:1-17; Marka 11:1-11; Luke 19:28-42; John. 12:12-14). A pawimawhna chhan chu:
1) He khawvela a awm chhunga vantlang hriat khawpa langsara Jerusalem khua a luh chhun a ni.
2) Tisaa a awm chhunga mipui vantlang chawimawi a hlawh ve tum a ni.
3) Vantlang hriata Lal a nihzia tarlana a awm tum a ni.

He ni ropui takah hian mipui zinga a tam zawkin Lal Isua kalna kawngah chuan an puante an phah bakah thinga mi chhawl an sat a, an phah bawk tih Matthaia chuan a sawi a (Matt.21:8). Johana chuan Jerusalem mipuiten tumkau kengin an hmuak, a ti a (John 12:12-13). Lal Isua chu Galili ram atangin a thilmak tih hmutu tam takin an rawn zui a, Jerusalem khawpuia cheng, amah ringtute’n an lo hmuak bawk a, amah rawn zuitute leh lo hmuaktute chuan rilru hmun khatin Lal Isua chu an theih tawkin an chawimawi a ni. Chutianga amah ngaisangtuten an chawimawina chu chhunzawmin, tumkau/hnahchhawl chawiin Lal Isua chawimawina kawng zawh hi Kristiante zingah neihzui a ni ta zel a ni. Tumkau Pathian ni-ah hian Lal Isua chawimawia tumkau nena kawng zawh hi naupang (KNP) tih turah kan dah deuh niin a lang a, a tawk lo hle. Jerusalem chhehvela mipui, Lal a nihzia la hre chiang tak tak lotute mahin khati khawpa an chawimawi chuan, keini a hre chiangtu, thinlung tihvar tawhte hian theihtawpa chawimawi hi kan tih ngei tur a ni.

Posted in BCM News.

Leave a Reply

Your email address will not be published. Required fields are marked *