Pastor bial thar -3 hawn a ni dawn

Mizoram Baptist Kohhran, Assembly 2020-in Pastor Bial pathum – Chawngte ‘L’;  North Vanlaiphai leh Mampui Pastor bial thar hawn tura a lo passed angin, May 30, 2020 (Inrinni) hian Pastor thut hmun tur theuhah Bial thar hawn programme hman a ni ang. Heng Pastor Bial thar hawn programme te hi Covid-19 avanga lockdown kalpui mek lai a nih avangin Sorkar-in inkaihhruaina a siam ang leh pun khawm phal chin ruahman angin kalpui a ni ang.

Mampui Pastor bial hawnna Inkhawm hi BCM Biak In, Mampui-ah neiin, Rev. R. Lalnunzira, Executive Secretary, Lawngtlai Area-in Bial thar hi hawngin thuchah a sawi ang a, Rev. K. Laldosanga, Bialtu Pastor, Lawngtlai ‘S’ Bial-in Bial hruaitu thar te hlanna neiin, Rev. B. Rosangzuala, Bialtu Pastor, Mampui Bial-in malsawm tawngtaiin hun a khar ang.

Mampui Pastor bial hi Diltlang leh Lawngtlai ‘S’ Pastor Bial atanga indang a ni a, Tualchhung Kohhran pali – BCM Mampui (member 352) BCM Gilgal, Mampui (member 136), BCM Moria, Ngengpuikai (Member 86) leh BCM Ngengpuikai (member 84) niin, an vaiin member 639 an awm ang.

Chawngte ‘L’ Pastor bial hawnna Inkhawm hi Zion Kohhran, Chawngte –L ah neiin, Rev. C. Chhungtluanga, Pastoral Coordinator-in Bial thar a hawng ang a, Rev. Zadingliana Pachuau, Bialtu Pastor, Lungrang’ Bial-in Bial hruaitu thar hlanna a neih hnuah Rev. H. lalremsanga, Bialtu Pastor, Chawngte L Pastor Bial-in malsawm tawngtaina-in hun a khar ang./p>

Chawngte L Pastor bial hi Lungrang Pastor Bial atanga indang an ni a, Tualchhung Kohhran pathum – BCM Zion, Chawngte L (member 530) BCM Rualalung (member 187) leh BCM Sailen(member 104) niin, an vaiin member 821 an awm ang a.

N.Vanlaiphai Pastor bial hawnna Inkhawm hi BCM Biak In, North Vanlaiphaiah neiin Rev. Dr. R. Lalthanmawia, Executive Secretary, Aizawl Area-in Bial thar a hawng ang a, Rev. K. Vanlalmuana Bialtu Pastor, Serchhip Bial-in Bial hruaitu thar te hlanna neiin, Rev. Lalsanglura Sailo, Bialtu Pastor, N. Vanlaiphai-in malsawm tawngtaiin hun a khar ang.

North Vanlaiphai Pastor bial hi Serchhip Pastor Bial atanga indang an ni a, Tualchhung Kohhran pathum – N. Vanlaiphai (member 94) Lungkawlh (member 65) leh Khawlailung (member 84) niin, an vaiin member 243 an awm dawn a ni.