Pastor Senior Rev. R. Zopianga kan then ta

Rev. R. Zopianga (Kum 82) chu Pneumonia natna avangin July 4, 2020 (Inrinni) zan dar 7:30 khan Christian Hospital-ah boralin, a rawng a lo bawl thin Lalpa hnenah a chawl ta.

A tuk Pathianni chhhun dar 12:00-ah a chenna In, Zobawk-ah vuina programme neiin Zobawk thlanmualah ropui taka thlahliam a ni. Amah thlahna, Vuina Inkhawm hi Upa Roliana, BCM Ebenezer-in kaihruaiin, Rev. Lianruaia, Bialtu Pastor-in thuchah a sawi a, BCM aiawhin Rev. F. Ramdinmawia, General Secretary-in thu a sawi bakah Bial leh Tualchhung Kohhran aiawhin  Upa R. Lalrinawma’n thu a sawi bawk.

Rev R Zopianga hi September 4,1938-ah Sairêp-khuaah a lo piang a. A pa chu Lianthâwma a ni a, Kum 1952-ah Sairêp-ah Pastor Thanchhînga’n Baptisma a chantîr. Kum 1960-1962 khân Aizâwl Theological College-ah Diploma a zir zova, Kum 1967-ah PC. Sawithangi nen inneiin fapa pahnih leh fanu pathum an nei a. 1978-1980-ah TC Jorhat B.Th a zir zo leh a. April ni 1, 1963-ah Pro. Pastor atan lak niin, Tuithumhnar Bial-ah rawngbawlna hna a thawk tan a ni. 1964 March Assembly, Lunglawn-a neihah Minister atan Rev.HS.Luaia’n a nemnghet.

Pastoral Ministry-ah kum 40 lai (1963-2003) a thawh chhungin pastor bial pariatah a awm hmana a. Chungte chu: Tuitumhnar bial, Zobawk bial (tum hnih), Lungsen bial, Haulawng bial, Theiriat bial, Hnahthial South bial, Bazar bial leh Hnahthial North bialah te a ni.

BCM chuan Pastor Senior tlemte zing a mi, Pathian leh a Kohhran tana sulsutu a chan ta mai chu hrilhhaithlak a ti takzet a. Lalpa rawng a lo bawl tawhna te a ngaihluin a chhuang takzet a ni. A kalsan a tu leh fate Lalpa’n awmpui zel se tih hi kan tawngtaina a ni.