Phar Pual Pathianni hmang dawn

Lunglei, Serkawn:22nd January 2020:
Tunkar Pathianni, January 26, 2020 hi “Phar pual Pathianni” (The Leprosy Sunday) a ni a.  He Ni hi Mizoram Baptist Kohhran chuan urhsun takin a hmang thin a, kuminah pawh Tualchhung Kohhran tinah  hemi pual hian Pathiani zing Inkhawhah hun hman a ni ang. Kumin Phar pual Pathianni thupui atan ‘Pharte hnen thleng phak Chanchin Tha (Leviticus 13:45-46)tih thu hman a ni ang.

Phâr pual Pathian ni (Leprosy Sunday) hi kum 1943 atangin BCM chuan a lo hmang tawh thin a. Kum 1947-ah Assam Kristian Council chuan a huam chhunga Kohhrante chuan Phâr pual Pathian ni siam a, he mi nia thawhlawm pawh chu The Leprosy Mission tanpui nana pek thin a ni. Kum 2006 Assembly-chuan  Phar pual Pathianni atan January Pathianni vawi 4-na kan hman thin hi, January Pathianni hnuhnung ber-ah hman ni ve tawh rawh se” a tih angin, Khawvel puma Pharpual Pathianni an hman rualin January Pathianni hnuhnung berah hman a lo ni ta a ni. Hemi nia thilpek tlingkhawm hi BCM pawisa luh dan pangngaiin BCM Headquarter’s office-a chhun luh vek tur a ni.

…………………..

Thu chhiar chhuah tur

The Leprosy Mission Mizoram hi sawrkara Firm & Society Registration Act hnuaiah fel takin, ‘The Leprosy Mission, Mizoram’ tih hming pu-in a in register thlap tawh a. Kum 2015-a BCM biak in Serkawna NEICC inkhawmpui pawhin, ‘The Leprosy Mission, Mizoram’ tih hming pu bawk hian an Associate member-ah min lo pawm tawh bawk a ni.

The Leprosy Mission Mizoram hma lak mekna:

1) Andra Pradesh State chhunga Guntur District chhunga Block Headquarters pakhat, Bapatla khuaah khuan phar colony lian tak a awm a, a hming chu Bethany Leprosy Colony a ni a. He Colony hi kan enkawl mek lai chu a ni. He Colony hi India rama Leprosy Colony lian ber a ni a, chhungkua 341 awmin, mihring 1200 vel an cheng. Phar enkawl ngai 225 leh phar natna avanga rualbanlo, piansual phah mi 205 an awm. Heng pharte hi kut zungtang leh ke zungtang pan chhum tawh te, kut bul leh ke bul-te, mit delte leh taksa peng hrang hrang hmelhem tawhte an ni. Hospital, mipa ward leh hmeichhe ward khum 10 ve ve awmna a awm a, heng khumte hi a ruak hman lo. Phar naupang leh phar fate School dangah an hnawn thin avangin Elementary School (Nursery-Class V) din a ni a, zirtirtu pali leh naupang 50 vel an awm.

2) Tlabung hmuna Leprosy Hospital-a phar la awmte tanpui.

3) Mizoram chhunga phar natna veite zawn chhuah leh a theih ang anga an tisa leh thlarau nun dawm kan leh tanpui.

4) Mizoram pawn, a bikin India hmar chhak biala phar awmna Colony-te zawn chhuah hna kalpui mek a ni. TLM Mizoram chuan pharte hnena taksa, rilru leh thlarau damna tura rawngbawlsak hi a Mission a ni a. Pharte thlarau nun chhan chhuah hi a rawngbawl chhan bul ber leh a ngaih pawimawh a ni.

…………………………….

 

Related Article:

Phârte hnên thleng phâk chanchin tha

Rev Dr. Lalzarliana
Former Promotional Secretary

Kuminah hian Thupui pawimawh tak mai “Phârte hnên thleng phâk chanchin tha” tih chu TLM Mizoram chuan Leprosy Sunday-a Kohhranhote hnêna puan chhuah atân a rawn chhawp chhuak a. He thu hi Kohhran hrang hrangah mi tin ta tur chanchin tha Lal Isuan a rawn thlenah hian chanhai leh riangvaite, Phârte pawh an tel ve a, kan chanchin tha hrilnaah hian a huam tel ve a ni tih puan chhuah a nih theih nân leh Lal Isua ringtute hian thlei bîk nei lova Isua chanchin hi la hre lote hnênah kan puan chhuah a tûlzia tlângaupui a tûl vânga tih a ni.

Engtik lai mahin Andra Pradesh khaw pakhat Bapatla khaw daifêm tuifinriat kam ah khuan phâr khawngaihthlâk tak tak, tanpui ngai êm êm khu an awm a ni tih India ram puma chanchin tha thehdarh tum Mizo Kristiante hian kan hre ngai lo. Khûng ho khuan Lal Isua hi an mammawh a ni, an hnênah i hrilh teh ang u, tia au chhuahpui tu pawh an awm hek lo. Khawvêl hmun hrang atanga tanpuina chhe tê tê an hmuh hmangin an lo kal ve lauh lauh a. Nimahsela chûng mite chuan an tinsan zêl tawh si a.

Enkawltu mumal nei lova awm te chu Lal Isuan an boral mai phal lovin Makedonia ramah lo kai la min pui rawh tia Paula aw hriat tluk zetin TLM Mizoram te thinlungah thu a han sawi ta a. Kohhranten an duh lo chung chunga chanchin tha hril tûra kan ûm kan ûm India ram State hrang hranga Lal Isua ring lote, kan Missionary-te ti duhdah a, vau a, kutthlâk hialtute pawh min tîrtu avânga kan kiansan phal loh lai hian. Hêng Phâr natna vei, mite thinhrik leh hnâwl, an hnawhchhuahte pawh hian Lal Isua hi an mamawh ve tho asin tiin phârte hnên thleng phâk chanchin tha hi i hril ve ang u, tiin kan han au chhuahpui ve leh a ni e.

Tûn hunah hian TLM Mizoram rawngbâwlna hmun Bethany Colony-ah khuan Phâr chhûngkua 134 an awm a, Phâr dam tawh leh enkawl ngai bâkah an tu leh fate nên mihring sâng chuang an awm a. Enkawl 173 awmin a na zual enkawlna Leprosy Care Centre ward-ah mi 20 dah an ni. Mi 173 ward-a enkawl an tûl êm êm laiin khum 20 awm theihna chiah a awm a, chu chu an enkawl theih tâwk a ni. Kâr tluanin Kristian leh Kristian lote pawh |awngtai inkhâwm leh Pathian Biak inkhâwm zîng leh zânah neihpui thin an ni a. Chawlhni inkhâwm phei chu Colony-a mi zawng zawng an lo kalkhâwm emaw tih mai tûrin an uar a ni. Krista chanchin tha hrilhna remchâng tak leh mihring dinhmun chhe tak chhanchhuah theihna remchâng takah hian Lalpan Mizo Kristiante hi min mammawh a, an hnên thleng phâk chanchin tha hi i ngai pawimawh teh ang u tiin min sâwm a ni e.

Posted in BCM News.

admin