“Phar pual Pathianni” (The Leprosy Sunday)

Tunkar Pathianni, January 30, 2022 hi “Phar pual Pathianni” (The Leprosy Sunday) a ni a.  Mizoram Baptist Kohhran chuan he ni hi kum tinin urhsun takin a hmang thin a ni. Kumin-ah hian Phar pual Pathianni thupui hranpa dah a ni lo va, Kohhran Nipawimawh Programme-ah Phar Pual Pathianni chungchang leh Phar zinga rawngbawl dan tlangpui ziakin dah a ni a, Thuchah sawitu-in emaw, Tualchhung Kohhran Committee-in tha an tih angin he Ni hun hman dan tur chu ruahmanna an siam ang.

……………………….

India ram hi khawvela phar tam berna ram a ni a. Phar zinga rawngbawlna bul intanna pawh a niin, tunah chuan khawvel ram 51 ah The Leprosy Mission (TLM) chuan rawngbawlin hma a la ta mek a ni. Irish tlangval Wellesly Cosby Bailey chuan India rama phar khawngaihthlak tak tak, enkawltu tha leh awmna hmun mumal pawh nei lova, hmun remchang laia an dah khawm mai mai, ngaihsak pawh hlawh lote a hmuhin a khawngaih em em a. A thinlungah chung mite rawngbawl sak chu Pathian hna tul ber nia ngaiin, kum 1874 ah India rama khaw pakhat Ambala khawpuiah harsa takin bul a tan ta rawih mai a. Hei hi khawvel pum huapa pharte enkawl tura pawl din hmasak ber leh upa ber a ni. Tunah hian India rama phar tamna State 10 ah Hospital, Mercy Home, Vocational Training Centre leh Community Based Centre te hmangin rawngbawlna kalpui mek a ni. India ramah hian TLM chuan phar enkawlna Hospital 14 a nei mek a. Phar dam lehte eizawnna tur zirtirna Vocational Training Centre 6 neiin, Mercy Home 5 a nei bawk.

TLM rawngbawlnaa BCM inrawlh tanna chu July 1, 1975 ah Rev.KD Siamlianate nupa, Bhutan rama kan Missionary ten East Mongar-a Phar Damdawiina an thawhna kha a ni. Hun inher danglam leh Sorkar tharah kalphung pangngai thlaka thil thar tam tak a lo chhuah tak avangin, Mizorama The Leprosy Mission Trust rawngbawlna chuan a kal zelnaah harsatna tawkin, ram chhung leh ram pawn atanga tanpuina sum chetvel naah kalpui zel rem lohna chin a lo awm ta a.

Amaherawhchu Pharte zinga rawngbawlna chu chawlhsan mai lova chhunzawm zel a nih theihna turin The Leprosy Mission Mizoram chu kum 2017 ah khan din a lo ni leh ta a. Tunah hian Bethany Colony Leprosy Association (BCLA) te nena thawk hovin, Andra Pradesh State a Guntur District chhunga Bapatla khuaa phar enkawlna hmun (Colony), India rama phar enkawlna hmun lian berah TLM Mizoram chu a bung chhunzawm ta zel a ni.

Hetah hian phar 1200 vel zet enkawl mek an ni a. Hei bakah hian Mizoram chhunga phar natna veite zawn chhuah leh enkawla, tisa leh thlarauva chhan chhuah leh chhawmdawl hna thawh zel hi TLM Mizoramin a tum chu a ni.

Phar Pual Pathianni atan TLM chuan January thlaa Pathianni hnuhnung ber hi a hman thin avangin BCM pawhin he ni hi tidanglam lovin a hmang zui ve ta zel a. Hemi nia thawhlawm pawh TLM rawngbawlnaa hman turin BCM Hqrs Office ah thehluh tur a ni a, Aizawl leh Lawngtlai Area-a awm ten ES Office kaltlanga pek tur a ni e.