Phawngpui South Pastor Bialin Lawngtlai DLTF-ah tanpuina an hlan

November 27, 2020 khan Mizoram Baptist Kohhran, Phawngpui South Pastor Bial chuan COVID-19 do nana a tul apianga hman turin Lawngtlai District Level Task Force (DLTF) hnenah pawisa fai Rs 10,000/- (sing khat) an hlan.

Tanpuina hi BCM Phawngpui South Pastor bial ai awhin BCM Lawngtlai Area Executive Secretary Rev. R. Lalnunzira’n Lawngtlai DLTF Chairman, Bawrhsap Dr Andrew H. Vanlaldika kutah a hlan a ni.

Bawrhsap Dr Andrew H. Vanlaldika chuan Lawngtlai District-ah tlawmngai pawl, kohhran leh mi thahnem ngaite’n sawrkar thawhpui a, an tha tihchak nana sum leh thilpek chi hrang hrang an pe thin chu lawmawm a tih thu a sawi a. He’ng thilpekte hian sawrkar a chhawk zangkhai hle a, hripui dona kawnga sawrkar, tlawmngai pawl, kohhran leh mipuite tan rualna tilangtu a ni, a ti.