President Elect-ah Rev. Lalbiaksanga Chinzah

Mizoram Baptist Kohhran Rorelna Sang ber, BCM Assembly vawi 121-na, Rorel Inkhawm nikhatna chu  tluang takin an zo a, vawiin-ah rorel hi an chhunzawm leh mek a ni. Chanchin kan lakkhawm lai hian Assembly Rorel palai inreport zat hi chiang taka hriat theih a la ni lo va, Reception Department lam atanga hriat theih chinah palai 1054 an ni.

Nimin-a Assembly Rorel Inkhawm hun hmasa lamah Rev. Lalthangliana Hnamte-in kaihruaiin Devotions hun hman zawhah President thar Rev. H. Lianngaia hnenah BCM President nihna a hlanin, Rorelna thuthleng a kian nghal  a.  President thar Rev. H. Lianngaia hian Rorel a kaihruai nghal a ni.

Hun hmasa lamah President Elect thlanna neih a ni a. Rev. Lalbiaksanga Chinzah chu President Elect atan lungrual taka thlan tlin a ni a, BCM Constitutionin a sawi angin kum 2017-2018 chhung President Elect niin, 2018-2019-ah BCM President a ni zui dawn a ni.

Chanchin buatsaih lai hian thu rel dang hriat theih a la tam lo va, General Secretary report ngaihthlak leh Zawhna leh inhrilhfiahna hun atan hman a ni. Tin, Department thu te leh Assembly Executive thu, Assembly-a pawmpui tura tlen leh reoprt te ngaihthlain pawmpui an ni bawk.

Assembly 2017 Rorel lai

General Secretary report (BCM Statistical Handbook) atanga a lan danin Tun dinhmunah Mizoram Baptist Kohhran-ah Area Baptist Council 14, Pastor Bial 83, Tualchhung Kohhran 677 an awm mek a. Kohhran member zawng zawng 172,254 an niin, Chhungkua 35,467 an awm a ni. BCM hnuaia Minister (Pastor) Active Service – 139 an awm a, Probationary Pastor – 19, Kohhran Upa-3082 leh Rawngbawltu – 4374 an awm a. Minister Pensioner la dam 38 an awm bawk.

Kum 2016 April – February 2017 chhunga BCM Target pumpui (Church Contribution) chu     Rs   450,796,000.00 a nih laiin Rs.  395,691,560.00(87.78%) hmuh tawh a ni a, Report ziak lai hian March thla target a la luh loh avangin kum pumpui sum dinhmun a hriat theih rih loh a ni.

Mizoram Baptist Kohhran hnuaiah Mission Field & Station – 24 awmin, chung zinga 8 chu Foreign Mission(Partnership) an ni a,  Missionary leh Local Worker –968 Mission Field hrang hrangah an bung mek a,  Kum 2016 chhungin ringthar baptisma chang 4856 awmin, Fellowship 23 leh Kohhran thar 27 din a ni bawk. BCM Mission Field-ah School 59 awmin,  High School-15, Middle School-5 leh Primary School-40)   (AGS Mission Report)

Related Links for this post:
Bio data of – Rev. H. Lianngaia
Bio data of – Rev. Lalbiaksanga Chinzah

Assembly 121 – Zanin atangin
Assembly 2017-Information:
Assembly 2017 Programme
Asembly 2017 atan inpeih
Assembly Mikhual thlen dan tur
Asembly Sawmna(Video Clip)

Posted in Uncategorized.

Leave a Reply

Your email address will not be published. Required fields are marked *