Pu C. Lalzarzova ropui taka vui liam a ni ta

Pu C. Lalzarzova, LDC,  R&D Department, BCM chu June 10, 2021 tlai dar 03:50 p.m khan a chenna BCM Quarters, Ramzotlang, Serkawn-ah Nerve  natna avangin Chatuan ram min pan san ta. Zan-ah tlaivarpui niin, a tuk, June 11, 2021 (ZIrtawpni) -ah vuiin, Serkawn thlanmuala-ah ropui taka thlah lian a ni.

Vuina Programme hi an chenna Quarters-ah neih niin, Upa K. Rochungnunga’n a kaihruai a, BCM aiawh-in Rev.  R. Lalbiakliana, AGS (Service)-in thu sawiin, chhungkaw aiawh-in Pu C. Lalzarzoa nau, Pu Lalrinchhana’n thu a sawi bawk. Rev. V. Rev. V. Laltlanzuala, Bialtu pastor, Serkawn  Bial-in vuiin thuchah a sawi a, Rev. R. Lalbiakliana’n malsawm tawngtaina-in Vui inkhawm a khar hnu-ah thla lakpui niin, thlanmual lam panpui a ni a. Thlanmuala-ah Rbt. R. Vanlalthiana, BCM Ramzotlang-in tawngtaiin a thlah liam ta  a ni.

Mizoram Baptist Kohhran chuan Pu C. Lalzarzova hi a uiin a sun takzet a. Thahnem ngai taka rawng a lo bawl tawhna te hre rengin a rawngbawlna avanga lawmthu sawi chungin ui leh zah takin thlah liam ta a ni. A kalsan, a nupui  leh a unau te, a chhung te leh a rawngbawlpui zawng zawng te Lalpa’n thlamuanin awmpui zel rawh se.

…………………..

PU C. LALZARZOVA CHANCHIN TLANGPUI

C. Lalzarzova hi April 18, 1966 ah Pu C.Lalfaka leh Pi Nuchhungi te inkar ah alo piang a. An unau hi pali niin a upa ber dawttu a ni. An unau upat dan indawt in;
1) C. Lalnghakmawii w/o Upa V. Denghlira, Chanmari-II, Lunglei
2) C. Lalzarzova h/o Lalmuanpuii, Ramzotlang
3) C. Vanlalruati w/o Lalngura, Champhai Vengthlang
4) C. Lalrinchhana h/o Lalzarmawii, Zobawk.

Rambuai sawikhawm avangin Ralvawng atangin Zobawk ah an pem a, Zobawk ah hian seilian in Primary atanga High School (HSLC) a zir a. Lunglei Government Collge ah kal chhunzawm in, heta tang hian PUC a zo a ni.

September, 1992-ah Lalmuanpuii, Zobawk nen innei in fa pathum an nei a. An fa te chu –
1) Jacob Zaithanmawia, 2) C. Rosangpuii leh 3) C. Lalruatpuii te an ni.

Pu C. Lalzarzova hi a tlangval lai atanga kohhrana inhmang tak a ni a. Zai ngaina tak, zai leh hlaphuah thiam ni in, Pathian hla chauh sa thin a ni. Radio Artiste (B high) a ni a. Hetia a han boral hian a pual in Lunglei Radio Station chuan June ni 10 zan dar 7 khan hun an hmang nghe nghe a ni. Hla engemawzat Radio ah a khung a, amah hian hla pawh engemawzat a phuah a ni. A hlaphuah zing ah R. Lalhmingmawia sak ‘Jerusalem Thar Nuam’ tih chu tunlai hian ngaihthlak a hlawh hle a ni. Tualchhung Kohhran leh Bial Zaipawl ah a inhmang nasa a, Zobawk Bazar Unit TKP ah pawh hruaitu (Secretary) te lo ni tawh in, a theih ang tawka kohhrana inhmang thin a ni.

Naupan tet atanga nu leh pa thuawih tak, an thu hnial zen zen lo a ni. Mi dang pawisawi hlau tak, mi zaidam leh nunnem a nih avang hian thenrual leh chhungkhat te ngainat a hlawh hle a. A hnathawhna-a a thawhpui ten an sawi tam ber pawh a zaidamna leh mi pawi sawi a hlauhna te hi niin, thawhpui nuam tak a ni.

1994 kum tawp ah BCM Relief & Development leh World Vision te thawh hona ah Project Staff-a lak a ni a, accounting a thiam avangin Accountant leh Cashier ah hman a ni thin a. A hanthawh dan ah hotute mit a tlung in an lung a awi hle a, Project Staff anga hun engemawchen a thawh hnu ah, April 1, 2000 khan LDC-ah BCM thawktu pangngai atana lak a ni a, Relief & Development Department ah bawk awm zui in, Cashier ni in, account lam bawk khawih chhunzawm tir a ni a, he hna hi a thih thleng in a thawk a ni.

Kum 1995 atangin an chhungkua in R & D quarters ah rawn insawn in, Kohhran ah pawh Serkawna an lawi lai in KNP ah hruaitu niin Zai lama tui alo ni bawk a, naupang hla zirtir lamah a tangkai hle a. Ramzotlang an indan hnu ah, KNP zirtirtu ah ruat chhunzawm nghal niin, KNP hruaitu hlun a ni reng a, Sunday School lamah pawh Intermediate zirtirtu a ni bawk. BMP lamah pawh a phak ang tawka inhmang in a natna in a man tantirh lai thleng hian BMP Male Voice ah te pawh a tel a ni.

A Nat Dan.

Kum 2017 September thla atanga insawisel tan in, a ke hmawr a zawi thu sawi in, a zual tial tial a, Aizawl lamah Doctor te rawn in, an inenkawl chho a. A harsatna hian ziaawm lam ai in zual lam a pan chho hret hret a, Office erawh a la kal ve hram hram a. A nerve tha lo, a ke atanga intan chu zual zel in a taksa dang ah a kangkai zel a, kum 2018 May thla atang phei chuan Office kal hleithei lovin a bawksawp chho ta a. Heta tang hian that lam pan hleithei tawh lovin hniam lam a pan chho ta zel a ni.

A nerve tha lo avang hian bawksawp telh telh in lang mahse, tunhnai tak ah phei chuan amah rau rau ah a zia ve deuh ti a. Damdawi ei ngai miah lovin pangngai takin a inthiar ve thei a, kan lawm lai tak a ni nghe nghe a. Damlo bawksawp reng ni mahsela chuatia han ngaihtuahawm leh hank al mai tur ah kan ngai lo a ni. Nimahsela, June 10, chawhnu dar 1 vel atang khan a thaw a rawn hah a, Christian Hospital, Serkawn Doctor te kan ko vat a, nimahsela chhan theih a nit a lova, tlai dar 3:50 khan min lo kalsan ta a ni.

Lawmthu.

Kan pa C. Lalzarzova damlohna ah hian chhungkua in lawmthu sawi tur kan ngah em em a. BCM hruaitu ten a natna avanga Office a kal theihloh avang in chawlh awmthei zawng zawng an pe a, chumi piah lamah pawh ngaihhnathiamna thui tak an siam sak zel a. A ai ah, a fapa kal dan tur thleng in ruahmanna siam in, Kohhran hotu te hian an duhsakna leh theihna zawng zawng an pe a ni.

Natna avanga a inenkawlna atan hian Kohhran leh Fellowship te, a thawhpui R & D Staff te leh thawktu nupui te thleng in sum leh pai in an tanpui thin a. Mi mal engemawzat in duhsakna thilpek an pe bawk a ni. Kohhran leh mi mal engemawzat in a natna avang in nasa tak in min tawngtaisak in, Pathian hnenah a dam theih nan thahnemngai takin min dilsak thin a, kan lawm takzet a ni. A damlohna avanga enkawltu doctor te leh nurse te leh damdawi lama thawktu ten duat takin an enkawl thin a. Heng zawng zawng te avang hian lawmthu kan sawi tak meuh meuh a ni.

Hrileng hlauhawm tak kar ah, YMA leh VLTF ten ruahmanna fel tak siam in, Kohhran in amah thlahna hun hlu tak min buatsaih sak avang te hian kan lawm em em bawk a ni. Min lainata min tuarpui a, min ngaihsak tut e zawng zawng avangin Pathian hmingin lawmthu kan sawi e.


________________________________

Pu C Lalzarzoa hi hnaa mi inpe tak a ni

“Pu C. Lal zarzova hi mi kawm nuam, fiamthu duh tak leh hotu te thu awih tak mi a nih bakah a hna a rinawm leh office hna ngaipawimawh em em mi a ni. Account lam hna a thawk a. Hna pending a nei ngai lo a, hotu ten ti tura hna an pek hlen zawh hma chuan chawl mai mai lo chi a ni. Kum 2017 September thla atangin a ke a zawi thin thu sawiin, a theih ang angin Doctor te rawnin a in enkawl a, mahse duh angin a dam tha mawh viau. Dingchunga tuarin office leh a hna a thulh phah ngai lo.

Nikhua a rei zel a kum a lo tawp dawn khan tiang hawl chungin office a lo la kal zel a. A hnuah a nupuiin a lo kai chho thin a, a harsat zual deuh hnuah scooty in alo kal leh a, mahse scooty khalha, han tih din vel pawh a harsat tak zel avangin Director hnenah dilin, a Quarters luahlai hi office building hnuai mai a ni a, “Ka computer hmanlai hi minchawi thlak sak ula inah ka thawk mai ang chu” a ti a, Director-in dept committee lamah thlenin remtih a ni a, an mahni in -ah tha takin hna a thawk leh mai thin.

Hun alo kal deuh a Account bu a ziaklut turin a kut a hum tha theilo a, “Computerah ka enter zel tho a, Manual account book hi Midangin minlo ziahpui se” a ti a, hetiang hian a theih ang angin a la thawk zel a ni. Hun alo kal zel a, a mit a fiah loin computer pawh a hman thei tak loh atang chuan chawlh a la tan ta a a ni.

Hetia a thawh theih loh hnu pawh hian a hna khawih lai lo chhunzawmtu hian an inah kal chilhin hna chungchang an in hrilhfiah fo thin a ni. Pu Mazara hian atheih tawpin a tha leh zungin a tlin tawp thlengin he a rawngbawl hna hi a thawk a. Entawn tur nasa tak a thawhpui te min hnuchhiah a ni.”

– Lalrinawma, Director, R&D, BCM

Pu C. Lalzarzova Chanchin tlangpui (PDF)