Zaninah rampum huapin tawntai rual neih a ni dawn

Mizoram Baptist  Kohhran chuan vawiin, March 29, 2020 zan dar 7:00 hian Coronavirus (Covid-19) hrileng avanga khawvel puma thihna leh hrarsatna namen lo kan tawrh mek pualin Rampum huap-in Mahni chhungkua theuh-ah tawngtai  rual an nei dawn a. He hun hi Kohhran hoten ngaipawimawh a, hmang theuh turin Rev. F. Ramdinmawia, General Secretary, BCM chuan Kohhran hote hnenah hetiang hian a ngenna a siam:-

Covid-19 in khawvel a tihbuaina kal zel ah hian, kan ram Mizoram ngei pawha lo thleng ta a. Hei hian kohhran leh mipui te khawsak phung pangngai pawh a tibuai nasa ta hle mai. Hetiang hi kan dinhmun a nih tak avangin March 27, 2020-a Mizoram Baptist Kohhran Administrative Committee Online Meeting chuan kohhran chhungtin te a rual tlanga tawngtai hona neih tha a ti a. Hemi hun atan hian March 29, 2020 (Pathianni Zan) dar 7:00 a ruat a, he programme pawimawh tak hi kohhran chhungkaw tin ten ngaipawimawha hmang theuh tur in kan in ngen e.” tiin.

Tawngtai thupui:-

  1. BCM thawktu zinga he natna tuar mek Rev. VL Hruaia Khiangte, tuna Zoram Medical College, Falkawn-a enkawl mek, alo dam chhuah leh ngei theih nan leh a nupui fanau leh a chhung te tan.
  1. Mizoram Health & Family Welfare Minister Upa Dr. R. Lalthangliana leh Health lama thawktu, he natna dona leh enkawlna kawnga inhmang zawng zawng te tan.
  1. Mizoram – State Level, District Level leh Local/Village Level Task Force te tan.
  1. He natna hi Mizoram ah a lo darh zel loh nan.
  1. Lockdown kalpui a nih chhunga Mizorama chhuanchham kan awm loh nan.
  1. Lockdown kalpui a nih chhung hian Kohhran chhungkaw tin ten Pathian pawlna tha leh hlawk zawk kan neih theih nan.
  1. Khawvel ram hrang hranga Covid-19 vei te leh enkawl tu daktawr, nurse leh thawktu dang te tan.
  1. Covid-19 venna (vaccine) leh damdawi (medicine) scientist ten an hmuhchhuah thuai theih nan.
  1. Covid-19 avanga thi chhung te tan.
  1. Khawvel ram hrang hrang sawrkar hruaitu ten he hun khirh tak kara rorelna fel tak an neih theih nan.
  1. Covid-19 avang hian khawvelin Kristian te Pathian hi, Pathian Tak, Nung leh Thiltithei a ni tih a lo hriat theih nan.
  1. Mipui kan lo him theih nana dan leh thupek kengkawhtu Magistrate te leh Police te tan.